އެމްޓީސީސީން މާލޭގައި މިނީ ބަހުގެ ޚިދުމަތް ދޭން ފަށައިފިއެވެ.
މިނީ ބަހުގެ ޚިދުމަތް ފުރަތަމަ ދެ ހަފުތާގައި ހިލޭ ދޭއިރު، އޭގެ ފަހުން މިނީ ބަހުން ދަތުރުކުރާ ކޮންމެ މީހެއްގެ އަތުން ނެގުމަށް ނިންމާފައިވަނީ ހަތް ރުފިޔާއެވެ.
އެހެންނަމަވެސް ސްކޫލް ކުދިންނަށާއި ތިން އަހަރުން ދަށުގެ ކުޑަކުދިންނާއި މުސްކުޅިންނަށް ހިލޭ ދަތުރު ކުރެވޭނެއެވެ.
އެމްޓީސީސީން ބުނެފައިވަނީ މިނީ ބަހުގެ ޚިދުމަތް ފަތިހު 5:45 އިން ދަންވަރު 12:15 އަށް ލިބޭނެކަމަށެވެ. އަދި ކޮންމެ 10 މިނެޓަކުން ކޮންމެ ބަސް ސްޓޮޕަކަށް ބަހެއް އަންނާނެ ކަމަށެވެ. އަދި ފުރޮޅުލީ ގޮނޑީގައި އުޅޭ މީހުންނަށް ޚާއްސަ ޖާގަތައް މިނީ ބަހުގައި ވަނީ ހިމަނާފައެވެ.
މިނީ ބަސްތައް ދެ ރޫޓަކުން ދަތުރުކުރުމަށް ވަނީ ނިންމާފައެވެ. އެއީ ހެންވޭރު ސްޓޭޑިއަމުން ފެށިގެން ބީޗް ވޮލީ ކޯޓަށާއި މާފަންނު ވެސްޓްޕާކުން އޯކިޑްމަގުގައި ހުންނަ ސަންފްރަންޓް ލައިޓް ޝޮޕަށެވެ.
މައިގަނޑު ގޮތެއްގައި މިނީ ބަސް ދަތުރުކުރާނީ މަޖީދީމަގާއި އަމީނީމަގުގައެވެ. އަދި އޯކިޑުމަގު ގައި ވެސް މިނީ ބަސް ދަތުރު ކުރާނެއެވެ.
އެހެންވެ، މަޖީދީމަގާއި އަމީނީމަގުގައި ޕާކްކުރުން މަނާކޮށް، ސިޓީ ކައުންސިލުން ދަނީ ޕާކިންގ ޒޯންތައް ގާއިމްކޮށް، މަގުމަތީގެ ނިޝާންތަކުގެ ކުލަ އާކޮށް، ޓްރެފިކް ބޯޑު ހަރުކުރުމުގެ މަސައްކަތް ކުރަމުންނެވެ.
މާލޭގައި މިނީ ބަހުގެ ޚިދުމަތް ދިނުމަށް 20 މީހުންގެ ޖާގައިގެ 18 ބަސް ބޭނުންކުރާއިރު، އޭގެ ތެރޭގައި ހިމެނެނީ އާދައިގެ 12 މިނީ ބަހާއި ހަ އީވީ މިނީ ބަހެވެ.
މާލޭގެ އިތުރުން ލ. ގަން، ފުނަދޫ، އިސްދޫ ކަލައިދޫ އަދި އައްޑުއާއި ފުވައްމުލައް ސިޓީ ގައިވެސް މިނީ ބަހުގެ ޚިދުމަތް ދިނުމަށް ވަނީ ނިންމާފައެވެ.
