ކުރީގެ މަޝްހޫރު ފިލްމީ ތަރި މަރިޔަމް ނިޝާ އެމްޑީޕީ އަށް ސޮއި ކޮށްފި އެވެ.
އޭނާ އެމްޑީޕީ އާ ގުޅުނުކަން ހާމަކުރީ އެމްޑީޕީގެ ޑެޕިއުޓީ ޗެއާޕާސަން އިބްރާހީމް ވަހީދު (އިބުރޭ)، ނިޝާގެ ފޯމާ ހަވާލުވާ ފޮޓޯއަކާ އެކީ ކުރެއްވި ޓްވީޓެއްގަ އެވެ.
އެ ޓްވީޓުގައި އިބުރޭ ވަނީ ނިޝާ އަށް މަރުހަބާ ވިދާޅުވެފަ އެވެ.
މަރިޔަމް ނިޝާ، އެމްޑީޕީ އަށް ސޮއިކޮށްފައި މިވަނީ ޖުމްހޫރީ ޕާޓީގައި ހުރުމަށް ފަހުއެވެ. އޭނާ ޖޭޕީ އާ ގުޅުނީ މިދިޔަ ސެޕްޓެމްބަރު މަހުގެ 18 ގަ އެވެ.
1990 ވަނަ އަހަރުގެ ކުރީކޮޅު ދިވެހި ފިލްމީ ދާއިރާ އަށް ވަން މަރިޔަމް ނިޝާ އަކީ ރާއްޖޭގައި މިހާތަނަށް އުފެދުނު އެންމެ ހުނަވެރި ބަތަލާއިންގެ ތެރޭގައި ހިމެނޭ ފަރާތެކެވެ.
ލަވައާއި ފިލްމުތަކުން ގިނަމީހުންގެ ތަރުހީބު ލިބިފައިވާ ނިޝާ ކުޅެފައިވާ ފިލްމުތަކުގެ ތެރޭގައި "ހައްގު"، "ލޯބީގެ އަނިޔާ"، "ގުރުބާނީ"، "ހިމޭން ދުނިޔެ"، "ނާއުންމީދު" ހިމެނެ އެވެ.
މީގެ އިތުރުން "ޒުލޭހާ"، "ފަހު ނޭވާ"، "ގިނިހިލަ" އަދި "އެދި އެދި ހޯދީމޭ" ފަދަ ފިލްމުތަކަކީ އޭނާގެ ހުނަރުވެރިކަން ދައްކާލާފައިވާ ފިލްމުތަކެވެ.
އޭނާގެ އެންމެ ފަހުގެ ފީޗާ ފިލްމަކީ 2011 ގެ "14 ވިލޭރޭ" އެވެ.
