މއ. ހައިވަކަރުގޭ އަހްމަދު ޔޫސުފް (ހައިވަކަރު އަހުމަދުފުޅު) އަވަހާރަވެއްޖެއެވެ.
ދިވެހި ދައުލަތަށް ގިނަ ދުވަހު ޚިދުމަތް ކުރައްވާފައިވާ އަހްމަދުފުޅު އަވަހާރަވީ ގިނަ ދުވަސްތަކަކު އާލާސްކަންފުޅާ އުޅުއްވުމަށްފަހު ރޭ ފަތިހުގެ ވަގުތެއްގައެވެ.
ކުޅިވަރު ކުޅުއްވައި ކުޅިވަރުގެ ދާއިރާ ތަރައްގީކުރެއްވުމަށް ވެސް މުހިންމު މަސައްކަތްތަކެއް ކުރައްވާފައިވާ މަރްހޫމް ހައިވަކަރު އަހްމަދު ފުޅަކީ ރާއްޖޭގެ ފުރަތަމަ ރައީސުލްޖުމްހޫރިއްޔާ މުހައްމަދު އަމީންގެ ވެރިކަމުގައި ފުރަތަމަ ފަހަރަށް ފުޓްބޯޅައިގެ ތަމްރީން ދިނުމަށް މަޖީދިއްޔާ ސްކޫލުން ނެގި 24 ކުދިންގެ ތެރެއިން ގޯލްކީޕަރަކަށް ނެގި ދަރިވަރެވެ.
ދިވެހި ދައުލަތަށް ކުރައްވާފައިވާ ޚިދުމަތްތަކުގެ ތެރެއިން އެންމެ ގިނަ ދުވަހު މަސައްކަތް ކުރެއްވީ ސިފައިންގޭގައެވެ.
އެގޮތުން 25 އަހަރު ސިފައިންގޭގެ ޚިދުމަތުގައި އުޅުއްވުމަށްފަހު ކެޕްޓަން ރޭންކުގައި، ވަޒީފާއިން ވަކިވެވަޑައިގަތީ 1978 ވަނަ އަހަރު ދިވެހި ސަރުކާރުން އޭނާގެ ޚިދުމަތް އެހެން ދާއިރާއަކުން ބޭނުންފުޅުވުމުންނެވެ.
ޅ. އަތޮޅާއި މ. އަތޮޅާއި އައްޑު އަތޮޅުގެ އަތޮޅުވެރިކަން ވެސް ކުރައްވާފައިވާއިރު، ދައުލަތުގެ އެކި އިދާރާތަކުގައި އިސް މަގާމުތަކެއް އޭނާ ވަނީ ފުރުއްވާފައެވެ.
މަޖީދިއްޔާ ސްކޫލުން ތަޢުލީމު ހާސިލުކުރައްވާފައިވާ ހައިވަކަރު އަޙުމަދު ފުޅަކީ ސަރުކާރުގެ ވަޒީފާ އަދާކުރެއްވުމުގައި ގަވާޢިދާ އެއްގޮތްވާގޮތުގެ މަތީން، އިޚްލާޞްތެރިކަމާއެކު، މުއައްޒިފުންނާއި ގުޅިވަޑައިގެން، ސަރުކާރުގެ ކަންތައްތައް ރަގަޅުކުރެއްވުމަށް މަސައްކަތްކުރައްވާފައިވާ ޚިދުމަތްތެރި އެކެވެ.
ހައިވަކަރު އަހްމަދު ފުޅު ހޮބީއެއްގެ ގޮތުން ޓީވީ ބެލުމާއި، ރޭޑިޔޯ އަޑުއެހުމާއި ނޫސް މަޖައްލާ ވިދާޅުވާއިރު، ޚާއްސަކޮށް ފުޓްބޯޅަ އަށް ވަރަށް ބޮޑަށް ލޯބިކުރައްވާ ބޭފުޅެކެވެ.
އަޙްމަދު ފުޅުގެ ބައެއް ބޭފުޅުންނަކީ ވެސް އާންމުންގެ މެދުގައި މަގުބޫލު، ގަދަރުވެރި ބޭފުޅުންނެވެ. އެގޮތުން ސްޕޯޓްސް ކޯޕަރޭޝަންގެ މެނޭޖިންގ ޑިރެކްޓަރުގެ މަގާމު މިހާރުއަދާކުރައްވަމުން ގެންދަވ ރާއްޖޭގެ މަޝްހޫރު ކުޅިވަރު ޝަޚުސިއްޔަތު އަހްމަދު މައުރޫފް (މާއްޓެ) އާއި މުނިފޫހި ފުލުވުމުގެ ދާއިރާގައި ހަރަކާތްތެރިވާ އަދި ސްކްރިޕްޓް ލިޔުމުގައި އެފަދަ ދެވަނައެއް ނެތް މަހްދީ އަހްމަދާއި ދިގު ދުވުންތަކާއި ތަޢުލީމީ ދާއިރާގައި ފުންނާބު އުސް, ގައުމީ ޔުނިވަރސިޓީގެ ޑީން އޮފް ސްޓޫޑަންޓްސް ލީލާ އަހްމަދާއި ފިޓްނަސް ދާއިރާގެ ތަޖުރިބާކާރު މުހައްމަދު މިސްޠާހް (މިސްތޯ) ފާހަގަކޮށްލެވެއެވެ. އަދި ތޫމާ އަހްމަދަކީ ވެސް ދިގު ދުވުންތަކުގައި ފާހަގަކޮށްލެވޭ ފަރާތެކެވެ.
މަރްހޫމް ހައިވަކަރު އަހްމަދު ފުޅުގެ ކަށުނަމާދު އޮތީ މިއަދު ޢަޞުރު ނަމާދަށް ފަހު މަސްޖިދު ތަޢާވުން (މާލޭ އާސަހަރާ) ގައެވެ.
