ފީފާ ވޯލްޑް ކަޕްގައި 2022 ގެ ގުރޫޕް އެފްގައި މިރޭ ކެނަޑާ ބަލިކޮށް ކްރޮއޭޝިޔާއިން ގްރޫޕް އެފްގެ އެއްވަނައަށް ޖެހިލައިފިއެވެ.
ޚަލީފާ އިންޓަނޭޝަނަލް ސްޓޭޑިއަމްގައި ކުޅުނު މި މެޗު ކްރޮއޭޝިޔާއިން ކާމިޔާބުކުރީ ކެނަޑާއިން ލަނޑެއް ޖަހާފައިވަނިކޮށް ފަހަތުން އަރާ 3-1 ގެ ނަތީޖާއިންނެވެ.
މެޗު ފެށިގެން ދެވަނަ މިނެޓުގައި ކެޑާއިން ވަނި ލަނޑު ޖަހާ ލީޑު ނަގާފައެވެ. މި ލަނޑު އެޓީމަށް ޖަހައިދިނީ އަލްފަންސޯ ޑޭވިސްއެވެ.
ނަމަވެސް ފުރަތަމަ ހާފު ނިމުމުގެ ކުރިން ކްރޮއޭޝިޔާއިން ވަނީ ދެލަނޑު ޖަހާ ނަތީޖާ އަނބުރާލާފައެވެ. އަންދްރޭ ކްރަމަރިޗްގެ ލަނޑެއް ޖަހާ ކްރޮއޭޝިޔާއަށް ނަތީޖާ ހަމަހަމަ ކޮށްދިންއިރު އެޓީމަށް ލީޑު ނަގައިދިނީ މާކޯ ލިވާޔާއެވެ. ކްރޮއޭޝިޔާގެ ތިންވަނަ ލަނޑު ދެވަނަ ހާފުގައި ޖަހައިދިނީ ފުރަތަމަ ލަނޑު ޖެހި ކްރަމަރިޗްއެވެ. މެޗުގެ ފަހު ވަގުތުގައި އޯސިޗްގެ އެހީތެރިކަމާއެކު ކްރޮއޭޝިއާގެ ފަހު ލަނޑު ކާމިޔާބު ކޮށްދިނީ ލަވްރޯ މެޔާއެވެ.
މިރޭގެ މެޗުން ކްރޮއޭޝިއާ އަތުން ބަލިވެ ކެނެޑާ މުބާރާތުން ކެޓިއިރު، މި މުބާރާތުގެ މިހާތަނަށް ކުޅުނު ދެމެޗުން ވެސް ކެނެޑާ ވަނީ ބަލިވެފައެވެ. އެ ޓީމު ފުރަތަމަ ކުޅުނު މެޗުން ބަލިވީ ބެލްޖިއަމް އަތުން 0-1 އިންނެވެ.
ގްރޫޕް ތާވަލުގެ އެއްވަނައިގައި ކްރޮއޭޝިޔާ އޮތީ ދެމެޗުން ލިބުނު ހަތަރު ޕޮއިންޓާއެކު ފައިދާ ގޯލުންނެވެ. ދެވަނައިގައި އޮތް މޮރޯކޯއަށްވެސް ލިބެނީ ދެމެޗުން ހަތަރު ޕޮއިންޓެވެ. ތިންވަނައިގައި ތިން ޕޮއިންޓާއެކު ބެލްޖިއަމް އޮތްއިރު ފުލުގައި އޮތް ކެނެޑާއަށް ޕޮއިންޓެއް ނުލިބެއެވެ.
