ގަތަރު ފީފާ ވޯލްޑް ކަޕް 2022 ގެ ގުރޫޕް ސްޓޭޖުގެ މެޗުތަކުގެ ކުޅުން ރޭ ފެށިފައިވާއިރު، މި މުބާރާތުގެ ދެވަނަ މެޗުގައި މިރޭ ބައްދަލުކުރާނީ އޭސިއާގެ ގަދަ ބާރު އިރާނާއި ޔޫރަޕްގެ ގަދަ ބާރު އިންގްލެންޑެވެ.
މި ދެޓީމު މިރޭގެ މެޗަށް ނިކުންނައިރު، މީގެ ކުރިން ވާދަވެރި މެޗެއްގައި މި ދެ ޓީމު ބައްދަލުކޮށްފައެއް ނުވެއެވެ. މިއީ މި ދެޓީމުގެ ފުރަތަމަ ކުރިމަތިލުމެވެ.
އީރާން
އީރާން ވަނީ މީގެ ކުރިން ފަސް ފަހަރު ވޯލްޑް ކަޕުގައި ވާދަކޮށްފައެވެ. ނަމަވެސް އެޓީމަށް މި މުބާރާތުގެ ގުރޫޕް ސްޓޭޖު ފަހަނައަޅާ ދެވަނަ ބުރާއި ހަމައަށް ވެސް ދެވިފައެއް ނުވެއެވެ. ނަމަވެސް އެ ޓީމުން ވަނީ 14 އޭޝިއަން ކަޕެއްގައި ކުޅެ ތިން ފަހަރު މި މުބާރާތް ކާމިޔާބު ކޮށްފައެވެ. މީގެ އިތުރުން އެ ޓީމުން ވަނީ ތިން ފަހަރެއްގެ މަތިން އޭސިއަން ގޭމްސް ކާމިޔާބުކޮށްފައެވެ.
ވޯލްޑް ކަޕުގެ ކުރިން މި މުބާރާތަށް ތައްޔާރުވުމަށް އިރާނޫން ވަނީ އެކުވެރިކަމުގެ ފަސް މެޗެއް ކުޅެފައެވެ. އެއީ އުރުގުއޭ، ޓިއުނީސިއާ، ސެނެގާލް އަލްޖީރިއާ އަދި ނިކަރަގުއޭ އާއި ދެކޮޅަށެވެ. އޭގެ ތެރެއިން ސެނެގާލް އާއި ދެކޮޅަށް ކުޅުނު މެޗު 1-1 އިން އެއްވަރުވިއިރު، އުރުގުއޭއާއި ނިކަރަގުއޭ އާއި ދެކޮޅަށް ކުޅުނު މެޗުން މޮޅުވިއެވެ. ނަމަވެސް ޓިއުނީސިއާ އަދި އަލްޖީރިއާއާއި ދެކޮޅަށް ކުޅުނު މެޗުން ވީ ބައްޔެވެ.
ކުޅުންތެރިން
އީރާން ޓީމުގެ ކުޅުންތެރިންނަށް ބަލާއިރު، މިރޭގެ މެޗަށް ނިކުންނައިރު، އެޓީމަށް ލިބޭނޭ އެންމެ ބޮޑު ހިތްހަމަ ޖެހުމަކީ ޔޫރަޕުގެ ބޮޑެތި ކުލަބުތަކަށް ކުޅެމުން އަންނަ އަދި ކުޅެ ތަޖުރިބާ ލިބިފައިވާ ކުޅުންތެރިން ޓީމުގައި ތިބުމެވެ.
އެގޮތުން ގްރީސްގެ އޭއީކޭ އެތެންސް އަށް ކުޅެމުން އަންނަ އިހުސާން ހަޖްސާފީއާއި މީގެ ކުރިން ސްޕެނިޝް ލީގުގެ އޮސަސޫނާއާއި ގްރީކުގެ އޮލިމްޕިއާކޯސް، އިނގިރޭސި ޕްރިމިއާ ލީގުގެ ނޮޓިންހަމް ފޮރެންސްޓް ފަދަ ކުލަބުތަކަށް ކުޅެފައިވާ ކަރީމް އަންސަރީފާރު އާއި ޕޯޗުގަލްގެ ޕޯޓޯއަށް ކުޅެމުން އަންނަ މެހްދީ ޓަރެމީ އަކީ ފާހަގަކޮށްލެވޭ ކުޅުންތެރިންނެވެ.
އިންގްލެންޑް
އިންގްލެންޑަކީ ޔޫރަޕް ފުޓްބޯޅައިގަވެސް އަދި ދުނިޔޭގެ ފުޓްބޯޅައިގަވެސް ނަން މަޝްޙޫރު ވަރުގަދަ ބާރެކެވެ. އެގައުމުން ވަނީ މީގެ ކުރިން 15 ވޯލްޑް ކަޕެއްގައި ކުޅެ މުބާރާތުގެ ތަށި އެއް ފަހަރު ހޯދާފައެވެ. އެއީ 1966 ވަނަ އަހަރު އަމިއްލަ ގައުމުގައި ބޭއްވި މުބާރާތުގައެވެ. މި މުބާރާތައް ފަހު އިންގްލެންޑުން މިހާތަނަށް ކުޅުނު އެއް ވެސް ވޯލްޑް ކަޕެއްގައި ސެމީ ފައިނަލަށް ވުރެ ދުރައް ދެވިފައެއްނުވެއެވެ.
މިފަހަރުގެ ވޯލްޑް ކަޕްގެ ކުރިން އިންގްލެންޑް އެންމެ ފަހުން ކުޅެފައިވަނީ ޔޫއެފާ ނޭޝަންސް ލިގުގެ މެޗުތަކެވެ. އެގޮތުން އެންމެ ފަހުން ކުޅުނު ފަސް މެޗުގެ ނަތީޖާއަށް ބަލާއިރު، ނަތީޖާތައް ރަނގަޅެއް ނޫނެވެ. އެގޮތުން އެޓީމުން އެންމެ ފަހުން ކުޅުނު ފަސްގެ ތެރެއިން އެއްވެސް މެޗަކުން މޮޅުވެފައެއް ނުވެއެވެ. ހަތަރު މެޗުން އެއްވަރުވިއިރު، ހަންގޭރީ އަތުން ވަނީ ބޮޑު ފަތާތަކުން ބަލިވެފައެވެ.
ކުޅުންތެރިން
އިންގްލެންޑް ޓީމަކީ ހުނަރުވެރި ތަރިންގެ ޓީމެކެވެ. އިންގްލެންޑުގެ ލީގަކީ ދުނިޔޭގެ ނަމްބަރ ވަން ލީގަށް ވާއިރު، އިންގްލެންޑުގައި ތިބީ ހުސް މި ލީގުގައި ކުޅޭ ކުޅުންތެރިންނެވެ. ފާހަގަކޮށްލެވޭ މޮޅު ކުޅުންތެރިންނަށް ބަލާއިރު، ހެރީ ކޭން، މާކްސް ރަޝްފޯޑް، ފޯޑެން، ރަހީމް ސްޓާލިން، ބެލިންގަމް ފަދަ ކުޅުންތެރިން ހިމެނެއެވެ.
މިރޭގެ މެޗަށް ދެ ޓީމުން ވެސް ބެރޭނެ ކަމަށް ބެލެވޭ ފުރަތަމަ އެގާރަ ކުޅުންތެރިން
އީރާން: ބެއިރަންވަންދު، މުހައްރަމީ، ކަނާނީ، ހުސެއިނީ، ހަޖުސާފީ، ޢިޒަތުﷲ، ޣޯލިޒާދޭ، ނޫރުالله، ޖަހަންބަޚްޝް، ތަރެމީ، އަންސާރިފަރު.
އިންގްލެންޑް: ޕިކްފޯޑް، ސްޓޯންސް، އެރިކް ޑަޔާރ، ހެރީ މަގުއާ، ލުކް ޝޯ، ރައިސް، ބެލިންހަމް، ޓްރިޕިއަރ، ސްޓަރލިން، ފޯޑެން، ހެރީ ކޭން.
ގުރޫޕު ބީގައި ހިމެނޭ އިންގްލެންޑް އަދި އީރާން ބައްދަލުކުރާ މި މެޗު ފެށުމަށް ހަމަޖެހިފައިވަނީ މިރޭ ރާއްޖޭ ގަޑިން 6:00 ގައެވެ.
