ރީތިބަހުން ވާހަކަދައްކަންޖެހޭ ބޭފުޅުންގެ ގޭގެޔަށްގޮސް ، ރީތިބަހުން ، އާދެ ވަޑައިގަންނަވަން ވާހަކަދެއްކުމަކީ ރީތި އަދަބުތަކުގެ ތެރެއިންވާ ކަމެކެވެ. އެހެންނަމަވެސް ، މިޒަމާނުގެ ކުދިންނަށް އެއީ އެހައި ފަސޭހަ ކަމެއްނޫނެވެ.
މަންމަޔަކު އޭނާގެ ދަރިފުޅު ގޮވައިގެން ، މާލޭގެ ބޭފުޅެއްގެ ގެޔަށް ދިއުމަށް ތައްޔާރު ވަމުން ގެންދިޔައެވެ.
" އެގެޔަށްގޮސް ވާހަކަ ދައްކަން ވާނީ ރީތިބަހުން އިނގޭ " މަންމަ ބުންޏެވެ. އަދި އާދެ ވަޑައިގަތުން ބޭނުންކޮށްގެން ، ރީތިކޮށް ވާހަކަދައްކާނެ ބައެއް ބަސް ބަސް ހަނދާންކޮށްދީ ، އެބަސްތައް ބޭނުންކުރަން ނަޞޭޙަތް ދިނެވެ.
ވަރަށް ރަނގަޅަށް ދަރިފުޅަށް ކިޔައިދިނުމަށްފަހު ، އެގެޔަށް ހިނގައްޖެއެވެ. ދަރިފުޅު ގޯހެއް ހަދާފާނެތީ މަންމަ ހުރީ ވަރަށް ކަން ބޮޑުވެފައެވެ. ފުރަތަމަ ދެއްކި ވާހަކަ ރަނގަޅެވެ. ބަސްމަދު ކުރަންވެސް ، މަންމަ އޮތީ ދަރިފުޅަށް އަންގާފައެވެ. އެހެންކަމުން ، ދަރިފުޅުވެސް އެކަމަށް ވިސްނައިގެންނާއި ބިރުން ، ވާހަކަ ދައްކައި އުޅުނީ ވަރަށް މަދުންނެވެ.
ސައިބުއިމުގެ ވަގުތު އަތުވެއްޖެއެވެ. އެންމެން ސައިބޯން ފެށިތަނާ ،، އެގޭގައި އޮންނަ ބޮޑު ބުޅަލެއް އެތަނަށް އައެވެ.
" މިއޮއް ވަޑައިގަތީ މަންމަ ބުޅާ " އެއްވެސް ފިކުރެއްނެތި ދަރިފުޅު ގޮވާލިއެވެ. އެއަޑަށް އެންމެން ސިހި ، ހިންޏައިގެން ފަޅައިގެން ދިޔައެވެ. ދަރިފުޅަށް ވިސްނިފަ އޮތީ ، އެގޭގައި ބުޅާވެސް ވަޑައިގަންނަވާނީ ކަމުގައެވެ.
