ކުރީގެ ނައިބް ރައީސް އަހްމަދު އަދީބް، އެންޓި ކޮރަޕްޝަން ކޮމިޝަން (އޭސީސީ) އަށް ހާޒިރުކޮށް ސުވާލު ކޮށްފިއެވެ.
އަދީބު، އިއްޔެގެ ވަގުތެއްގައި އޭސީސީއަށް ހާޒިރުކޮށް ސުވާލުކުރިނަމަވެސް އޭސީސީން މިކަމާއިގުޅިގެން އަދިވަކިއެއްޗެއް ހާމައެއް ނުކުރެއެވެ.
ޓޫރިޒަމް މިނިސްޓަރުކަން ވެސް ކުރައްވާފައިވާ އަދީބު، އޭސީސީއަށް ހާޒިރުކޮށް ސުވާލުކޮށްފައި މިވަނީ އެންމެ ބޮޑު އިސްކަމެއް ދެނީ އެމްއެމްޕީއާރްސީގެ ޚިޔާނާތުގެ ތެރެއިން ގެއްލުވާލާފައި (ވަގަށް ނަގާފައި) ވާ ފައިސާ އަނބުރާ ހޯދައިދިނުން ކަމަށް އެކޮމިޝަނުން ބުނެފައިވާ ދަނޑިވަޅެއްގައެވެ. އަދި އެ ޚިޔާނާތުގެ މައްސަލައިގެ ޝަރީޢަތް ހިނގަމުންދާ ދުވަސްވަރެއްގައެވެ.
އެމްއެމްޕީއާރްސީގެ ޚިޔާނާތުގެ މައްސަލާގައި އަދީބަށް އެންމެ ފުރަތަމަ ތިރީހަށް ވުރެ ގިނަ ދައުވާ ކުރިނަމަވެސް، ފަހުން އެ ދައުވާތައް އަނބުރާ ގެންގޮސް އެ މައްސަލައިގައި އަދީބުގެ މައްޗަށް ދައުލަތުން ކޮށްފައިވަނީ ހަތް ދައުވާއެވެ. އެ ހަތް ދައުވާއަށް، 20 އަހަރަށް ޖަލަށްލައި، 2 މިލިއަން ރުފިޔާއިން ޖޫރިމަނާ ކުރުމަށް ކްރިމިނަލް ކޯޓުން ހުކުމް ކުރިނަމަވެސް އަދީބު މިހާރު ހުންނެވީ ގޭ ބަންދުގައެވެ.
އަދީބު ވަނީ ދައުވާ އަށް އެއްބަސްވުމުގެ އިތުރުން އެކަމަށް ރައްޔިތުންގެ ކިބައިން މާފަށް އެދިވަޑައިގެން، ކުރެވުނު ކުށްތަކަށް ތައުބާވެފައިވާ ކަމަށް ވެސް ވިދާޅުވެފައެވެ.
އެމްއެމްޕީއާރުސީ ޚިޔާނާތުގައި 37 ރަށަކާއި 12 ފަޅެއް ގާނޫނީ އިމުން ބޭރުން އެކި ފަރާތްތަކަށް ދޫކޮށްފައި ވާއިރު ދައުލަތަށް ލިބެންޖެހޭ ތިން ބިލިއަނެއްހާ ރުފިޔާ ނުލިބި އޮތް ކަމަށް ދައުލަތުގެ ކަމާ ގުޅޭ އިދާރާތަކުން ވަނީ ލަފާކޮށްފައެވެ.
