މިސްރުގެ ވެރިރަށް ޤާހިރާ (ކައިރޯ) ގެ ދެކުނަށް އޮންނަ ސަރަހެއްދައި ހިނގި ނުރައްކާތެރި އެކްސިޑެންޓެއްގައި 18 މީހުން މަރުވެ 3 މީހުން ޒަޚަމްވެއްޖެއެވެ. މި އެކްސިޑެންޓް ހިނގާފައި ޓްރޭލާ ލޮރީއެއް ކުޑަ ބަހެއްގައި ޖެހުމުގެ ސަބަބުންނެވެ.
ޗީފް ޕްރޮސެކިއުޓަރުގެ އޮފީހުން ނެރުުނު ބަޔާނެއްގައި ބުނެފައިވާ ގޮތުގައި މި އެކްސިޑެންޓު ހިނގާފައި ވަނީ ޤާހިރާގެ ދެކުނުން 100 ކިލޯމީޓަރު ދުރުގައި އޮން ޢަޠުފީޙު އަަވަށުގައެވެ. ލޮރީއާއި ބަސް ޖެހުނު ކައިރޯ އަސްޔޫޠު އީސްޓާން ހައިވޭއަކީ ނީލަ ކޯރުގެ އިރުމަތީ ބިތުގައި އޮންނަ، ޤާހިރާއާ މިސްރުގެ ދެކުނު ޕްރޮވިންސުތައް ގުޅުވައިދޭ މައި މަގެކެވެ.
ފުލުހުންގެ ފަރާތުން މައުލޫމާތު ދިން ގޮތުގައި ލޮރީގެ ޓައިރެއް ގޮވުުމުގެ ސަބަބުން ލޮރީ ފުރޮޅާލައި، ކޮންޓުރޯލުނުވެ ގޮސް ބަހުގައި ޖެހުނީއެވެ. ލޮރީ ދުއްވަން އިން ޑްރައިވަރު މިހާރު ވަނީ ހައްޔަރުކޮށްފައެވެ. އަދި މި ހާދިސާގައި މަރުވި މީހުންގެ ހަށިތަކާއި، ޒަޚަމްވި މީހުން ވަނީ އެކްސިޑެންޓު ހިނގި ސަރަހައްދުގެ ހޮސްޕިޓަލްތަކަށް ގެންދެވިފައެވެ.
ބައެއް ނޫސްތަކުން ޚަބަރު ދީފައިވާ ގޮތުގައި މި އެކްސިޑެންޓުގައި ބަސް ވަނީ މުޅިން ފުނޑުފުނޑުވެފައެވެ. ބައެއް މަރުވި ބައެއް މީހުންގެ ހަށިތައްވެސް ވަނީ ކުދިކުދިވެފައެވެ.
މިސްރުގެ މަގުތަކުގައި ދުއްވާ ބޮޑެތި ލޮރީތަކުގެ އެކްސިޑެންޓުތަކުގައި އަހަރަކު އެތައް ހާސް ބަޔަކު މަރުވެއެެވެ. އެކްސިޑެންޓުތައް ގިނައިން ހިނގަނީ ބާރަށް ދުއްވުމާއި، މަގުތަކުގެ ފެންވަރު ދަށްވުމާއި، ޓްރެފިކް ގަވާއިދުތަކަށް ބޯނުލެނބުމުގެ ސަބަބުންނެވެ.
މިސްރުގެ ރަސްމީ ތަފާސް ހިސާބުތަކުން ދައްކާ ގޮތުގައި 2019 ވަނަ އަަހަރު އެ ގައުމުގައި 10 ހާސް އެކްސިޑެންޓު ހިނގާފައި ވެއެވެ. އަދި މި އެކްސިޑެންޓުތަކުގައި 3480 މީހުން މަރުވެފައި ވެއެވެ.
2018 ވަނަ އަހަރު 8480 އެކްސިޑެންޓު ހިނގާފައި ވާއިރު، އެ އަހަރުގެ އެކްސިޑެްންޓުތަކުގައި 3080 މީހުން މަރުވެފައި ވެއެވެ.
