ރާއްޖެއަށް ކުރިމަތިވާނެ އެންމެ ބޮޑު ގޮންޖެހުމަކީ ބައިނަލްއަގުވާމީ ދުނިޔޭން ފައިސާ ހޯދުން ކަމަށް އިންޓަނޭޝަނަލް މަނިޓަރީ ފަންޑް (އައިއެމްއެފް)ގެ ވަފުދުން ބުނެފިއެވެ.
ރާއްޖޭގެ އިގުތިސޯދީ ކަންކަމާބެހޭގޮތުން މަޝްވާރަ ކުރުމަށް ރައްޔިތުންގެ މަޖިލީހުގެ މާލިއްޔަތު ކޮމިޓީ އާއި އިގުތިސޯދީ ކޮމިޓީއާ އެކު ބޭއްވި ބައްދަލުވުމުގައި އެ ވަފުދުން ބުނީ ރާއްޖޭގެ އުފެއްދުންތެރިކަން ނުވަތަ ޖީޑީޕީ 10-9 ޕަސެންޓް ކުރިއަރާނެ ކަމަށެވެ.
އެއީ ރާއްޖޭގެ ޓޫރިޒަމްގެ ފޯކަސް ރަޝިޔާ ނޫން މާކެޓްތަކަށް އަނބުރާލާފައިވުމާއި ޔޫކްރެއިން ހަނގުރާމައިގެ ސަބަބުން ޓޫރިސްޓުން ރާއްޖެ އަންނަ އަދަދަަށް މާ ބޮޑު އަސަރެއް ނުކުރުމުން ކަމަށް އެ ވަފުދުން ވަނީ ފާހަގަކޮށްފައެވެ.
އެ ވަފުދުން އިތުރަށް ބުނީ އެހެން ގައުމުތަކާ އަޅައި ބަލާއިރު ރާއްޖޭގައި ތަކެތީގެ އަގުތައް ބޮޑުވުން ނުވަތަ އިންފްލޭޝަން ރާއްޖޭގައި ހުރީ ހިފެހެއްޓިފައިވާ ކަމަށާއި އެއީ ތަކެތީގެ އަގުތައް ހިފަހައްޓަން ދޭ ސަބްސިޑީތަކުގެ ސަބަބުން ކަމަށްވެސް ވިދާޅުވިއެވެ.
އެހެންނަމަވެސް ކުރިއަށް އޮތް ދުވަސްތަކަކީ އުނދަގޫ ދުވަސްތަކެއް ކަމަށާއި އެގޮތުން ޔޫރަޕްގެ އިގުތިސޯދުތަކަށް އަންނަ ހީނަރުކަމާއި ޗައިނާގެ ކުރިއެރުން މަޑުޖެހުން ފަދަ ކަންކަމުގެ ސަބަބުން އަންނަ އަހަރު ދުނިޔޭގެ އިގުތިސޯދު ފެންނަނީ ބަނަކޮށް ކަމަށް ވަނީ ފާހަގަކޮށްފައެވެ. އެހެންކަމުން ރާއްޖެ ފަދަ ކުރިއަރަމުން އަންނަ ގައުމުތަކަށް ވެސް ގޮންޖެހުންތައް ކުރިމަތިވާނެ ކަމަށް ފާހަގަކޮށް އެ ވަފުދުން ވަނީ ރާއްޖެއަށް ކުރިމަތިވާނެ އެންމެ ބޮޑު ގޮންޖެހުމެއްގެ ގޮތުގައި ބައިނަލްއަގުވާމީ ދުނިޔޭން ފައިސާ ހޯދުން ކަމަށެވެ. އެއީ ދުނިޔޭގެ އިގުތިސޯދަށް ކުރިމަތިވާ ކަންތައްތަކުގެ ސަބަބުން އިންޓްރެސްޓް ރޭޓުތައް ބޮޑުވުމުން ކަމަަށް ވެސް ބުންޏެވެ.
އެ މައްސަލައިގައި ރާއްޖެއަށް ކުރެވެން އޮތީ ހަމައެކަނި ކަމަކީ ޚަރަދު ކުޑަކުރުމާއި އާމްދަނީ އިތުރު ކުރެވޭނޭ ފިޔަވަޅުތައް އެޅުން ކަމަށް ވެސް އައިއެމްއެފް އިން ބުނެފައި ވެއެވެ.
