ސަރުކާރާ ހަވާލުވެ ވަޑައިގެންނެވި އިރު ދިވެހިރާއްޖެ ބައިނަލްއަގުވާމީ ދުނިޔޭގައި އެކަހެރި ވެފައި އޮންނަތާ 5 އަހަރު ވެއްޖެ ކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ. ދިވެހިރާއްޖޭގެ ޚާރިޖީ ވުޒާރާގެ އިމާރާތް މަރާމާތަށް ފަހު އަލުން ހުޅުވުމުގެ ގޮތުން މިއަދު ހެނދުނު ބޭއްވި ރަސްމިއްޔާތުގައި ވާހަކަފުޅު ދައްކަވަމުން އެމަނިކުފާނު ވިދާޅުވި ގޮތުގައި ރާއްޖެ އެކަހެރި ވެފައި އޮތް އޮތުމަކީ މިނިވަންކަމަށް އޮތް ވަރަށް ބޮޑު ނުރައްކަލެކެވެ.
ޚާރިޖީ ވުޒާރާގެ އިމާރާތް އަލުން ހުޅުވާފައި ވަނީ ފަތުޙުﷲ ޖަމީލް ބިލްޑިންގ ގެ ނަމުގައެވެ.
ރައީސުލްޖުމްހޫރިއްޔާ ދެއްކެވި ވާހަކަފުޅުގައި އަލްމަރްޙޫމް ފަތުޙުﷲ ޖަމީލް ދިވެހިރާއްޖޭގެ ޚާރިޖީ ވަޒީރެއްގެ ހައިސިއްޔަތުން 27 އަހަރާއި 4 މަސް ދުވަހު ކުރެއްވި ޚިދުމަތް ފާހަގަ ކުރައްވައި އެމަނިކުފާނުގެ ޒިކުރާ އައު ކުރެއެްވިއެވެ. އަދި މިހާރުގެ ޚާރިޖީ ވަޒީރު ޢަބްދުﷲ ޝާހިދާއި އެމަނިކުފާނުގެ ޚާރިޖީ ޓީމުން ކުރައްވާ ބުރަ މަސައްކަތްޕުޅުވެސް ފާހަގަ ކުރެއްވިއެވެ.
ރައީސުލްޖުމްހޫރިއްޔާ ވިޮދާޅުވި ގޮތުގައި ދިވެހިރާއްޖޭގެ ނަން ބައިނަލްއަގުވާމީ ދުނިޔޭގައި އުފުއްލަވައި ފަޚުރުވެރި މަގާމަކަށް ގެންގޮސްދެއްވީ އަލްމަރުޙޫމް ފަތުހުﷲ ޖަމީލެވެ. ރާއްޖޭގެ ސިޔާދަތާއި މިނިވަންކަން ރައްކާތެރި ކުރެއްވުމުގެ ސިޔާސަތަކީ ފަތުޙުﷲ ހިފަހައްޓަވާފައިވާ ޚރިޖީ ސިޔާސަތެކެވެ. ދިވެހިރާއްޖެ މިހާރު މިހާރުވެސް ކުރިއަށް ދަނީ އެ ސިޔާސަތުގެ މަތީގައި ކަމަށް ރައީސުލްޖުމްހޫރިއްޔާ ވިދާޅުވިއެވެ.
މިހާރު ރައްޔިތުންގތެ މަޖިލީހުގައި އޮތް ޚާރިޖީ ސިޔާސަތުގެ ބިލް ގާނޫނަކަށް ވުމުން ރާއްޖޭގެ ސިޔާސީ ދާއިރާ މިހާރަށް ވުރެ ހަރުދަނާވެ ހުނަރުވެރި ގާބިލު މީހުން އުފެއްދުމުގެ ފުރުސަތު ހުޅުވި، މިނިވަންކަމާއެކު އެ ދާއިރާ ހަރަކާތްތެރިވުމުގެ ފުިރުސަތު މިހާރަށްވުރެ ފުޅާވެގެން ދާނޭ ކަމަށްވެސް އެމަނިކުފާޏު ވިދާޅުވިއެވެ.
އަލްމަރްޙޫމް ފަތުހުﷲ ޖަމީލް ދިވެހިރާއްޖޭގެ ޚާރިޖީ ވަޒީރަކަށް ވެވަޑައިގަތީ 1978 ވަނަ އަހަރު އަލްމަރްޙޫމް އިބްރާހީމް ނާޞިރުގެ ވެރިކަމުގައެވެ. އެ އަހަރުގެ ނޮވެންބަރު މަހުގެ 11 ވަނަ ދުވަހު ވެރިކަން ބަދަލުވެ އަލްއުސްތާޛު މައުމޫން ޢަބްދުލްޤައްޔޫމް ވެރިކަމާ ހަވާލުވެޑައިގެންފައި ޚާރިޖީ ވަޒީރުކަން ދެއްވީ އެ މަނިކުފާނަށެވެ.
