ރާއްޖެ – މޮރިޝަސް ކަނޑުގެ އިން ބެހުމުގެ މައްސަލައިގާ ދިވެހި ރާއްޖެއިން ވަކާލާތު ކުރި ގޮތަށް އިންޓަރނޭޝަނަލް ޓްރައިބިއުނަލް ފޯ ދަ ލޯ އޮފް ދަ ސީ (އިޓްލޮސް) އިން މައްސަލަ ނިންމައިފިއެވެ.
ހަމަ އެކަނި ހިކިދިޔަ ވަރުގައި ވަކި ދުވަސްވަރުތަކެއްގައި ހިކިފައި އޮންނަ ބްލެންހަމް ފަރުން ފެށިގެން މޮރިޝަސްގެ އިން އެޅުމަށް މިކަމުގައި މޮރިޝަސް އިން ވަކާލާތު ކުރަމުންދިޔައި އިރު، ރާއްޖެއިން ވަކާލާތު ކުރީ އެކަމާއި ދެކޮޅަށެވެ.
އެގޮތުން ރާއްޖެއިން އެކަން ސާބިތު ކުރުމަށް ސެޓަލައިޓް ފޮޓޯތަކާއި ސައިންޓިފިކް ހެކި ވަނީ ހުށަހަޅާފައެވެ.
މި މައްސަލައިގާ އިޓްލޮސް އިން ނިންމީ މިފަދަ އެހެން މައްސަލަތުގައި ވެސް އަމަލުކުރާ ބީދައިން އިކުއި ޑިސްޓެންސް (ދެބައި އެއްވަރަށް) އުސޫލުން ބަހާލާށެވެ.
އެކަމާއި ގުޅިގެން އިޓްލޮސްއިން މިއަދު ނިންމި ނިންމުމުގައި ވަނީ ރާއްޖޭން ފާހަގަކުރި ނުކުތާތަކަށް ތާއީދުކޮށްފަ އެވެ. އިޓްލޮސްގެ ސްޕެޝަލް ޗޭމްބަރުން އިއްވި ނިންމުމުގައި ބުނީ، ތިލަ ދިޔަވަރުގައި ފެންނަ އޮންނަ ފަރަކުން، އިން ވަކި ކުރުމަށް އިކުއިޑިސްޓަންސް ރޮނގު ދެމޭނެ އެއްވެސް ހަމައެއް ނެތް ކަމަށެވެ.
އެއާއެކު މޮރިޝަސްއާ ދެކޮޅަށް މައްސަލަ ނިމުމުން، ދެގައުމުގެ ފުށުއަރާ ސަރަހައްދުން ރާއްޖެއަށް ވަނީ ގާތްގަނޑަކަށް 4،600 އަކަކިލޯމީޓަރުގެ އިތުރު ސަރަހައްދެއް ކަށަވަރުވެފަ އެވެ.
