ފެން ލިބުން ދަތިވެ އެކަމުގެ ރުޅިވެރިކަން ފާޅުކުރުމަށް އީރާނުގެ ހުޅަނގު ދެކުނުގެ ޕްރޮވިންސު، ޚޫޒެސްތާނުގައި ކުރިއަށްދާ އިހުތިޖާޖުތަކުގައި ހަމަނުޖެހުން ހިނގައި ބަޔަކު މަރުވެއްޖެއެވެ.
އެ ޕްރޮވިންސުގެ އިޒާހް އަވަށުގެ ގަވަރުނަަރުގެ އޮފީހުން ނެރުނު ބަޔާނެއްގައި ބުނެފައިވާ ގޮތުގައި އަންގާރަ ދުވަހު ކުރިއަށް ދިޔަ އިހުތިޖާޖުގެ ތެރޭގައި ޒުވާނެއްގެ ގައިގައި ކާރަކުން ޖެއްސުމުގެ ސަބަބުން އޭނާ ވަނީ މަރުވެފައެވެ.
"އޭނާއަށް އަނިޔާވިގޮތާއި، އޭނާ ގައިގައި ކާރުން ޖެއްސީ ކޮން ބައެއްތޯ ބަލަން ތަހުގީގު ކުރިއަށް އެބަދޭ." އެ ބަޔާނުގައި ވެއެވެ.
ޚޫޒެސްތާނުގެ އޮފިޝަލުން މީގެ ކުރިން މައުލޫމާތު ދެއްވާފައިވާ ގޮތުގައި "ހަމަނުޖެހުން ހިންގައި، ދަނޑިވަޅުގެ ފައިދާ ނަގަން ބޭނުންވާ ބަޔަކު" ބަޑިޖެހުމުގެ ސަބަބުން ދެ ޒުވާނަކު ވަނީ މަރުވެފައެވެ. އޭގެ ތެރޭގައި 18 އަަހަރުގެ ޒުވާނަކުވެސް ހިމެނެއެވެ.
މާހްޝަހަރްގައި ކުރިއަށް ދިޔަ އިހުތިޖާޖުގައި ފުލުސް އޮފިސަރެއްގެ ގަޔަށް ބަޑިޖަހައި މަރާލާފައިވާކަަމަށް ވެސް ޚަަބަރު ލިބެއެވެ.
"ޚޫޒެސްތާނު މީހުން ދަރީ ރޭގަނޑު ނުކުމު އިހުތިޖާތައް ބާއްވަމުން." އިސްލާހަށް ތާއީދުކުރާ ނޫހެއް ކަމަށްވާ އަރްމާނެ މިއްލީގައި ބުނެފައި ވެއެވެ.
މީސް މީޑިޔާގައި އާއްމުވެފައިވާ ވީޑިޔޯތަކުން ފެންނަ ގޮތުން ސަލާމަތީ ބާރުތަކުން ވަނީ އިހުތިޖާޖުކުރާ މީހުން ބައިބައިކޮށް ފޮނުވާލުމަށް އާދަޔާ ޚިލާފަށް ބާރު ބޭނުންކޮށްފައެވެ.
ތެލުގެ މުއްސަނދިކަން ލިބިފައިވާ ޚޫޒެސްތާނަކީ ޒަމާނުއްސުރެ ފެނުގެ ދަތިކަން ކުރިމަތިވަމުން އަންނަ ޕްރޮވިންސެކެެވެ. އިރާގު-އީރާނު ހަނގުރާމައިގައި ސައްދާމު ޙުސައިންގެ ސިފައިން އަރައި ބައެއް ހިފި އެ ޕްރޮވިންސުގައި އަރަބި ސުންނީންގެ އާާބާދީ ވަރަށް ބޮޑެވެ. އެ ޕްރޮވިންސާމެދު އަޅާނުލައި ދޫކޮށްލާފައިވާ ކަމުގެ ޝަކުވާ އަބަދުވެސް ރައްޔިތުން ކުރެއެވެ.
މިއަހަރު ވެފައިވަނީ އެ ޕްރޮވިންސުގައި ފެނުގެ ދަތިކަން ވަކިން ބޮޑު އަހަރަކަށެވެ. އާދަޔާއި ޚިލާފަށް ހޫނުވެ ހަނަފަސްކަން އިތުރުވުމުގެ ސަބަބުން ފެން ލިބުމުގެ ދަތިކަން ބޮޑުވުމާއި، ކަރަންޓު ކަނޑައިގެން ދިއުމުގެ މައްސަލަ ވަނީ ބޮޑުވެފައެވެ.
މިއަހަރަކީ ފެނުގެ މައްސަލަ ބޮޑު އަހަރެއް ކަމަށް ޚޫޒެސްތާނުގެ އޮފިޝަލުން ވެސް އެއްބަސްވެވަޑައިގަންނަވައެެވެ. އެހެންނަަމަވެސް، އެ ބޭފުޅުން ވިދާޅުވާ ގޮތުގައި ހަމަނުޖެހުން ތަކަކީ ވަކިވެގަތުމަށް މަސައްކަތްކުރާ ޖަމާއަތުން، މި ދަނޑިވަޅުގެ ބޭނުން ހިފައިގެން ހިންގަމުންދާ ހަމަނުޖެހުންތަކެކެވެ. އަދި އިސްލާމީ ޖުމްހޫރިއްޔާއާ ދެކޮޅު ޚަބަރުފަތުރާ ވަސީލަތްތަކުން ދަނީ ގޯސް މަންޒަރެއް ދައްކަމުންނެެވެ.
ރައީސު ރޫޙާނީގެ ސަރުކާރުން ބުނާ ގޮތުގައި ސަރުކާރުން ވަނީ ޚޫޒެސްތާނަށް ދިމާވެފައިވާ ފެނުގެ ދަތިކަން ހައްލުކުރުމަށް އިތުރު ފައިސާގެ އެހީ ދީފައެވެ. އަދި ރިވޮލިއުޝަނަރީ ގާޑުން ދަނީ ފެން ނުލިބޭ ސަރަހައްދުތަކަށް ފެން ޓޭންކަރުތައް ފޮނުވައިގެން ފެން ފޯރުކޮށްދެމުންނެވެ.
