އައްޑޫސިޓީ ހިތަދޫ، ކެމީ، ހަސަން ލަބީބު، ދިވެހި ބަސް ކިޔަވައި ދެއްވާތާ މިއަހަރު ޖޫންމަހުގެ 13 ވަނަދުވަހު ފަންސާސް އަހަރު ފުރޭނެއެވެ. އޭނާގެ ޚިދުމަތަށާއި، ހިތްވަރަށް ޝުކުރާއި، ސާބަސް ދަންނަވަމެވެ. އަދި ތަހުނިޔާ ދަންނަވަމެވެ.
"ދިވެހިބަސް ކިޔަވައިދިނުމަށް އެންމެ ފުރަތަމަ ކުލާހަކަށް އަޅުގަނޑުވަނީ ނަވާރަސަތެކޭ ފަސްދޮޅަސް އަށްވަނަ އަހަރު ޖޫންމަހު ތޭރަވަނަ ދުވަހު. އެއީ އަލްމަރުޙޫމް ސިއްކަގޭ ދޮންމަނިކުފާނު (އަބްދުލްމަޖީދު ސަލީމް) ހިންގެވި ރަހުބަތު-ދިރާސާ ގެ ތިންވަނަ ކުލާހަށް. އެދުވަހުން ފެށިގެން ކިޔަވައިދިނުމުގެ މަސައްކަތް މެދުކެނޑުމެއްނެތި އަޅުގަނޑުއައީ ކުރަމުން. މި އަހަރަކީ އަޅުގަނޑު ދިވެހިބަސް ކިޔަވައިދޭން ފެށިތާ ފަންސާސް އަހަރުފުރޭ ރަންޔޫބީލް އަހަރު. ވީމާ އަޅުގަނޑަށް ލިބޭ އުފަލުގައި ތިޔަ ހުރިހާ އެކުވެރިންވެސް ހިއްސާކުރާވާހަކަ ދަންނަވަން،" ހަސަން ލަބީބު އޭނާގެ ފޭސްބުކު ޕޭޖުގައި ލިޔުއްވައިފައިވެއެވެ.
އެއީ އޭނާ ދިވެހި ބަސް ކިޔަވައި ދެއްވަން ފެއްޓެވި ހިސާބެވެ. ސާފު ދިވެހި ބަހުން ރީތިކޮށް ވާހަކަ ދެއްކެވުމަށް އޭނާ ވަރަށް ބޮޑަށް ބާރު އަޅުވައެވެ. ބަސް ކިޔަވައި ދެއްވުން އަދިވެސް އޭނާ ހުއްޓައެއް ނުލައްވައެވެ. މިހާރުވެސް ގެންދަވަނީ ގްރޭޑް 3 އިން ފެށިގެން 12 އާ ދެމެދުގެ ދަރިވަރުންނަށް ދިވެހި ބަސް އުގަންނަވައި ދެއްވަމުންނެވެ. އެޑިޔުކޭޝަން މިނިސްޓްރީގައި ރަޖިސްޓްރީކުރައްވައިގެން ގޭގައި ހިންގަވާ "އަދަބީ ހިޔާ" ގައެވެ. އެ ހިޔަލުގެ ހިޔާވަހިކަމުގެ ދަށުން އުނގެނިގެން އެތައްކުދިންނެއް މުޖުތަމައަށް އެދަނީ ނުކުންނަމުނެވެ.
ލަބީބުގެ އުމުރުން މިހާރު ގާތްގަނޑަކަށް 69 އަހަރު ވެއްޖެއެވެ. އަދިވެސް އެހުންނެވީ ޚިދުމަތުގައެވެ. އޭނާގެ ހުރިހާ ވަގުތެއްހެން ހުސްކޮށްފައިވަނީ ބަސް ކިޔަވައި ދެއްވުމަށޭ ދެންނެވުމަކީ ދޮގަކަށް ނުވާނެއެވެ. ބަސް ދިރުވުމުގެ މަސައްކަތްޕުޅުގެ ދަށުން އައްޑޫ ބަހުރުވައަށް އޭނާ އިސްކަމެއް ދެއްވައެވެ. އެބަހާ ބެހޭގޮތުން ބައެއް ނޫސްތަކަށް ލިޔުއްވިއެވެ.
ބަހަށް ކޮށްދެއްވި އަދި ކުރައްވަމުން ގެންދަވާ ޚިދުމަތުގެ އަގު ވަޒަންކޮށް އޭނާއަށްވަނީ އައްޑޫ އެވޯޑުގެ ޝަރަފްވެރި ބައިން ބަހާއި އަދަބަށް ޚިދުމަތް ކުރެއްވުމުގެ، އެވޯޑު ލިބިވަޑައިގެންފައެވެ. އެއީ ލައްކަ ދުވަހުން ލިބިވަޑައިގެންނެވި އެވޯޑެކެވެ.
އެވޯޑު ލިބިވަޑައިގެންނެވުމުން އޭނާއަށް ލިބިވަޑައިގަތީ އިތުރު ހިތްވަރެކެވެ. "މިފަދަ އެވޯޑެއް ބަޔަކު އަޅުގަނޑަށް ދެއްވީމާ އަޅުގަނޑު ހިތަށްއެރީ އެއީ ދެން ކުރިއަށްވުރެ ބޮޑަށް އަޅުގަނޑު މަސައްކަތް ކުރަންޖެހުނީއޭ. ކުރިން ކުރި މަސައްކަތުގެ ޑަބަލް އިތުރުކޮށްލަންވީއޭ،" ލަބީބު ވިދާޅުވިއެވެ. ލަބީބު ދެކެވަޑައިގަންނަވާ ގޮތުގައި އޭނާގެ ޚިދުމަތުގެ އަގު ބަޔަކު ވަޒަންކުރުމަކީ އެ ޚިދުމަތުގައި ދެމިހުންނަންޖެހޭ ސަބަބެކެވެ.
ލަބީބު ހަމައެކަނި ދިވެހިބަސް ކިޔަވައިދެއްވަނީއެއް ނޫނެވެ. އޭނާއަކީ ކުޅަދާނަ އަދީބެކެވެ. މޮޅު ޅެންވެރިއެކެވެ. ކޮންމެ މައުޟޫއަކަށް ފަސޭހަފުޅު ކަމާއެކު ޅެންހެއްދެވުމުގެ ހުނަރު ﷲ ވަނީ އޭނާއަށް މިންވަރު ކޮށްދެއްވައިފައެވެ.
އޭނާ ޅެން ހައްދަވަން ފެއްޓެވީ އުމުރުން އެންމެ 16 އަހަރުގައެވެ. އެއީ އޭނާގެ ބޮޑު ބޭބެ (އަބްދުﷲ އަލީ) ކޮންމެވެސް ކަމަކާހެދި ގޭ ބަންދުކޮށްފައި ހުންނެވި ދުވަސްވަރެކެވެ. އެދުވަސްވަރު އަބްދުﷲ އަލީ އާއި އޭނާގެ އެހެން ރައްޓެއްސަކާ ދެމީހުން ގައުމީ ޅެން ވަރަށް ފޯރީގައި ހައްދަވަމުން ގެންދެވިތަން ލަބީބަށް ކޮންމެ ދުވަހަކުހެން ފެނިވަޑައިގަންނަވައެވެ. އެހިސާބުން ޅެންވެރި ކަމުގެ ތެރެއަށް އޭނާގެ ހިތް ދަމައި ގެންގޮސްފިއެވެ.
ޅެންވެރިކަމުގެ ވާދީގެ ތެރެއަށް އޭނާ ނުކުންނެވީ "ރަމަޟާން މުބާރިކް" ޅެމުންނެވެ. އެއިން އެތައް ކުށެއް އޭނާގެ ބޮޑުބޭބެ ރަނގަޅު ކޮށްދެއްވިއެވެ. އެ އިސްލާހުތަކާއެކު ލަބީބުގެ ޅެންވެރިކަމުގެ ޚިޔާލާތަށް ކާނާލިބި މަޑުމަޑުން ހެދެން ފެށިއެވެ. އޭނާގެ ޅެންވެރިކަމުގެ ގުލްޒާރުގައި ތާފާތު މާތައް ފަރިވެ ފޮޅެން ފެށިއެވެ. އޭގެ ހިތްގައިމު މީރުވަސް ވައިރޯޅިއާއެކު އަޅުގަނޑުމެންނާ ހަމައަށް އަންނަން ފެށިއެވެ. ލަބީބު ދުނިޔޭގައި ހުންނެވިހާ ދުވަހަކު އެގުލްޒާރުން ލިބިދޭ މީރުވަހަށް ނިމުމެއްނެތެވެ.
އޭނާވަނީ މިހާތަނަށް 190 އަށްވުރެ ގިނަ މީހުންނަށް ޅެން ހަދަން ދަސްކޮށްދެއްވައިފައެވެ. އެއީ ފާހަގަކޮށްލަންޖެހޭ މުހިންމު ޚިދުމަތެކެވެ. އައްޑޫގައި މަސައްކަތްކުރާ ޅެންވެރިންގެ މެދުގައި ރޫހު އުފައްދައި އިތުރު ޅެންވެރިން މުޖުތަމައަށް ނެރުމަށް އޭނާ ވައިބަރު ގޫރުޕެއްވެސް ހިންގެވިއެވެ.
އަދުގެ މުޖުތަމައު އެދިގޮވަނީ ލަބީބުފަދަ ޚިދުމަތްތެރިންނަށެވެ. ކުށްބަސް ބޭނުންކުރުން މުޖުތަމައުގައި އާންމުވެފައިވާ މިފަދަ ދުވަސްވަރެއްގައި ލަބީބު ފަދަ ބޭފުޅުންގެ އިރުޝާދާއި ޚިދުމަތް އިންތިހާއަށް އެބަބޭނުންވެއެވެ. ލަބީބު އެހުންނެވީ ޚިދުމަތްކޮށްދެއްވަން ތައްޔާރަށެވެ. އިތުރު 50 އަހަރަށް ޚިދުމަތްކޮށްދެއްވަންވެސް އޭނާ ތައްޔާރެވެ.
………
އަލްޙަމްދު ލިއްލާހި.. ލަބީބަށް ދިގުއުމުރުފުޅެއް މިންވަރު ކުރައްވައި ޚިދުމަތުގައި ލަހައްޓަވާށިއެވެ.