މިއަހަރު ބާއްވާ ރިޔާސީ އިންތިޚާބުގައި ޖުމްހޫރީ ޕާޓީގެ ފަރާތުން ވާދަކުރައްވާ ރިޔާސީ ކެންޑިޑޭޓް އެ ޕާޓީގެ ލީޑަރު ގާސިމް އަށް ރިޔާސީ ޓިކެޓު ހަވާލުކޮށްފިއެވެ.
މި ޓިކެޓް ހަވާލުކޮށްފައިވަނީ ކާނިވާ ސަރަހައްދުގައި ބޭއްވި ރަސްމިއްޔާތެއްގައެވެ.
މި ރަސްމިއްޔާތުގައި ޖުމްހޫރީ ޕާޓީގެ ރިޔާސީ ޓިކެޓް ގާސިމް އަށް އަރުވައިދެއްވީ ޕާޓީގެ ސެކްރެޓަރީ ޖެނެރަލް އަލީ އާރިފްއެވެ.
މި ރަސްމިއްޔާތުގައި ޖުމްހޫރީ ޕާޓީން ވަނީ އެޕާޓީގެ ރިޔާސީ ކެމްޕޭން ރަސްމީކޮށް ލޯންޗްކޮށް، ކެމްޕޭންގެ ސްލޯގަން ކަމުގައިވާ "ހާސްކަނޑާލާ، ހަމަޖެހޭނެ" އާއި ކެމްޕޭންގެ ރަސްމީ ލަވަ ވެސް އިފްތިތާޙްކޮށްފައެވެ.
ޤާސިމަށް ޖޭޕީގެ ރިޔާސީ ޓިކެޓް ލިބިވަޑައިގެންނެވީ ޖޭޕީގެ ރިޔާސީ ޕްރައިމަރީއަށް ހުޅުވާލި ފުރުޞަތުގައި ޤާސިމް ފިޔަވާ އިތުރު ބޭފުޅަކު ވާދަކުރައްވާފައި ނުވާތީއެވެ.
ރިޔާސީ ޓިކެޓާއި ޙަވާލުވެވަޑައިގަތުމަށްފަހު ޤާސިމް އިބްރާހީމް ވަނީ ޖުމްހޫރީ ޕާޓީގެ ވެރިކަމެއްގައި އެމަނިކުފާނު އިސްކަންދެއްވާނެ ކަންތައްތަކާއި، ގެންގުޅުއްވާނެ ސިޔާސަތުތަކުގެ މައްޗަށް އަލިއަޅުއްވާލައްވާ ވާހަކަދައްކަވާފައެވެ.
ޤާސިމް އިސްވެ ހުންނަވާ ޖޭޕީން ވަނީ 2008 އަދި 2013 ގެ ރިޔާސީ އިންތިޚާބުގައިވެސް ވާދަކޮށްފައެވެ.
މިއަހަރުގެ ރިޔާސީ އިންތިޚާބު ބޭއްވުމަށް އިލެކްޝަންސް ކޮމިޝަނުން ނިންމާފައިވަނީ ސެޕްޓެމްބަރުމަހުގެ 9 ވަނަ ދުވަހުއެެވެ. އަދި އިންތިޚާބުގެ 2 ވަނަ ބުރެއް ބާއްވަން ޖެހޭނަމަ ސެޕްޓެމްބަރު 30 ގައި ދެވަނަ ބުރުގެ ވޯޓުލުން ބޭއްވުމަށްވެސް ވަނީ ނިންމާފައެވެ.
