ބަރެޒިލްގެ ފަރުބަދަ މަތީ ރަށެއް ކަމަށްވާ ޕެޓްރޮޕޮލިސްއަށް ބޯކޮށް ވާރޭ ވެހި، ފެންބޮޑުވެ، ބިންގަނޑު ކަނޑައިގެން ދިއުމުގެ ސަބަބުން މަރުވި މީހުންގެ އަދަދު 105 އަށް އަރާފައިވާ ކަމުގަައި ރިއޯޑިޖެނީރޯ ސްޓޭޓުގެ ސަރުކާރުން ބުނެފިއެެވެ. މަރުވި މީހުން އާއިލާތަކުން އެމީހުން ވަޅުލުމަށް ތައްޔާރުވަމުން ދާއިރު، ބިންގަނޑު ކަނޑަައިގެން ފޭބި ފަސްގަނޑުގެ ތެރޭގައި މަރުވެފައި ތިބީ ކިތައް މީހުން ކަމެއް އެއްވެސް ބަޔަކަށް އަދި ނޭނގެއެވެ.
މީހުން ހޯދައި ސަލާމަތްކުރުމުގެ މަސައްކަތްކުރުމުގެ މަސައްކަތް އަދިވެސް ކުރިއަށް ދާތީ، ޕެޓްރޯޕޮލިސްގެ މޭޔަރު ރުބެންސް ބޮމްޓެމްޕޯ ވަނީ ގެއްލިފައިވާ މީހުންގެ އަދަދަ އަންދާޒާކުރެއްވުމަށް ދެކޮޅުހައްދަވާފައެވެ.
"މިކަމުން ލިބުނު ގެއްލުމުގެ މިންވަރު އަހަރުމެންނަށް އަދި ނޭނގޭ. އެއީ ބުރަ ދުވަހެއް. އެއީ އުނދަގޫ ދުވަހެއް." މޭޔަރު ވިދާޅުވިއެވެ.
ރިއޯޑިޖެނީރޯ ކައިރީގެ ފަރުބަތައް މަތީގައި އޮންނަ ހިތްގައިމު މި ރަށަކީ ބްރެޒިލްގައި 19 ވަނަ ގަރުނުގެ ތެރޭގައި ރަސްކަންކުރެއްވި ރަސްރަސްކަލުން ހޫނު މޫސުމުގައި އަރާމުކުރެއްވުމަށް ވަޑައިގެންނެވި ރަށެވެ.
ފެހި ގަސްތަކުން ހިޔާއެޅިފައިވާ މަގުތަކާއި، ހިތްގަައިމު ގެތަކާއި، ޝާހީ ގަނޑުވަރުގެ ސަބަބުން މަޝްހޫރުވެފައިވާ ޕެޓްރޮޕޮލިސްއަކީ ހޫނު މޫސުމުގެ ހޫނުން ސަލަމާތްވާން އެދޭ ފަތުރުވެރިންގެ މެދުގައި މަގުބޫލު މަންޒިލެކެވެ. އެރަށުގައި ހުންނަ ޝާހީ ގަނޑުވަރަކީ މިހާރު މިއުޒިއަމެކެވެ.
ފާއިތުވި އަންގާރަ ދުވަހު އެރަަށަށް ވެހުނު ބޯވާރޭގައި، ފަރުބަދަ މަތިން ފައިބައިގެން އައި ކިސަޑުން އެ ރަށުގެ މަގުތައް ފުރާލައި ގެތަކާއި، އެއްގަމު އުޅަނދުތަކުގައި ތިބި އެތައް ބައެއް ވަޅުލެވިގެން ގޮސްފައިވާއިރު، އެރަށުގެ ހިތްގައިމުގެ ކަމުގެ އެއްވެސް އަސަރެއް ފެންނަން ނެތް ފަދައެވެ.
ރިއޯޑިޖެނީރޯ ސްޓޭޓުގެ ފަޔާ ސާވިސްއިން ހާމަކުރި ގޮތުގައި އަންގާރަ ދުވަހު އެންެމެ ތިން ގަޑިއިރުގެ ތެރޭގައި އެރަރަށް ވަނީ 28.5 ސެންޓިމީޓަރުގެ ވާރޭ ވެހިފައެވެ. އެއީ އޭގެ ކުރީގެ 30 ދުވަހުގައި ވެހުނު ވާރެއަށް ވުރެ ގިނަ މިންވަރެކެވެ. އެ ސްޓޭޓުގެ ގަވަރުނަރު ވިދާޅުވި ގޮތުގައި މި ވިއްސާރައަކީ 1932 ވަނަ އަހަރަށް ފަހު ޕެޓްރޮޕޮލިސްއަށް ކުރި އެންެމެ ގެއްލުން ބޮޑު ވިއްސާރައެވެ.
ފާއިތުވި ޑިސެންބަރު މަހުއްސުރެ ބްރިޒިލްގެ އެކި ސަަަރަހައްދުތަކަށް ކުރަމުންދާ ވިއްސާރައިގައި މާއްދީ ބޮޑެތި ގެއްލުން ލިބުމުގެ އިތުރަށް ގިނަ ބަޔަކު ވަނީ މަރުވެފައެވެ. ސާއޮ ޕާއުލޯ ސްޓޭޓުގައި 28 މީހުން މަރުވެފައިވާއިރު، ބާހިއާ ސްޓޭޓުގައި 24 މީހަކު ވަނީ މަރުވެފައެވެ.
ޕެޓްރޮޕޮލިސްއާއި އެރަށުގެ ވަށައިގެންވާ ސަރަހައްދަށް 2011 ވަނަ އަހަރުގެ ޖަނަވަރީ މަހު ކުރި ވިއްސާރައިގައި ފެންބޮޑުވެ، ބިންގަނޑު ކަނޑައިގެން ދިއުމުގެ ސަބަބުން 900 މީހުން މަރުވެފައި ވެއެވެ.
