ފީފާ ވޯލްޑް ކަޕް 2022 ގެ ގުރޫޕް އީގައި ހިމެނޭ ސްޕެއިން އާއި ޖަރުމަނު ބައްދަލުކުރި މެޗު އެއްވަރުވެގެން ނިމިއްޖެއެވެ.
އަލް ބައިތް ސްޓޭޑިއަމުގައި ކުރިޔަށް ދިޔަ ސްޕެއިން އަދި ޖަރުމަން ބައްދަލުކުރި މެޗު އެއްވަރުވީ 1-1 ގެ ނަތީޖާއިންނެވެ.
މި މެޗު ފެށިގެން ސްޕެއިނުން ރަނގަޅަށް ކުޅުނު ނަމަވެސް އެ ޓީމަށް ޖަރުމަނުގެ ޑިފެންސް ފޫއަޅުވާލާ ގޯލާއި އަމާޒުކޮށް މާ ނުރައްކާތެރި ހަމަލާއެއް ފޮނުވާލެވިފައެއް ނުވެއެވެ. ފުރަތަމަ ހާފުގައި ދެ ޓީމުގެ ފަަރަތުން ވެސް ފެނިގެން ދިޔައީ މަދު ހަމަލާތަކެކެވެ. އެގޮތުން ސްޕެއިންގެ ޑެނީ އޮލްމޯ އާއި ޖޯޑީ އަލްބާގެ ހަމަލާތައް ކާމިޔާބު ނުކުރެވުނު އިރު، ޖަރުމަނުގެ ސާޖް ގިނާބްރީ އާއި ކިމިޗްގެ ހަމަލާތައް ވެސް ވީ ބޭކާރެވެ.
މި ހާފުގައި ޖަރުމަނުން އެޓީމަށް ލިބުނު ހިލޭ ޖެހުމަކުން ރުޑިގާ ލަނޑެއް ޖެހި ނަމަވެސް އެއީ އޮފްސައިޑުގައި ހުރެ އެނާ ޖެހި ލަނޑަކަށް ވުމުން މި ލަނޑު ބަލައިގެންފައެއް ނުވެއެވެ.
މި މެޗުގައި ފެނިގެން ދިޔަ ދެ ލަނޑުވެސް ޖަހާފައިވަނީ ފަހު ހާފުގައެވެ. އެގޮތުން ފުރަތަމަ ލަނޑު ޖަހާ ލީޑު ނެގީ ސްޕެއިން ޓީމުންނެވެ. ބަދަލު ކުޅުންތެރިއެއްގެ ގޮތުގައި ކުޅެން އެރި އަލްވާރޯ މޮރާޓާ ސްޕެއިންއަށް ލީޑު ނަގައިދިން އިރު، މިއީ ޖޯޑީ އަލްބާ ދިން ބޯޅައަކުން މޮރާޓާ ޖެހި ގޯލެކެވެ.
ޖަރުމަނުން މެޗުގެ ނަތީޖާ ހަމަހަމަ ކުރީ މެޗުގެ 83 ވަނަ މިނެޓުގައެވެ. ޖަރުމަނަށް ނަތިޖާ ހަމަހަމަ ކޮށްދިން ލަނޑު ޖަހައިދިނީ ޖަމާލް މުސިއާލާގެ އެހީތެރިކަމާއި އެކު ނިކްލަސް ފުލްކްރަގްއެވެ.
މި ނަތީޖާއާއެކު ގްރޫޕް އީގެ އެއްވަނާގައި ސްޕެއިން އޮތީ ކުޅުނު ދެމެޗުން ލިބުނު ހަތަރު ޕޮއިންޓާއެކުގައެވެ. ދެވަނާގައި އޮތް ޖަޕާނާއި ތިންވަނާގައި އޮތް ކޮސްޓަރިކާއަށް ވެސް ލިބެނީ ކުޅުނު ދެމެޗުން ތިން ޕޮއިންޓެވެ. ގްރޫޕް ތާވަލުގެ ފުލުގައި ޖަރމަނީ އޮތީ އެންމެ ޕޮއިންޓަކާއެކުއެވެ. އެހެންކަމުން މުބާރާތުގެ ދެވަނަ ބުރަށް ދިއުމަށް ޖަރުމަނަށް އޮތް ފުރުސަތު ވަރަށް ހަންޏެވެ. ޖަރުމަނަށް ދެވަނަ ބުރުގެ ފުރުސަތު އޮތް ނަމަވެސް ފަހު މެޗުގައި އެޓީމަށް ޖެހޭނީ ކޮސްޓަރިކާ ބަލިކުރާށެވެ.
ގުރޫޕް ސްޓޭޖުގެ ފަހު މެޗުގައި އަންނަ މަހުގެ 2 ގައި ސްޕެއިން ޖަޕާނާއި ދެކޮޅަށް ނުކުންނައިރު، ޖަރުމަން ނުކުންނާނީ ކޮސްޓްރިކާއާއި ދެކޮޅަށެވެ. މި ގުރޫޕް އީގެ ފަހު ދެމެޗަށް ވުމުން މި ދެމެޗުވެސް ކުޅޭނީ އެއްވަގުތެއްގައެވެ. މި ދެމެޗު ވެސް ކުޅޭނީ ދަންވަރު 00:00 ގައެވެ.
