ވަރުގަދަ ސަލާމަތީ އަދި ސިއްހީ ފިޔަވަޅުތަކާއެކު މިއަހަރު ކުރިއަށް ދިޔަ ޙައްޖުގެ އަޅުކަން ނިމުމަކަށް އައިސްފައި ވަނީ ޙައްޖުވެރިންގެ ތެރޭން ކޮވިޑް-19 އާއި، ގައިން ގަޔަށް އަރާ އެހެން ބައްޔެއްގެ ހާލަތެއްވެސް ނުފެނިކަމުގައި ސައޫދީ އަރަބިއްޔާއިން ބުނެފިއެވެ. މިކަން ހާމަކުރައްވާފައި ވަނީ ޙައްޖުގެ އަޅުކަމަށް ސައޫދީ އަރަބިއްޔާއިން އެކުލަވައިލި ޕްލޭން ފުރިހަމައަށް ކާމިޔާބުވެފައިވާކަން ހާމަކުރައްވައި ހެލްތު މިނިސްޓަރު ތައުފީޤް ބިން ފައުޒާން އައްރަބީޢާ ނެރުއްވި ބަޔާނެއްގައެވެ.
މިއަހަރު (1442ހ.) ގެ ޙައްޖުގެ އަޅުކަން އަދާކުރި ޙައްޖުވެރިން ވަނީ އިއްޔެ އަޅުކަން ނިންމާލާފައި މައްކާއިން ފުރަން ފަށާފައެެވެ. ޢީދު ދުވަހާއި އައްޔާމުއްތަޝްރީޤުގެ ދެދުވަހު މިނާގައި ތިބެ 3 ޖަމްރާއަށް ހިލަ އުކުމަށް ފަހު، ޙައްޖުވެރިން އިއްޔެވަނީ ޙައްޖުގެ އެންމެ ފަހުގެ އަޅުކަން ކަމުގައިވާ ވަދާއުގެ ޠަވާފުކޮށްފައެވެ. އައްޔާމުއްތަޝްރީޤުގެ 3 ދުވަހު މިނާގައި ތިބުން އޮންނަ ނަމަވެސް، ދެ ދުވަހު ތިބެފައި ފުރުން އެއީ ހުއްދަ ކަމަކަށް ވާތީ، މިހާރު 3 ވަނަ ދުވަހަށް މަޑުކުރަނީ ޙައްޖުވެރިންގެ ތެރޭން މަދު ބައެކެވެ.
ހެލްތު މިނިސްޓަރު ފާހަގަކުރެއްވި ގޮތުގައި ޙައްޖުގެ އަޅުކަން ރައްކާތެރިކަމާއެކު ނިމިގެން ގޮސްފައި ވަނީ އެކަމަށްޓަކައި ދުރާލައި ތައްޔާރުވެ އަޅާފައިވާ ވަރުގަދަ ފިޔަވަޅުތަކުގެ ސަބަބުންނެވެ. ޙައްޖުގެ އަޅުކަން އަދާކުރުމުގެ ހުއްދަ މިއަހަރު ދީފައި ވަނީ ވެކްސިންގެ ދެ ޑޯޒް ފުރިހަމަކޮށްފައިވާ، ސައޫދީ އަރަބިއްޔާގައި ދިރިއުޅޭ 60 ހާސް މީހުންނަށެވެ. ޙަރަމްފުޅަށް ޙައްޖުވެރިން ވައްދާފައިވަނީ ފަހަރަކު 6 ހާސް މީހުންނަށްވުރެ ގިނަ ނުވާނެހެން ގްރޫޕްތަކަށް ބަހާލައިގެންނެވެ. މާސްކު އެޅުމާއި، ސޯޝަލް ޑިސްޓޭންސިންގއަށް އަމަލުކުރުމާއި، އަތްދޮވުން މަޖުބޫރުކޮށްފައި ވާއިރު، ކޮންމެ ގްރޫޕެއް އަޅުކަން އަދާކޮށް ނިމުމުން ޙަަރަމްފުޅު ސެނިޓައިޒްކުރިއެވެ.
މީގެ އިތުރަށް ޢަރަފާތާއި، މުޒްދަލިފާއާއި، މިނާއަށް ދަތުރުކުރި ބަސްތަކުގައި ވެސް ކައިރީގައި ތިބުން މަނާކޮށްފައި އޮތް، މިނާގައި ޙައްޖުވެރިން ނިދި ފޭލިގެ ތަކުގައިވެސް، ކޮންމެ ދެމީހެއްގެ ދެމެދުގައި ހުރަހެއް ބަހައްޓާފައި ވެއެެވެ. ޖަމްރާގައި އުކަން ސެނިޓައިޒްކޮށްފައިވާ ހިލަ ކޮތަޅެއް ކޮންމެ ޙައްޖުވެރިއަކަށް ވަކިން ދީފައި ވެއެވެ.
ޙައްޖަށް މިފަހަރު ކޮށްފައިވާ އިންތިޒާމުތައް ފުރިހަމަކަން ޙައްޖުވެރިން ފާހަގަކުރި އިރު، ޙައްޖުވެރިންގެ ގިނަ ބަޔަކު ވަނީ ކެއުމުގެ ފެންވަރު ދަށްކަން ފާހަގަކޮށްފައެވެ. ކެއުން ތައްޔާރުކޮށް ފޯރުކޮށްދިނުން ކޮންޓްރެކްޓް އުސޫލުން އަމިއްލަ ކުންފުނިތަކާާއެވެ. މިނިސްޓްރީ އޮފް ޙައްޖު އެންޑް ޢުމްރާއިން ކުރި ޓުވީޓެއްގައިވެސް ބުނެފައިވާ ގޮތުގައި އެ މިނިސްްޓްރީން ބެލިބެލުމުން ފެންވަރުދަށް ކެއުން ދީފައިވާކަން ފާހަގަކުރެވުނެވެ.
ޙައްޖު މިނިސްޓްރީން ބުނެފައި ވަނީ ފެށްވަރުދަށް ކެއުން ފޯރުކޯށްދިން ކުންފުނިތަކާ ދެކޮޅަށް ސައޫދީ ފުޑް އެންްޑް ޑްރަގް އޮތޯރިޓީއާއި މައްކާ މުނިސިޕަލްޓީއާ ގުޅިގެން ހަރުކަށި ފިޔަވަޅުއަޅާނެ ކަމުގައެވެ.
"އެ ކުންފުނިތައް އަލުން އިވޭލުއޭޓް ކުރަން އަހަރުމެން ވިސްނާނަން. އެ ކުންފުނިތަކަަށް ދީފައިވާ ޚިދުމަތް ދިނުމުގެ ހުއްދަ ބާޠިލުކުރުންވެސް އެކަށީގެންވޭ." ޙައްޖު މިނިސްޓްރީން ބުނެފައިވެއެވެ.
