މިނިސްޓަރ އޮފް ފިޝަރީޒް، މެރިން ރިސޯސަސް އެންޑް އެގްރިކަލްޗަރ ޑރ. ހުސައިން ރަޝީދު ހަސަން ރައްޔިތުންގެ މަޖިލީހަށް މާދަމާ ހާޒިރުކުރަން އެޖެންޑާކޮށްފިއެވެ.
މިނިސްޓަރ މަޖިލީހަށް ހާޒިރު ކުރަނީ ހއ. ދިއްދޫގައި އައިސް ޕްލާންޓް ގާއިމް ކުރުމުގެ މަސައްކަތް އޮޅުންފިލުވުމަށެވެ.
ދިއްދޫ ދާއިރާގެ މެންބަރު އަބްދު الله ވަހީދު ސުވާލު ކުރައްވަނީ ހއ. ދިއްދޫގައި އައިސް ޕްލާންޓެއް ގާއިމްކޮށްދެއްވުމަށް ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު ވައުދުވެވަޑައިގެންފައިވާ ކަމަށާއި އެއާއި އެއްގޮތަށް، 2021 ސެޕްޓެންބަރު އަށްވަނަ ދުވަހު، ސައޫދީ ފަންޑުގެ އެހީގައި ހއ. ދިއްދޫގައި 25 ޓަނުގެ އައިސް ޕްލާންޓެއް ގާއިމްކުރުމުގެ މަސައްކަތް، މިނިސްޓްރީ އޮފް ފިނޭންސްގެ ފަރާތުން އިއުލާން ކޮށްފައިވާ ކަމަށެވެ.
އެހެންނަމަވެސް އޭގެ ފަހުން އެކަމުގެ އެއްވެސް މައުލޫމާތެއް ނުލިބޭ ކަމަށާއި އެހެންކަމުން މިހާރު އެ މަސައްކަތް ގޮސްފައިވާ ހިސާބެއް އޮޅުން ފިލުވުމަށް މެމްބަރު ވަނީ ސުވާލު ކުރައްވާފައެވެ. އަދި އައިސް ޕްލާންޓް ގާއިމްކުރުމުގެ އަމަލީ މަސައްކަތް ފެށި، އޭގެ ޚިދުމަތް ރައްޔިތުންނަށް ލިބިގެންދާނެ ކަމަށް ލަފާކުރާ ތާރީޚެއް އޮޅުންފިލުވުމަށް ވެސް މެމްބަރު ޢަބްދުﷲ ވަހީދު ވަނީ ސުވާލު ކުރައްވާފައެވެ.
