ފީފާ ވޯލްޑް ކަޕް 2022 ގެ ގްރޫޕް ޑީ ގައި މިރޭ ޑެންމާކާއި ޓިއުނީޝިއާ ބައްދަލުކުރި މެޗު ލަނޑެއް ނުޖެހި އެއްވަރުވެގެން ނިމިއްޖެއެވެ.
އެޑިއުކޭޝަން ސިޓީ ސްޓޭޑިއަމުގައި ކުޅުނު މި މެޗުގައި ދެ ޓީމުގެ ފަރާތުންވެސް ފެނުނީ ދާދި ހަމަހަމަ ކުޅުމެކެވެ. ނަމަވެސް މި މެޗަށް ނިކުތްއިރު، ޑެންމާކްގެ ފަރާތުން ރަނގަޅު ކުޅުމެއް ފެނިގެން ދާނެ ކަމަށް ވަރަށް ބޮޑަށް ބެލެވުނެވެ. އެހެނަސް ފުރަތަމަ ހާފުގައި ރަނގަޅަށް ކުޅެ ލަނޑު ޖެހުމަށް ގިނަ ފުރުސަތު ތަނަވަސް ކުރީ ޓިއުނީސިއާއިންނެވެ.
އެގޮތުން ޓިއުނީޝިއާގެ ޑްރެގާ އާއި ލައުޑިނީ އަދި ޖެބަލީއަށް ލިބުނު ފުރުސަތުތައް ފާހަގަކޮށްލެވެއެވެ. ނަމަވެސް މި ފުރުސަތުތަކުގެ ބޭނުން ނުހިފުނެވެ. ޑެންމާކަށް މި ހާފުގައި މާ ރަނގަޅު ފުރުސަތުތަކެއް ތަނަވަސް ކުރެވިފައެއް ނުވެއެވެ.
ދެ ވަނަ ހާފުގައި ޑެންމާކުން ކުޅުން ރަނގަޅުކޮށް އެޓޭކްތައް ވަރުގަދަކުރި އިރު، ޑެންމާކު ޓީމުގެ ކެޕްޓަން ކްރިސްޓިއަން އެރިކްސަން އޭރިޔާގެ ބޭރުން ފޮނުވާލި ބާރު ހަމަލާ ފާހަގަކޮށްލެވެއެވެ. ނަމަވެސް އެ ހަމަލާގެ ހުރަކަށް ވީ ޓިއުނީޝިއާގެ ގޯލްކީޕަރެވެ. ޑެންމާކުން ފޮނުވާލި ބާރު ހަމަލާއެއް ޓިއުނީސިއާ ގޯލުގެ އަރިމަތީ ދަނޑިއަށްވެސް ވަނީ އަމާޒުވެފައެވެ.
މެޗުގެ ފަހު ވަގުތު ކޮޅުގެ ތެރޭގައި ޑެންމާކުން ކުރިޔަށް ޖެހި އެޓޭކުތައް ވަރުގަދަ ކުރިނަމަވެސް އެޓީމަށް ޓިއުނީސިއާގެ ގޯލު ފޫ އަޅުވާ ލެވޭގޮތެއް ނުވިއެވެ.
