ހދ. ނޮޅިވަރަމްގައި މަރުވެފައި އޮއްވާ ފެނުނު ނިޝާމާ މުހައްމަދުގެ ހަށިގަނޑު، އިންޑިއާ އިން ޕޯސްޓްމޯޓަމް ހެދުމަށްފަހު، މާލެ ގެނެސްފި އެވެ.
ފުލުހުން ބުނީ ނިޝާމާގެ ހަށިގަނޑު މާލެ ގެނެސްފައިވަނީ މިއަދު ކަމަށެވެ.
ނިޝާމާ މަރުވެފައި އޮއްވާ ފެނުނީ މި މަހުގެ 10 ވަނަ ދުވަހު މެންދުރު އެވެ.
އުމުރުން 28 އަހަރުގެ ނިޝާމާގެ ހަށިގަނޑު ޕޯސްޓްމޯޓަމް ހަދަން ފޮނުވައިފާ ވަނީ މަރުވިތާ 11 ދުވަސް ފަހުން މި މަހުގެ 21 ވަނަ ދުވަހުގެ ހެނދުނު އެވެ.
އޭނާގެ މަރުގެ މައްސަލާގައި ތުހުމަތުކުރެވޭ އޭނާގެ ފިރިމީހާ އަބޫބަކުރު ފައިސަލް މި މަހުގެ 11 ވަނަ ދުވަހުގެ ރޭ ކޯޓު އަމުރެއްގެ ދަށުން ހައްޔަރުކޮށް އޭނާގެ ބަންދާމެދު ގޮތެއް ނިންމުމަށް ކޯޓަށް ހާޒިރު ކުރުމުން ހޯމް މިނިސްޓްރީން ކަނޑައަޅާއި ތަނެއްގައި ބަންދުގައި ބަހައްޓަން 15 ދުވަހުގެ މުއްދަތެއް ދީފައި ވަނިކޮށް ފައިސަލް ވަނީ ދަންޖެހިފަ އެވެ.
މި މަހުގެ 12 ވަނަ ދުވަހުގެ ރޭ ފައިސަލް ދަންޖެހިފައި ހުއްޓާ ފެނިގެން ހާލުދެރަވެ ކުޅުދުއްފުށި ރީޖަނަލް ހޮސްޕިޓަލުގެ ވެންޓިލޭޓަރުގައި ފަރުވާދެމުން ދަނިކޮށް މި މަހުގެ 19 ވަނަ ދުވަހު ފައިސަލް ވަނީ މަރުވެފައެވެ.
ނިޝާމާ މަރުވިއިރު ކުޑަ 3 ކުދިން ތިބިއިރު އެނގިފައިވާ ގޮތުގައި ނިޝާމާ މަރުވުމުން ފައިސަލް ފުރައިގެން ދިޔައީ ދަތުގެ ޑޮކްޓަރަކަށް ދެއްކުމަށް ކަމަށް ބުނެ ކުޅުދުއްފުއްޓަށެވެ.
