ނެތުމުގެ ތެރެއިން އިންސާނާ ޚަލްޤުކުރައްވައި، އުފައްދަވާފައިވަނީ، ކޮންމެ ކަމަކަށް ކުޅަދުންވަންތަ މަތިވެރި، ﷲ ގެ ކަށަކުޅަދުންވަންތަވެރިކަމުގެ ތެރެއިންނެވެ. އިންސާނާ އުފެއްދެވުމަށްފަހު، އެއިންސާނާ މަރުގަންނަވައި، ﷲ ގެ ޙަޟުރަތަށް ގެންދެވުމުގެކުރިން، އޭނާ ދުނިޔޭގައި އުޅެންވީގޮތް، ﷲ ވަނީ ވަރަށް ސާފުކޮށް އަންގަވާފައެވެ. އެއަށްކިޔައި އުޅެނީ ﷲ ގެ މަގެވެ. ނުވަތަ ދީނެވެ. އިންސާނާ އުޅުމަށް ﷲ އަންގަވާފައިވާ ގޮތެވެ. ނުވަތަ ޢަޤީދާގެ ގޮތުން އިންސާނާ ޤަބޫލުކުރާ ގޮތެވެ. މާތްވެގެންވާ އިސްލާމްދީނަކީ، އެންމެ ފަހުގެ ދީނެވެ. އެދީނުގެ ޙުކުމްތަކާއި އަޞްލު ބަޔާންކުރައްވައި، ﷲ ބަސްވަޙީކުރެއްވުމަށް ބާވައިލައްވާފައިވަނީ، ކީރިތި ޤުރުއާނެވެ. އެއީ ﷲ ގެ ކަލާމްފުޅެވެ. އެފޮތް ބާވައިލެއްވީ، އެންމެފަހުގެ ނަބިއްޔާ މުޙައްމަދު ޞައްލަﷲ ޢަލައިހި ވަސައްލަމްގެ އަތްޕުޅަށެވެ. އެންމެފަހުގެ ދީނަކީ އިސްލާމްދީނެވެ. އެންމެފަހުގެ ފޮތަކީ ކީރިތި ޤުރުއާނެވެ. އެންމެފަހުގެ ނަބިއްޔަކީ، އަދި ރަސޫލަކީ މުޙައްމަދު ޞައްލަﷲ ޢަލައިހި ވަސައްލަމައެވެ. އެހެންކަމުން އިސްލާމްދީނަކީ، އެދީން އައުމަށްފަހު، އަދި ކީރިތި ޤުރުއާން ބާވައިލެއްވުމަށްފަހު، އަދި މުޙައްމަދު ޞައްލަﷲ ޢަލައިހި ވަސައްލަމަ ނަބީކަމާއި ރަސޫލުކަމައިގެން ފޮނުއްވުމަށްފަހު، ޤިޔާމަތަށްދާނދެން އިންސާނާ އުޅުމަށް، ﷲ އަންގަވާފައިވާ ގޮތާއި ފޮތާއި މަގެވެ. އޭގެ އަޞްލާއި ޙުކުމްތަކަށް ބަދަލެއް ނުގެނެވޭނެއެވެ. އިސްލާމްދީނުގައި، ޝަރުޢީ އިންސާފު މުހިންމުވަނީ އެސަބަބަށްޓަކައެވެ.
އިސްލާމްދީނުގައި އިންސާފަކީ، ހުރިހައިކަމެއް އެއޮންނަންވީ ތަނެއްގައި އޮންނަންވީގޮތެއްގައި ބާއްވައިދޭ ހަތިޔާރެވެ. އިސްލާމްދީނުގެ އިންސާފަކީ، ހަމަހަމަކަމާއި ޢަދްލުވެރިކަމެވެ. އިންސާފު، އޮންނަންވީ ތަނެއްގައި އޮންނަންވީގޮތަކަށް ނެތިއްޖެނަމަ، އެތަނެއް ފަސާދަވެގެންދާނެއެވެ. އިސްލާމްދީނުގައި އިންސާފަކީ، ހުޅަނގުގައި އެ ދަޢުވާކުރާ، އިންސާނީ ޙައްޤުތަކާއި ކަރާމާތް އޭގެ އެންމެފުރިހަމަގޮތުގައި، އެދީނުގެ ހަމަތަކާއި ޙުކުމްތަކުން ބޭރުނުވެ، ކަށަވަރުކޮށްދޭ ނިޒާމެވެ. ﷲ ގެ އަމުރުފުޅުތަކާއި ޙުކުމްތަކުން، އަދި ރަސޫލު ޞައްލަﷲ ޢަލައިހިވަސައްލަމަގެ ސުންނަތުން، ގެނެސްދޭ އިންސާފަކީ، މުޅިއިންސާނިއްޔަތަށް އޮތް ރަޙުމަތެކެވެ. އެއާ ތަފާތުކޮށް، އިންސާނާ އަމިއްލަގޮތްތައް އުފައްދައިގެން ގެންނަ އިންސާފަކީ، އިންސާފެއްނޫނެވެ. އަދިކިއެއްތަ ! އެއީ އިންސާނިއްޔަތަށް އޮތް ނުރައްކަލެކެވެ. އިސްލާމްދީނުން ބޭރުވެ، ކުފުރުގެ މަގަށް ޙުކުމްކުރެވޭ ބޭއިންސާފެވެ. އިންސާފަކީ، ދެފަރާތަކަށް ހަމަހަމަކޮށް ހޯދައިދެވިދާނެ އެއްޗެއްނޫނެވެ. އެއްފަރާތަކަށް އިންސާފުހޯދައިދެވޭއިރު އަނެއްފަރާތް ކުށްވެރިވެދާނެއެވެ. އެހެންނަމަވެސް، ޖަމާޢަތުގެ މަޞްލަޙަތާއި އިސްލާމްދީނުގެ އަޞްލު ހިފެހެއްޓިގެން ކުރެވޭ ޙުކުމްތަކުންނޫނީ އިޖްތިމާޢީ ޢަދާލަތު ދެމެހެއްޓިގެން، ހިފެހެއްޓިގެންނެއް ނުދާނެއެވެ. އިސްލާމްދީނުގައި ޝަރުޢީ ޙުކުމްތަކަކީ ސިޔާސީ އެއްޗެއްނޫނެވެ. ވާދަޖަހައިގެން، ބަސްމޮށުންތެރި އަޑުގަދަމީހާގެ ބަހަށް ބުރަވެ، ޙާކިމަށް ފެންނަކަންކަމާއި ތަންތަން އެއްފަރާތްކޮށް، ވަކިފަރާތަކަށް ބުރަވާގޮތަށް ކުރެވޭ ޙުކުމަކީ އިންސާފުގެ މަގުން ކުރެވޭ ކަމެއްނޫނެވެ. ވަށްކަންކުރިމީހާ ވަށްކަންކުރިކަން ޙާކިމަށާއި ރައްޔިތުންނަށް އެނގޭހިނދުވެސް، އެކަން އެއީ ނުކުރާކަމެއްކަން ސާބިތުކުރުމަށް ވަކާލާތުކޮށް، ޖަވާބުދާރީވާ ދިފާޢީ ވަކީލުންނަށް ޖަވާބުދާރީ ވެވޭގޮތަކުން އުފެދޭ ޙާލަތަކަށް ބުރަވެ ކުރެވޭ ޙުކުމަކީ، ދެފަރާތުންކުރެ ފަރާތަކަށް އިންސާފުނުލިބޭނެ ޙުކުމަކަށް ވެދާނެއެވެ.
ތަނެއް ރޯކޮށްލައިގެން، އެއީ ސިޔާސީކަމެއްކަމާއި، އެކަން ރޭވުމުގައި އެތައްބަޔަކު ތިބިކަން އެނގިތިބެ، ރޯކޮށްލުމުގައި އެތައްބަޔަކު ބައިވެރިވެ އުޅޭތަން ފެންނައިރު، ޙުކުމަކާ ހަމަޔަށްދާން ފުރިހަމަކުރަންޖެހޭ އިޖްރާޢަތުތައް ހުށަހެޅުމުގައި ވަކިގޮތަކަށް ރޭވި ބަށްޓަންކުރެވިގެން، އެކަމެއްހިނގާތާ 9 އަހަރުފަހުން، އޭގެތެރެއިން ހަމައެންމެ މީހަކު ޖަލަށްލާން ކުރެވޭ ޙުކުމަކީ އިސްލާމްދީން ދަންނަ އިންސާފެއްނޫނެވެ.
ސަރުކާރުގެ މުއައްސަސާއެއްގެ މައްޗަށް ޝަރުޢީ ޙުކުމެއް ކުރެވިފައި، އެޙުކުމަކަށް ނުކިޔަމަންތެރިވުމާގުޅިގެން، ދަޢުވާއުފުލާ ފަރާތަށް ލިބުނު ގެއްލުމުގެ ބަދަލުހޯދުމަށް ދަޢުވާ ކުރުމުން، ދަޢުވާކުރާ ފަރާތަށް ބަދަލެއް ނަގައިދެވެން ނެތްކަމަށް، އަދި ޙުކުމާ ޚިލާފުވީފަރާތަށް އަދަބެއް ނުލިބޭގޮތަށް، ތިން ރައީސެއްގެ ވެރިކަން ނިމޭހިސާބުން، ރޭވިގެން ކުރެވޭ ޙުކުމަކީ، އިސްލާމީ ޝާރީޢަތާ ޚިލާފަށް ކުރެވޭ ބޭއިންސާފު ޙުކުމެކެވެ.
ރަސޫލު ޞައްލަﷲ ޢަލައިހި ވަސައްލަމަ ޙަދީސްފުޅުކުރައްވާފައިވާކަމަށް ޞަޙީޙު މުސްލިމްގައި ބަޔާންކުރެވިފައި ވެއެވެ. "ޤިޔާމަތްދުވަހު، މަޙުޝަރުގެ މައިދާނުގައި އެއްވެސް ހިޔާވަހިކަމެއްނޯންނަ ޙާލަތުގައިވެސް، 7 ބާވަތެއްގެ މީހުންގެ މައްޗަށް ﷲ ގެ ޙަޟުރަތުން، ހިޔާވަހިކަން މިންވަރު ކުރައްވައެވެ. އޭގެ ތެރެއިން އެކަކީ، އިންސާފަށް ޙުކުމް ކުރާ ޙާކިމާއެވެ."
ﷲ ސުބްޙާނަހޫ ވަތަޢާލާ އެކަލާނގެ ކަލާމްފުޅުގައި ބަސްވަޙީ ކުރައްވާފައި ވެއެވެ. "އޭ ! ތިމަންރަސްކަލާނގެ އަޅުތަކުންނޭވެ! އަނިޔާވެރިކަމަކީ، ތިމަން ﷲ ގެ ޙަޟުރަތަށް މަނާކުރެވިފައިވާކަމެކެވެ. އަދި ތިޔަބައިމީހުންގެ މައްޗަށްވެސް މެއެވެ. ތިޔަބައިމީހުންގެ ތެރެއިން އެކަކުވެސް އަނެކާގެ މައްޗަށް އަނިޔާވެރި ނުވާށެވެ!"
އެހެންކަމުން، އިންސާފަކީ، މުޅި އިންސާނިއްޔަތަށް ﷲ ލައްވާފައިވާ ނިޢުމަތެކެވެ. އިންސާނުން އެކަކު އަނެކަކަށް އަނިޔާވެރިވެ، ޙައްޤުތަކުން މަޙުރޫމުކޮށް، ލާއިންސާނީ ޢަމަލުތަކަށް އަރައިގަންނަ ހިނދު، ﷲ ގެ ކޯފާއަށް ބިރުވެތިވާން ޖެހެއެވެ. އިންސާނީ ޙައްޤާއި އިންސާފު ކަށަވަރުކުރުމުގައި، މީސްތަކުން ފެއިލްވެ، މިބިން ފަސާދަވެގެންދާތަން ފެންނަނީކީ މަދެއްކޮށެއްނޫނެވެ. އިސްލާމީ ޝަރީޢަތް އޮޅުވައިލެވި، ޝަރީޢަތުގެ ޙުކުމްތައް ކޮށައިމަށައި އަމިއްލަގޮތްތައް އުފައްދައިގެން، އަމިއްލަ ބަހުން ކުރެވޭ ޙުކުމްތަކުގެ އަޑު އިވެނީކީ މަދެއްކޮށެއްނޫނެވެ. އިންސާފު ހޯދުމަށްޓަކައި، އިސްލާމީ ޝަރީޢަތަށް ހުށަހެޅޭ މައްސަލަތަކުގެ ޙުކުމަކާ ހަމަޔަށް ދާން އެތައް އެތައް އަހަރެއް ހޭދަވެގެން ދިއުމަކީވެސް، އިންސާފެއް ނެތްކަމުގެ ހެއްކެކެވެ. އެތައް ޒަމާނަކަށްފަހު، އެތައް ބަޔެއްގެ އަތް އަތްމަތިން އެމައްސަލައެއް ހިނގައި ޙުކުމަކާހަމަޔަށް ދާއިރު، އޭގެ އަސްލު ގެއްލި، ވާނުވާ ނޭނގިތިބެ، ވަކިގޮތަކަށް ކުރެވޭ ޙުކުމަކުން އިންސާފެއް ނުލިބޭނެއެވެ. އިންސާފު ހޯދަން ފަނޑިޔާރުގެޔަށްދާ މީހާގެ ޢުމުރުން ހޭދަވާ އެންމެ ދުވަހަކީވެސް އޭނާއަށް ލިބޭ ބޭއިންސާފެކެވެ. ޝަރީޢަތުގެ ޙުކުމްތައް ލަސްވުމަކީ، އެންމެ ބޮޑު ބޭއިންސާފެވެ. އިޖްތިމާޢީ ޢަދާލަތަށް ރައްޔިތުން ޝައްކުކުރާނެ ޖާގަ ހުޅުވިގެންދާނެ އެއް ސަބަބެވެ. ފަނޑިޔާރުގެތަކުގެ އިތުބާރު ނެތިގެންދާނެ ސަބަބެކެވެ.
ކީރިތި ޤުރުއާނަކީ، އިސްލާމްދީނުގެ އިންސާފުގެ މަގު ކަށަވަރުކޮށްދޭ އެންމެ މުހިންމު އަސާސެވެ. ﷲ ގެ މަގުގައި އިންސާފު ޤާއިމްކުރުމަށް، އިންސާނުންގެ ހުރިހައި ޢަމަލަކަށް، އެފޮތުގައިވަނީ މަގުދައްކަވާފައެވެ. އިންސާފު ޤާއިމްކުރާނެ ގޮތާއި ޙުކުމްތައް، އެފޮތުގައިވަނީ ބަޔާންކޮށްދެއްވާފައެވެ. އިސްލާމްދީނުގެ އެންމެ މުހިންމު އަސާސަކީ އިންސާފެވެ. ތަވްޙީދާއި ރަސޫލު ޞައްލަﷲ ޢަލައިހި ވަސައްލަމަގެ ސުންނަތުގެ އެންމެ އެއް އަސާސަކީ އިންސާފު ޤާއިމްކުރުމެވެ. އިންސާފާ ނުލައި އިންސާނިއްޔަތު، އޭގެ އަޞްލަށް ދެމިއެއް ނޯންނާނެއެވެ. ކީރިތި ޤުރުއާނުގެ އައްނަޙުލު ސޫރަތުގެ 90 ވަނަ އާޔަތުގައި ﷲ ސުބްޙާނަހޫ ވަތަޢާލާ ބަސްވަޙީ ކުރައްވައި އަންގަވައިފައި ވެއެވެ. "ހަމަކަށަވަރުން، ޢަދްލުވެރިވުމަށާއި، އިޙްސާންތެރުވުމަށާ އަދި ގާތްތިމާގެ މީހުންނަށް ހެޔޮފޯރުވުމަށް، ﷲ އަމުރުކުރައްވަތެވެ. އަދި ހުތުރުކަން ބޮޑުވެގެންވާ ފާފަތަކާއި، މުންކަރާތްތަކާއި، އަނިޔާވެރިވެ އުޅުން އެކަލާނގެ ނަހީކުރައްވަތެވެ. އެކަލާނގެ، ތިޔަބައިމީހުންނަށް ވަޢުޡު އިއްވަވަނީ، ތިޔަބައިމީހުން ހަނދުމަކުރުމަށްޓަކައެވެ."
ޢަދްލުވެރިވުމުގެ މައްޗަށް ބާރުއަޅުއްވައި، ކީރިތި ޤުރުއާނުގެ އަލްމާއިދާ ސޫރަތުގެ 8 ވަނަ އާޔަތުގައި ﷲ ވަޙީކުރައްވާފައި ވެއެވެ. "އޭ އީމާންވެއްޖެ މީސްތަކުންނޭވެ! ތިޔަބައިމީހުން ﷲ އަށްޓަކައި އެކަލާނގެ ޙައްޤުތައް ފުރިހަމަޔަށް ޤާއިމްކުރާ، އަދި ޢަދްލަށް ހެކިދޭ ބަޔަކުކަމުގައި ވާށެވެ! އަދި ބަޔަކުމީހުންދެކެ، ތިޔަބައިމީހުންގައި އުފެދިފައިވާ ރުޅިވެރިކަމެއް އެއީ، ތިޔަބައިމީހުން ޢަދްލުވެރިނުވުމުގެ މައްޗަށް ބާރުއަޅާ ކަމެއްކަމުގައި ނުހަދާށެވެ! ތިޔަބައިމީހުން ޢަދްލުވެރިވާށެވެ! އެގޮތް ތަޤްވާވެރިކަމާ ގާތްކަން ބޮޑެވެ. އަދި ތިޔަބައިމީހުން ﷲ އަށް ތަޤްވާވެރިވާށެވެ! ހަމަކަށަވަރުން ﷲ އީ، ތިޔަބައިމީހުންކުރާ ޢަމަލުތައް މޮޅަށް ދެނެވޮޑިގެންވާ ރަސްކަލާނގެއެވެ."
ޢަދްލު އިންސާފާބެހޭގޮތުން، ކީރިތި ޤުރުއާނުގެ އަލްޙަދީދް ސޫރަތުގެ 25 ވަނަ އާޔަތުގައި ﷲ ތަޢާލާ ވަޙީކުރައްވާފައި ވެއެވެ. "ހަމަކަށަވަރުން، ފައުޅުވެގެންވާ ހެކިތަކަކާއެކު، ތިމަން ރަސްކަލާނގެ ރަސޫލުން ފޮނުއްވީމެވެ. އަދި، އެ ރަސޫލުންނާއެކު، ފޮތާއި ޢަދްލު އިންސާފުގެ ތިލަފަތް ބާވައިލެއްވީމެވެ. (އެއީ) މީސްތަކުން، ޢަދްލު އިންސާފު ޤާއިމްކުރުމަށްޓަކައެވެ. އަދި، ތިމަން ރަސްކަލާނގެ ދަގަނޑު ބާވައިލެއްވީމެވެ. އޭގައި ނުހަނު ގަދަފަދަ ކަމާއި މީސްތަކުންނަށް މަންފާތަކެއް ވެއެވެ. އަދި، އެއީ ނުފެންނަ ތާނގައި ﷲ އާއި އެކަލާނގެ ރަސޫލުންނަށް ނަޞްރުދެނީ ކާކުކަން ﷲ ދެނެވޮޑިގެންވެ، އެކަން އެންގެވުމަށްޓަކައެވެ. ހަމަކަށަވަރުން، ﷲ އީ، ބާރުވެރިވަންތަ، ޢަޒީޒުވަންތަ ރަސްކަލާނގެއެވެ." މި އާޔަތުގައި، "ތިމަން ރަސްކަލާނގެ ރަސޫލުން ފޮނުއްވީމެވެ." އޮތުމުގެ މުރާދަކީ، ﷲ ބާވައިލެއްވި ހުރިހައި ފޮތްތަކާއެކު، އެފޮތުގައި ބަޔާންވެގެންވާ ޙުކުމްތައް ތަފްޞީލުކޮށްދެއްވުމަށް، ރަސޫލުން ފޮނުއްވުމުގެ ޙިކުމަތަކީ، އެފޮތްތަކުގައި ބަޔާންގެވެންވަނީ، މުޅި އިންސާނިއްޔަތަށް ކަނޑައެޅި ބަޔާންވެގެންވާ ޢަދްލުވެރިކަން ކަމުގައި އެންގެވުމެވެ. އެފޮތްތަކުގެ އާޔަތްތަކުގައި ބަޔާންވެ ކަނޑައެޅިގެންވާ ގޮތުގެމަތިން އިންސާނާ ޢަމަލުކޮށް، ޙުކުމްތައް ތަންފީޒުކޮށްގެން ޢަދްލު އިންސާފު ޤާއިމް ކުރުމެވެ. ކީރިތި ޤުރުއާނުގައި ބަޔާންވެގެންވާ ޢަދްލު އިންސާފުގެ މަގަކީ، ވަކި ފަންތިއަކަށް، ގިންތިއަކަށް އަދި ދަރިފަސްކޮޅަކަށް، ކުލަޔަކަށް ނުވަތަ ޖިންސަކަށް ޚާއްޞަކުރެވި ހަމަތައް ގެއްލިފައިވާ އެއްޗެއްނޫނެވެ. އެއީ މުޅިއިންސާނިއްޔަތަށް ހަމަހަމަވެ، ޚާއްޞަވެގެންވާ އެއްޗެކެވެ. ކީރިތި ޤުރުއާނުގެ އައްނިސާ ސޫރަތުގެ 135 ވަނަ އާޔަތުގައި ވަރަށް ޞަރީޙަކޮށް މިކަން ބަޔާޏްކުރައްވައި، ﷲ ވަޙީކުރައްވާފައި ވެއެވެ.
"އޭ އީމާންވެއްޖެ މީސްތަކުންނޭވެ! ތިޔަބައިމީހުން ޢަދްލު އިންސާފު ޤާއިމްކުރުމުގައި، ދެމިތިބޭބަޔަކުކަމުގައި ވާށެވެ! (އަދި) ﷲ އަށްޓަކައި، ހެކިބަސްއަދާކުރާ ބަޔަކުކަމުގައި ތިޔަބައިމީހުންވާށެވެ! ތިޔަބައިމީހުންގެ އަމިއްލަ ނަފަސުތަކުގެ މައްޗަށްކަމުގައި ވިޔަސް، ނުވަތަ މައިންބަފައިންނާއި ގާތްތިމާގެ މީހުންގެ މައްޗަށްކަމުގައިވިޔަސް މެއެވެ. އެމީހަކީ (އެބަހީ: އެމީހެއްގެ މައްޗަށް ހެކިދެވޭ މީހަކީ) މުއްސަންޖަކުކަމުގައި ނުވަތަ ފަޤީރަކުކަމުގައިވިޔަސް، ފަހެ އެދެމީހުންނަށްމެ ﷲ އައުލާކަން ބޮޑެވެ. ތިޔަބައިމީހުން ޢަދްލުވެރިވުން ދޫކޮށް، އަމިއްލަ އެދުމަށް ތަބާނުވާށެވެ! އަދި، ތިޔަބައިމީހުން ހެކިބަސް ބަދަލުކުޅަނަމަ، ނުވަތަ ހެކިބަސް އަދާކުރުމުން އެއްކިބާ ވާނަމަ، (ދަންނާށެވެ!) ފަހެ، ހަމަކަށަވަރުން، ތިޔަބައިމީހުންކުރާ ޢަމަލުތައް، މޮޅަށް ދެނެވޮޑިގެންވާ ކަލަކު ކަމުގައި ﷲ ވޮޑިގެން ވެއެވެ."
ކީރިތި ޤުރުއާނުން ﷲ އަންގަވައި ބަޔާންކުރައްވާފައިވާ އެންމެހައި ޙުކުމްތަކުގެ އަސްލަކީވެސް، މަޤްޞަދަކީވެސް ޢަދްލު އިންސާފެވެ. އެހެންކަމުން، އަލްމާއިދާ ސޫރަތުގެ 42 ވަނަ އާޔަތުގައި، ރަސޫލު ޞައްލަﷲ ޢަލައިހި ވަސައްލަމައާ މުޚާތަބު ކުރައްވައި ﷲ އަންގަވައިފައި ވެއެވެ. "ކަލޭގެފާނު ޙުކުމްކުރައްވާނަމަ، އެއުރެންގެ މެދުގައި ޢަދްލަށް ޙުކުމް ކުރައްވާށެވެ! ހަމަކަށަވަރުން ޢަދްލަށް ޙުކުމްކުރާ މީހުންދެކެ ﷲ ލޯބިވެވޮޑިގެން ވެއެވެ. ޝަރުޢީ އިންސާފަކީ އެއީއެވެ."
އިންސާފު ހޯދަން ދާނީ ކޮންތާކަށްކަން ނޭނގޭވަރަށް، ނިޒާމްމިއޮތީ ތަޣައްޔަރު ވެފައެވެ. ސިޔާސީކޯޅުމުން، ފަނޑިޔާރުގެތަކާއި އިންސާފު ޤާއިމްކުރާ އެހެން މުއައްސަސާތަކުގެ އިތުބާރުވަނީ ގެއްލިފައެވެ. އެންމެ ދެރަވެގެން، އިންސާފާއި ނަޟާޙަތްތެރިކަން ޤާއިމްކުރަން އުފައްދާފައި ހުންނަ ތަންތަންވެސް އޮންނަނީ ފެއިލްވެފައެވެ. ފަނޑިޔާރުންނާއި އެފަދަތަންތަނުގެ ވެރިންނަށްތިބޭމީހުން، ހަދާނެ އެއްޗެއް ހަދާފައި ފިލައިގެންގޮސް ޤައުމުންބޭރުގައި، "އެތުދަތުން ފުޅަށްއަޅައިގެން މަޑުތަންމަތީ ނިދަނީ" އެވެ. މިހިސާބަށް ދިޔައިމާ، އިސްލާމީ ޝަރީޢަތާއި ޢަދްލު އިންސާފުގެ ވާހަކަދައްކަން ލަދުގަނެއެވެ. ބިރުވެސް ގަނެއެވެ.
