( 14 ޖަނަވަރީ 2024 ގައި ޝާއިޢުކުރި ބަޔާ ގުޅޭ )
ވަޒީފާއެއް އަދާކުރުމަށްޓަކައި ، ތަހުނިޔާ ކުރަމުންގެންދާ އުއްމީދަކީ އޭނާއަށް އެހާ ފަސޭހައިން ދޫކޮށްލެވެން އޮތް ކަމެއްނޫނެވެ. އެކަމުގައި ތަހުނިޔާއާއި މަންމައާވެސް ޚިޔާލު ތަފާތެވެ. ސާޖިދާއަށް ޤަބޫލު ކުރެވޭގޮތުގައި ، ތަހުނިޔާގެ ޢަމަލުތައް ހުރިގޮތުން ، އޭނާގެ ދަރިފުޅަށް ހޯދައިދިނުމަށް އޭނާ އެދޭ ދިރިއުޅުމެއް ނުފެންނާނެއެވެ. ތަހުނިޔާ އެދަނީ އޭނާ އުފުއްލަންޖެހޭ ޒިންމާތަކަށް ފުރަގަސްދެމުންނެވެ. އެކަންކަން އެއްފަރާތްކޮށް އެކަންކަމާ ދުރުވަމުންނެވެ. އަނތްބެއްގެ ޒިންމާއާއި މަސްއޫލިއްޔަތު އަދާކުރަން ، ތަހުނިޔާ ދަސްކުރަން އެބަ ޖެހެއެވެ.
" މަންމާއެވެ! މިޙާލަތުގައި ، މިވަގުތު އަހަރެންނަށް އެންމެ ބޭނުންވަނީ ، މަންމައާއި ބައްޕަގެ އެހީތެރިކަމާއި އެއްބާރުލުމެވެ. މޮޅު ޚިޔާލާއި ނަސޭހަތެއްނޫނެވެ. އަހަރެންގާތު މަންމަމެންބުނި ހުރިހާކަމެއް އަހަރެން ކޮށްފީމެވެ. އަހަރެންގެވެސް އޮންނަނީ ހިތެކެވެ. އަހަރެން ބޭނުންވާކަމެއް ، ބޭނުންވާ ގޮތަކަށް ކުރުމަށްވެސް ފުރުޞަތު ދީބަލާށެވެ ! " ތަހުނިޔާ ބުންޏެވެ.
ސާޖިދާގެ ކަންބޮޑުވުމަކީ ، މުރުތަޟާ އެކަމުގައި ގެންގުޅޭނެ ވިސްނުމެވެ. ތަހުނިޔާ ، ވަޒީފާއެއް އަދާކުރުމަށް މުރުތަޟާ ބޭނުންނުވާނަމަ ، އެއީ ތަހުނިޔާ ކޮށްގެންވާނެކަމެއް ނޫނެވެ. އެހެންނަމަވެސް ، ތަހުނިޔާ އެކަމާ އެއްބަހެއް ނުވެއެވެ. މުރުތަޟާ ހިތްހަމަނުޖެހިގެން ކުރާނީ ކޮންކަމެއް ހެއްޔެވެ ؟ އެއީ ތަހުނިޔާގެ އުއްމީދެވެ. އެ އުއްމީދަށް ހުރަސް އެޅުމަށް މުރުތަޟާގެ ވިސްނުންހުރިނަމަ ، އެއީ ތަހުނިޔާ ވިސްނަންޖެހޭ ކަމެއްނޫނެވެ. އެއީ މުރުތަޟާގެ މައްސަލައެކެވެ. އެދެމީހުން ނޫނަސް ވަޒީފާ އަދާކުރާ ދެމަފިރިން ދުނިޔޭގައި އެބަ އުޅެއެވެ.
އެކަމާބެހޭގޮތުން ، ޚުދު ސާޖިދާ މުރުތަޟާއާ ވާހަކަ ދައްކަންޖެހޭކަމަށް ސާޖިދާއަށް ވިސްނުނެވެ. އަދި ނުސީދާ ގޮތަކަށް މުރުތަޟާގެ ވިސްނުންހުރިގޮތް ، ސާޖިދާ ދެނެގަތުމަށް ނިންމިއެވެ. ވަގުތު ބަލާފައި ސާޖިދާ މުރުތަޟާއާ ވާހަކަ ދެއްކުމަށް ފުރުސަތު ހޯދިއެވެ. އެކަމަކު ، އެވާހަކަ މުރުތަޟާކުރެން އަހައިލާނެ ފުރުސަތެއް ނުހޯދުނެވެ. އެކަން ކުރާކަށް ސާޖިދާއަކަށް ނުކެރުނެވެ. ފޯނުން އެވާހަކަ ދެއްކުމަށްވުރެ ، ބައްދަލުވެލާފައި އެވާހަކަ ދެއްކުމަށް ފުރުސަތުހޯދައި ، އެދުވަހުގެ ރޭގަނޑުގެ ކެއުމަށް މުރުތަޟާއަށް ދަޢުވަތު ދިނެވެ. މުރުތަޟާ އޭރުހުރީ އޮފީހުގައެވެ. އޮފީސް ނިންމާފައި ދަމުން ، ގެޔަށް ވަނުމުގެކުރިން އެގެޔަށް ދާނެކަމަށް މުރުތަޟާ ބުންޏެވެ.
ގެޔަށް ދިއުމަށްޓަކައި ލިފްޓަށް އަރައި ބޭރަށް ނުކުތްތަނުން ، އޮފީސް ތެރެއިން ކުއްލިޔަކަށް އެދިމާވީ ނޫރުލްޢައިނާއެވެ. އެއީ ، އިއްތިފާޤެއްކަމަށް ބަލާކަށް މުރުތަޟާ ބޭނުމެއް ނުވިއެވެ. އެއީ ، އަނެއްކާވެސް ނޫރުގެ ރޭވުމެއްނޫންކަމަކަށް ނުވާނެއެވެ. އެހެނަސް ، މުރުތަޟާގެ އޮފީހަށް ނޫރު އެއައީ އޭނާގެ އޮފީސްކަމެއްގައެވެ. އެއީ ހަމަ އިއްތިފާޤެކެވެ.
އެކަހަލަ އިއްތިފާޤެއް ، މީގެ ދެތިން ދުވަސްކުރިން މަރީ އިންވެސް ދިމާވިދޯއޭ ބުނެ ، މުރުތަޟާ ހިތްހަމަ ނުޖެހުން ފާޅުކުރިއެވެ.
" އަހަރެން މިއައީ ، އިބްރާހީމް ސާހަބާ ބައްދަލު ކުރުމަށެވެ. ޔަޤީން ނުކުރެވޭކަމަށް ވަންޏާ ، ވަޞީމު ލައްވާ އަހަރެންގެ ދަތުރުގެ މަޢުލޫމާތު ހޯދިގޮތަށް ، އިބްރާހީމް ސާހަބު ކުރެން އަހައި އެކަން ޔަޤީން ކޮށްލާށެވެ. " ނޫރު ބުންޏެވެ.
ނޫރުއާއި މުރުތަޟާއާ ދެމެދު އުފެދުނު ބަހުސް އިތުރަށް ދިގުލައިގެން ދިޔައެވެ. މުރުތަޟާވެސް އޭނާގެ ހިތުގައިވާ ހިތްހަމަ ނުޖެހުން ފާޅުކުރަމުން ގެންދިޔައެވެ. ފަހަތުން ފާރަލަމުން އަންނަ މީހުން އެނބުރިދާއިރު ދާނީ ، އެމީހުން އައިކަމުގެ ހެކި އެތަނަކަށް ދޫކޮށްފައެވެ. ނޫރުވެސް ވަކި މުރުތަޟާއަކަށް ދުލެއް ނުކުރެއެވެ. އޭނާއަކީ ފަހަތުން ފާރަލަމުން އަންނަމީހެއް ނޫނެވެ. އޭނާ އެހުރީ މުރުތަޟާގެ ކުރިމަތީގައެވެ. އޭނާ ފަހަތުންދާނަމަ ، ފާރަލަމުން ، ހޯދަމުން ، ޙާޞިލްކުރަމުން ގެންދާނީ އޭނާގެ ހުވަފެންތަކެވެ. އެއީ ، އޭނާ އެކަނިކޮށްލާފައި މުރުތަޟާ އަތްދޫކޮށްލި ، އޭނާގެ އުއްމީދީ މަޤްޞަދުތަކާއި ކާމިޔާބީތަކެވެ. މުރުތަޟާގެ ފަހަތުން ދުވެގެން ، ނޫރުއަށް މިހާރު ޙާޞިލްވާން އޮތީ ކޮންކަމެއް ހެއްޔެވެ ؟ މުރުތަޟާއަކީ މީހެއްގެ މިލްކެކެވެ. ނަފްސުގެ އަޅެކެވެ.
ނޫރު އެގެންދަނީ ، ނޫރުގެ ޙަޔާތުގެ އަގުހުރި ވަގުތުތައް ބޭކާރުކުރަމުންކަމުގައި މުރުތަޟާ ބުންޏެވެ. ނޫރު އެކަމަށްވެސް އެއްބަސްވިއެވެ.
" އެކަމަކު ، އެއްކަމެއް މުރުތަޟާގެ ހަނދާނުގައި ބަހައްޓައްޗެވެ. އަހަރެމެން މި ދިރިއުޅެނީ އެއް ރަށެއްގައި ، އެއް އަވަށެއްގައި އެއް ހިސާބެއްގައެވެ. ދޭތެރެޔަކުން ބައްދަލުވުމަކީ ނުވެ ނުދާނެ ކަމެކެވެ. ބައްދަލުވާ ކޮންމެ ފަހަރެއް އެއީ އިއްތިފާޤެއްކަމަށް ނުބަލާށެވެ ! އެކަން އެހެން އޮތްއިރު ، ވައްކަޅިޔަކުންވެސް ބަލައިނުލާ ، އެކަކު އަނެކަކަށް ފިލަން އުޅުމުގެ ބޭނުމެއް އެބަ އޮތް ހެއްޔެވެ ؟ ދިރިއުޅުމުގެ އެހާ މުހިންމު ނިންމުމެއް ، މުރުތަޟާ ނިންމީ އަމިއްލަ އިޚްތިޔާރުގައި ނޫން ހެއްޔެވެ ؟ އެހެންވީމާ އެކަމާ ހިތަށް އުނދަގޫވެގެން އުޅުމުގެ ބޭނުމެއް ނެތެއްނޫން ހެއްޔެވެ ؟ އެކަމާ ކެރިގެން ކުރިމަތިލާށެވެ ! " ނޫރު ބުންޏެވެ.
ކުރިޔަށް ފިޔަވަޅެއް އެޅުމަށްފަހު ، ނޫރު ދައްކަމުން ގެންދިޔަ ވާހަކަތައް އަޑުއަހައި އެއަށް ޖަވާބެއް ނުދީއެއް މުރުތަޟާއަކަށް ނުހުރެވުނެވެ. އެކަމާ ކުރިމަތިލައި ، ހިތަށް ލިބިފައިވާ ތަކުލީފުތަކާ ދުރުވުން އެއީ އޭނާއަށް އެހާ ފަސޭހަކަމެއްނޫންކަމަށް މުރުތަޟާ ބުންޏެވެ. ވަކިވުމުގެ ކުރިން ، އޭނާ ނޫރުއަށް ދޭންއޮތް ނަސޭހަތެއް އެބައޮތްކަމަށް މުރުތަޟާ ބުންޏެވެ.
މީހަކާ އިންނާށެވެ. އޭރަށް އެހުރިހާކަމެއް ނޫރުގެ ހިތުންވެސް ފިލައިގެން ހިނގައިދާނެއެވެ. މުރުތަޟާ ހެދިގޮތަށް ، މީހަކާ އިނދެގެން އެ ތަކުލީފުތަކާ ދުރުވުމަކީ ، ނޫރުއަށް ކުރެވޭނެކަމެއް ނޫންކަމަށް ނޫރު ބުންޏެވެ. ނޫރުވެސް މީހަކާ އިންނާނެއެވެ. އެކަން މުރުތަޟާއަށް ޔަޤީންކޮށްދިނެވެ. މުރުތަޟާމަތިން އޭނާވެސް ހަނދާން ނައްތައިލައިފިކަން އެދުވަހަކުން މުރުތަޟާއަށްވެސް އެނގޭނެއެވެ. އެ ނިންމުން ނޫރު ނިންމާނީ ، ހިތުންރުހުމުން އެކަމަށް އެދިގެންނެއްނޫނެވެ. އަދި ، އެކަން ކުރުމަށް ، އެއްވެސް މީހަކަށް ، ނޫރުއަށް މަޖުބޫރެއްވެސް ނުކުރެވޭނެއެވެ.
" ހަނދާން ކުރައްޗެވެ. އެދުވަހަކުން އެއީ ، މުރުތަޟާގެ މަތިން ނޫރުވެސް ހަނދާން ނައްތައިލައިފިކަމުގެ ހެކި ، ދުނިޔެއަށް ހާމަވެގެންދާނެ ދުވަހެވެ. މީހުން ހިނގާއުޅޭ މަގަކީ އެހާ އަވަހަށް ބަދަލުކުރެވޭނެ އެއްޗެއްނޫނެވެ. އެއްހިސާބެއްގައި އުޅެންޏާ ދިމާވެސް ވާނެއެވެ. އެ ޙަޤީޤަތް ޤަބޫލު ކުރާށެވެ ! " ނޫރު ބުންޏެވެ.
ނޫރުގެ ވާހަކަ އެހިސާބަށް ދިޔައިރު ލިފްޓްވެސް ތިރިޔަށް އައިއްސިއެވެ. މަޑުކޮށްނުލައި ނޫރު ލިފްޓަށް އެރިއެވެ. ދެއަތަށް ބޯ ހޫރައިލުމަށްފަހު ، ގެޔަށް ދިއުމަށްޓަކައި މުރުތަޟާވެސް ، އޮފީހުން ނުކުތެވެ.
***************************
މައިދައިތަގާތު ބުނިގޮތަށް ، އޮފީހުން ގެޔަށް ދިއުމުގެކުރިން ، މުރުތަޟާ ގޮސްވަނީ ، ތަހުނިޔާމެން ގެޔަށެވެ. އޭރު އެއީ ދެނަމާދު ދޭތެރޭގެ ވަގުތެވެ. މުރުތަޟާ ދިޔައިރު ސާޖިދާހުރީ ކާން ހަދާފައެވެ. މުރުތަޟާ އައުމާއެކު ، ތަހުނިޔާވެސް އައިސް ސާޖިދާގެ ދެމަފިރިން ، މުރުތަޟާއާއެކީ ކާން އިށީނެވެ. ސާޖިދާ ކައްކާ އެއްޗެތި ، މުރުތަޟާއަށް ވަރަށް މީރެވެ. ސާޖިދާވެސް ހުރީ ، އެކަމަށް ވިސްނައިގެން މުރުތަޟާއަށް މީރުވާނެ ހުރިހާ އެއްޗެއް ތައްޔާރު ކޮށްފައެވެ. ކެއުމުގެ ތެރޭގައި ، އެކަކު އަނެކަކަށް ވާހަކަ ދައްކަމުން ، ކާއެއްޗެތީގެ މީރުކަމަށް ތަޢުރީފު ކުރަމުން ގެންދިޔައެވެ. ތަހުނިޔާވެސް ، މީރުހެން ހީވާ އެއްޗެތި މުރުތަޟާއާ ކައިރިކުރަމުން ގެންދިޔައެވެ. ވާހަކަ ދައްކަމުންގޮސް އެންމެފަހުން ، ތަހުނިޔާއާވެސް ޖެހުނެވެ. ތަހުނިޔާއަކީ ރަނގަޅަށް ފުށްގަނޑެއް މޮޑެލައިގެން ރޮށްޓެއް ފިހެލަންވެސް އެނގޭ މީހެއްނޫނެވެ. މަންމަ އެހާ މީރުކޮށް ކައްކާއިރު ، ތަހުނިޔާއަށް ކައްކަން ދަސްވެފައި ނެތުމަކީ މައްސަލަ އެކެވެ. މަންމަގާތުން ، މީރުކޮށް ކައްކަން ދަސްކުރުމަށް ތަހުނިޔާގާތު ، މުރުތަޟާ ބުންޏެވެ.
މުރުތަޟާގެ ހިތްވެސް އެދެނީ ، އޭނާގެ އަންހެނުންނަކީ ، މަންމައެކޭ އެއްގޮތަށް ، މީރުކޮށް ކައްކަން އެނގޭމީހަކަށް ވުމެވެ. މުރުތަޟާގެ ހިތް އެކަމަށް އެދިއޮތްއިރު ، އޭނާއާ ކައިވެނި ކުރުމުގެ ކުރިން ، އެސުއާލު އޭނާއާ ކޮށްލަން ޖެހޭނެކަމުގައި ތަހުނިޔާ ބުންޏެވެ.
ތަހުނިޔާގެ ވާހަކަތަކަށް ސާޖިދާ އެހާ ހިތްހަމައެއް ނުޖެހުނެވެ. އެ ސުއާލަކީ ، ތަހުނިޔާ ، މުރުތަޟާއާ ކޮށްގެންވާނެ ސުއާލެއްނޫންކަމަށް ސާޖިދާ ބުންޏެވެ. އެހެންނަމަވެސް ، ތަހުނިޔާއަކީ އެއްވެސް ވަރަކަށް ކައްކަން އެނގޭމީހެއްނޫންކަން މަންމައަށް އެނގޭނެކަމުގައި ތަހުނިޔާ ބުންޏެވެ. އެކަން އެހެން އޮތްއިރު ، މުރުތަޟާއަށް އެކަން އޮޅުވައިލުމަކީ ، އޭނާ ކޮށްގެންވާނެކަމެއްނޫނެވެ.
ތަހުނިޔާގެ ބައްޕަ ، ޢާޞިފްވެސް އެންމެފަހުން ، ވާހަކައިގެ ތެރެޔަށް ވަނެވެ. މުރުތަޟާ އެބުނީ ކައްކަން ދަސްކުރާ ވާހަކައެވެ. އެހެންވީމާ ، މަންމަގާތުން ކައްކަން ދަސްކުރުމަށް ތަހުނިޔާގެ ބައްޕަވެސް ނަސޭހަތް ދިނެވެ.
" ބައްޕާއެވެ ! ކެއްކުމަށްވުރެ މާ މުހިންމު އެހެންކަންތައްތަކެއް ........ " އެހިސާބުން ، ތަހުނިޔާގެ ވާހަކަ ސާޖިދާ ހުއްޓުވިއެވެ. އަދި އިތުރަށް ވާހަކަ ނުދައްކައި ތަހުނިޔާވެސް ރަނގަޅަށް ކެއުމަށް ބުންޏެވެ. އަދި ، މުރުތަޟާއަށް ލިބުނު ހިމޭންކަން ފެނިފައި ކަވާބެއްވެސް އަދި ނުކަމެއްނޫންހޭ ބުނެ ކަވާބުތަށި މުރުތަޟާ އަށް ދިއްކޮށްލިއެވެ. އެހެންނަމަވެސް ، ދެން އިތުރަށް އެއްވެސް އެއްޗެއް ކާކަށް މުރުތަޟާ ބޭނުމެއް ނުވިއެވެ. އޭނާ އެހުރީ ވަރަށް ހަވީރުވީފަހުން ރަނގަޅަށް ސައިބޮއެގެންކަމަށް ބުންޏެވެ.
އިތުރަށް އެގޭތެރޭގައި ހުންނާކަށްވެސް މުރުތަޟާ ބޭނުމެއް ނުވިއެވެ. އަތް ދޮވެލުމަށްފަހު ، ދަނީއޭ ބުނެ ތެދުވެ ، ތަހުނިޔާ އޭނާއާއެކީ ގެޔަށް ނުދާނަންތޯ ސުއާލު ކުރިއެވެ.
ތަހުނިޔާ ބުނީ ، މުރުތަޟާއާއެކީ ގެޔަށް ނުދާނެ ކަމަށެވެ. އެރޭ އޭނާ މަޑުކުރާނީ އެގޭގައި މަންމަމެންގާތުގައެވެ. ތަހުނިޔާ އެއައީ ، މުރުތަޟާގެ މަންމަގާތުވެސް އެވާހަކަ ބުނެފައެވެ. މުރުތަޟާއަށް ލިބުނު ޙައިރާންކަން ފޮރުވުމަށް މަސައްކަތް ކުރިއެވެ. މަންމައާއި ދައްތަ އޭނާއަށް މަޑުކޮށްގެން ތިބޭނެކަމަށްބުނެ ، ގެޔަށް ދިއުމަށްޓަކައި އަވަސް އަވަހަށް ، މުރުތަޟާ އެގެއިން ނުކުތެވެ.
މާބޮޑު މައްސަލަޔަކަށް ނުހަދައި ، އޭނާ ގެންދަންނޫޅެ ، މުރުތަޟާ ދިޔައީތީ ﷲ އަށް ތަހުނިޔާ ޝުކުރު އަދާކުރިއެވެ. މިރޭ އޭނާ ބަލަން ބޭނުންވާ ފިލްމެއް އަޅުވައިގެން ޓީވީ ބަލައިލާނީއެވެ. ފިލްމެއް ބަލައިނުލާތާވެސް އެތައް ދުވަހެއް ވެއްޖެއެވެ.
ތަހުނިޔާ ކަންތައް އެކުރިގޮތުން ، ސާޖިދާ އިނީ ތުންފިއްތައިގެން އޭނާގެ ފިރިމީހާ ، ޢާޞިފާ ދިމާލަށް ބަލަހައްޓައިގެންނެވެ. ސާޖިދާ ބޭނުންވެފައި އެއިނީ ، އެކަމާ ބެހޭގޮތުން ، ޢާޞިފް އެއްޗެކޭ ބުނެ ތަހުނިޔާއަށް ނަސޭހަތްދޭށެވެ. އެކަން ކުރާކަށް ޢާޞިފެއް ނޫޅުނެވެ. ޢާޞިފަކީ ، ސާޖިދާހެން އެހާ ރުންކުރު މީހެއްނޫނެވެ. އޭނާ އެއްޗެކޭ ނުބުނެ އެ މަޑުކުރީ ، ވަގުތެއް ހޯދާފައި އެރޭ ، ތަހުނިޔާއާ ވާހަކަދައްކައިލާ ނަސޭހަތް ދިނުމަށެވެ.
************************
ގެޔަށްގޮސް ، މަންމަމެންނާ ބައްދަލުކޮށްލުމަށްފަހު ، އާދައިގެމަތިން މުރުތަޟާ ނުކުތީ ހިނގާލާށެވެ. ކުއްލިޔަކަށް ކުރިމަތިން އޮތް ގޯޅިޔަކުން ދުވެފައި އައިމީހަކު މުރުތަޟާގެ ކުރިމައްޗަށް ހުއްޓުނެވެ. އޭނާގެ ގައިގާ އެމީހަކު ލައިނުގަތީ ކިރިޔާއެވެ. އެއީ ނޫރުއެވެ. ނޫރުގާތަށް އައީކީ އަމަށަކު ހިންޏެއްނޫނެވެ.
ނޫރުއަށް ސަމާލުކަމެއް ނުދީ މުރުތަޟާ ކުރިޔަށް ހިނގައިގަތެވެ. މުރުތަޟާގެ ޙާޟިރަކީ ނޫރުއަށް ވަރަށް ކަމުދާ އިޙްސާސެއްކަމުގައި ބުނަމުން ، ނޫރުވެސް މުރުތަޟާއާއެކީ ހިނގައިގަތެވެ. ބޭނުން ނޫންކަމަށްވިޔަސް ، ނޫރުގެ ހިތްއެދެނީ އެގޮތަށެވެ.
ނޫރުއަށް އެ އިޙްސާސް އެގޮތަށް ކުރެވުނުނަމަވެސް ، ނޫރު އޭނާގާތު ހުރެގެން އުފަލެއް ލިބޭކަމުގެ އިޙްސާސެއް މުރުތަޟާއަކަށް ނުކުރެވެއެވެ. އެއީ މުރުތަޟާއަށް ތަފާތެއް އޮތްކަމެއްނޫނެވެ. އުފާވެރިކަމުގެ މާނަ ، މުރުތަޟާއަށް އޮންނަނީ އޮޅިފައެވެ. ކަޅު އަނދިރި ރެއެއްގައި ކަނު އަނދިރިކަމުގައި ، މަގުހިނގާމީހަކަށް ، އެއްވެސް ތަނެއް ނުފެންނަފަދަ ގޮތަކަށެވެ. އޭނާގެ ހިތް އޮންނަނީ ކެކުޅުމާއި އުދާހުން ފުރިފައެވެ. އުފަލަކީ ، އެހިތް ދަންނަ އެއްޗެއްނޫނެވެ. ކުރިމަތިން ފެންނަ ފަނޑު އަލިކަމަކުން ކުޑަކުޑަ އުއްމީދެއް އާވިޔަސް ، އެއުއްމީދުގައި ޗަސްޕެއް ނުހުރެއެވެ. ދިރުމެއް ނޯވެއެވެ. އިރުއިރުކޮޅުން ، މުރުތަޟާގެ ކުރިމައްޗަށް ނޫރު އަޔަސް ، އެއުފާވެރިކަމެއް ނުލިބެއެވެ. އިތުރަށް ލިބެނީ ތަކުލީފެވެ. މަގުއޮޅިގެންދިއުން ފިޔަވައި އެހެންކަމެއް ނުވެއެވެ. ހައްޔަރުވަނީ އޭނާގެ ނަފުސެވެ. އޭނާ ، ސަލާމަތުން އެނބުރި މަންޒިލަކަށް ދިއުމަށް ދޫކޮށްލުމަށް ، ނޫރުގެ ކިބައިން މުރުތަޟާ އެދުނެވެ. މުރުތަޟާ މިހާރު އެހަދަނީ ގޯހެއްކަމަށް ނޫރު ބުންޏެވެ. އޭނާއަކީ ، މުރުތަޟާއަށް އެފެންނަ އަލިކަމެއް ނޫނެވެ. އޭނާއަކީ ހުޅުކޮޅެކެވެ. އެހުޅުކޮޅުން މުރުތަޟާ ހޯދަންބޭނުންވާ އަލިކަމެއް އޮވެދާނެއެވެ. އެހުޅުކޮޅު ނުނިވި ހުރިއްޔާއެވެ.
" އަހަރެމެން ދެމީހުން ދާންބޭނުންވާ މަގަކީ ، ތަފާތު ދެމަގެއްކަން އަހަރެންނަށް އެނގެއެވެ. އެހެންނަމަވެސް ، ކުޑަ ވަގުތުކޮޅަކަށް އެކީގައި ދެވިދާނެ ނޫން ހެއްޔެވެ ؟ ނޫރު ބުންޏެވެ.
ނޫރުގެ ވާހަކަ ނިމުމާއެކު ، އިސްއުފުލައި ރޭގަނޑުގެ އަނދިރިކަމަށް އަލިކޮށްދެމުންދާ ހަނދަށް ، މުރުތަޟާ ބަލައިލިއެވެ. ނޫރުއާ ގާތަށް ޖެހިލައި ، ނޫރުއާއެކީ މަޑުމަޑުން ކުރިޔަށް ހިނގައިގަތެވެ. ( ނުނިމޭ )
