މި ބަރާކާތްތެރި ރަމަޟާން މަހާދިމާކޮށް ، ކުރީގެ އެޗްޑީސީން އަދި މިހާރުގެ އާރބަންކޯ އިން އެ އިޢުލާންކުރީ ހާދަހާ ފައްކާ އިނާމެކެވެ. އެކުންފުނިން ޢާންމު ފަރުދުންނަށް ދޫކޮށްފައިހުރި ސޯޝަލް ހައުސިންގ ޔުނިޓުތަކަކީ ދިގުމުއްދަތުން އަގުއަދާކުރާގޮތަށް ދޫކޮށްފައިހުރި ތަންތަނެވެ. މަހުންމަހަށް ދައްކަންޖެހޭކުލި ނުދެއްކޭ މީހުންވެސް އުޅޭނެއެވެ. އެހެނަސް އެމީހުން ޤަވާޢިދުން ކުލިނުދައްކަނީ ، ކީއްވެގެންކަން ، އާނބަންކޯއަށް އެނގިފައި އެބައޮތްތޯ ބައެއްމީހުން ދޮންބެއްޔާގާތު އަހައެވެ. އެމީހުންނަށް ދޭނެޖަވާބެއް ދޮންބެއްޔާއަކަށް ނޭނގެއެވެ. އަޞްލުގައިވެސް އެ ފްލެޓްތަކަށް އެދިގެން ފޯމާ އޭތިމީތިލައިގެން އެތަންތަން ހޯދީ ، ބޯހިޔާވަހިކަމެއް ނެތްމީހުން ހެއްޔެވެ . އެސުއާލުގެ ޖަވާބު އެއީ އަރަތެކެވެ. ހިޔާފްލެޓުން ފްލެޓް ލިބުނު އެތައްސަތޭކަ މީހުންނެއް އެތަންތަނަކު ދިރިއެއް ނުއުޅެއެވެ. މިވީ ކިހިނެއް ހެއްޔެވެ ؟ ހިޔާ ފްލެޓްގައި ދިރިއުޅޭ މީހުންގެ 80 އިންސައްތަޔަކީ ކުއްޔަށް އުޅޭ މީހުންނެވެ. 80 އިންސައްތަމީހުން އެބައިމީހުންނަށް ލިބިފައިވާ ފްލެޓް ހުރީ ކުއްޔަދީފައެވެ. ގިނަމީހުން ދިރިއުޅެނީ ހަމަ މާލޭގައެވެ. ފްލެޓްތަކެއް އެޅުމަކީ މާލޭގެ ތޮށްޖެހުމަށް އޮތް ޙައްލެއްނޫންކަން މިމިސާލުން ސާބިތުކޮށް ދެއެވެ.
މީހަކާ ނީނދެ ، ނުވަތަ އިނދެވަރިކޮށްފައި ، ދަރިންދޫކޮށްލައި އަންހެނާގެ ބޮލަށް ޖަހައި ، މަޢުލޫމާތު ގޯސްކޮށްދީގެން ފްލެޓް ހޯދައިގެން ، އެތަންތާ އެކަނި ދިރިއުޅޭ ފިރިހެނުންވެސް މަދުން އެބަ އުޅެއެވެ. ފްލެޓް އަޅަންވީއެވެ. ހަމައެފަދައިން ، ފްލެޓަށް އެދެނީ ، ބޯހިޔާވަހިކަމަށް އެންމެ ބޮޑަށް ބޭނުންޖެހިފައިވާ މީހުންކަން ކަށަވަރު ކުރަން އެބަޖެހެއެވެ. މާލޭގެ ގެދޮރަކީ ޒަމާނުއްސުރެ އަރިހުބޭކަލުންގެ ޙައްޤެކެވެ. މާލޭގެ ދެކުނުފަރާތް ހިއްކާފައިވެސް ، ގޯތި ދޫކުރެވުނީ ، ވަޒީރުންނާއި ރައްޔިތުންގެ މަޖިލީހުގެ މެންބަރުންނާއި ، ރައީސްއޮފީހުގެ މުއައްޒަފުންނަށާއި ، ވަޒީރުން ފޮނުވި ލިސްޓަކަށެވެ. ވަޒީރުންގެ ކާރު ޑްރައިވަރުންނާއި ، ބައެއް މީސްމީހުންގެ ސިއްރުތައް ވަންހަނާކޮށްދޭ ފާރަވެރިންނާއި ރައްޓެހިން އެލިސްޓްތަކުގައި ހިމެނުނެވެ. އެފަހަރުވެސް ގޯތި ދެވުނީ ރަނގަޅަކަށް ނޫނެވެ. ގޯތި ރަނގަޅަށް ދެވުނުނަމަ ، ދިގުމުއްދަތަކަށް ގޯތި ކުއްޔަށްދީގެން ، ގޯތިލިބުނުމީހުން އާމްދަނީ ހޯދާކަށް ނުފެށީހެވެ. އެންމެ ކުޑަމިނުން ވަށާ ފާރު ރާނައިލާން ބޭނުންނުވާ މިންވަރަށް ގޯތި ޙައްޤުނޫން އެތައް ބަޔަކު ތިއްބެވެ. ކިރިޔާވެސް އިންސާފެއް އޮތްނަމަ ، ލިބޭތާ ލިބިގަނެގެން ، ފަޤީރު ނިކަމެތިމީހާ ، ބޯހިޔާވަހިކަމެއްނެތި މަގުމަތިވާން ދޫކޮށްލެވޭގޮތަކަށް މާލެއިން ގޯއްޗެއް ނުދެވުނީހެވެ.
ވެރިކަން ދިފާޢުކުރުމަށް ނުވަތަ ވެރިކަމުގައި އަޣުލަބިއްޔަތު އޮތުން އަމާޒަކަށް ހަދައިގެން ، ފަޅުރަށާއި ގޯތި ބެހިދުވަސްވަރު ، އެކަން ހިނގާފައި އެއޮތީ ، ޤާނޫނުގައި ވަކިގޮތެއް ބަޔާންކޮށް ، ނުވަތަ ބަޔާން ނުކޮށް އޮވެގެންނެއް ނޫނެވެ. ރައްޔިތުންގެ މެދުގައި ހަމަހަމަ ކަމާއި ޢަދްލު އިންސާފަށް ވެރިކަންކުރުން ޤާނޫނުގައި ލާޒިމް ނުކުރާތީކީ ނޫނެވެ. އެއީ ، ޚުދުމުޚުތާރުކަމާއި އަނިޔާވެރިކަމުގައި ވެރިކަން ކުރުމުގެ ނަތީޖާއެވެ. ޒަމާން މިއޮތީ ބަދަލުވެފައެވެ. އަދިވެސް އެކަންކުރަންވީ އެގޮތަށް ހެއްޔެވެ ؟
ދާދިމިދާކަށްދުވަހު ، އެއޮއް އިޢުލާންކުރި އިނާމެކެވެ. " ޕޭ އެންޑް ވިން " އެކެވެ. ޕޭގެ މާނަޔަކީ އަގު ދެއްކުމެވެ. އެއްޗަކަށް ކަނޑައެޅިފައިވާ އަގު ދެއްކީމަ އިނާމު ލިބެނީއެވެ. އެއެއްޗެއް ގަތީ ފުރިހަމަ އަގު ، އެއްބަސްވެފައިވާގޮތުގެމަތިން ދެއްކުމަށް އެއްބަސްވެފައެވެ. އެއަގު ދެއްކީމަ އަނެއްކާ މިއޮއް އިނާމު ލިބެނީއެވެ. ކޮންފަދަ ދުނިޔެއެއް ހެއްޔެވެ ؟ ބަރާބަރަށް ކުލިދައްކާ ފަރާތަތަކަށް ލިބެނީވެސް ކުޑަ އިނާމެއްނޫނެވެ. ޢުމުރާ ދަތުރެކެވެ. ހެޔޮކަމުގެ ކޮޅެއްނެތެވެ.
ހިޔާފްލެޓްތަކުގެ އަގުއެހުރީ ތަންހަދަންދިޔަ ޚަރަދަށްވުރެ ކުޑަކުރެވިފައި ކަމަށްވެދާނެއެވެ. ކަންއެހެން އޮއްވާ ، ފްލެޓްގެ ކުލި ބަރާބަރަށް ދައްކަމުން ދަންޏާ މިއޮއްލިބެނީ ޢުމްރާ ދަތުރެކެވެ. އެވެސް ކޮންމެ ތިންމަހަކުން ނަގާ ޤުރުއަތަކުންނެވެ. މައިންބަފައިން ދަރިން ކިޔަމަންކުރުވަން މެޓާ ދޭގޮތަށް ، ވިޔަފާރި ކުންފުނިތަކުން އެކުންފުންޏެއް ނިސްބަތްވާ ކަސްޓަމަރުން ، އެއްބަސްވުމަށް ޢަމަލުކުރަން މަޖުބޫރުކުރުވަން ، ޢުމުރާދަތުރު ދޭހިސާބަށް ދިޔައިމަ ، އިޖްތިމާޢީ ޢަދާލަތާއި ޤާނޫނީ ޙުކޫމަތު އޮތީ ކޮންތާކުބާވައޭ ދޮންބެއްޔާ ހިތަށް އެރިއެވެ. މިއީ ސޯޝަލް ހައުސިންގ ޔުނިޓް އަޅާ ، ދުނިޔޭގެ އެހެން ޤައުމުތަކުން ފެންނަ ކަމެއްނޫނެވެ.
