ބޯޑަރު ހުޅުވާލި ފަހުން އެއްދުވަހުގެތެރޭގައި ރެކޯޑް އަދަދަކަށް މިއަދު ރާއްޖެއަށް ފަތުރުވެރިން ޒިޔާރަތްކޮށްފިއެވެ. މިއަދު ފަތުރުވެރިން ޒިޔާރަތްކުރި ރެކޯރޑް އަދަދު އިއްތިފާގުވީ ވަރަށް ރީތި ނަމްބަރަކާއެވެ. އެއީ 4567 ފަތުރުވެރިންނެވެ.
ޓޫރިޒަމް މިނިސްޓަރު، ޑރ. ޢަބްދުﷲ މައުސޫމް ކުރެއްވި ޓްވީޓެއްގައި ވިދާޅުވީ ބޯޑަރު ހުޅުވާލި ފަހުން މިއަދު އަނެއްކާ އާ ރެކޯޑެއް ގާއިމް ކުރެވިފައިވާ ކަމަށެވެ. އެއީ 4567 ފަތުރުވެރިން ކަމަށެވެ.
ބޯޑަރު ހުޅުވާލިފަހުން ކުރިން އެންމެ ގިނަ ޢަދަދަކަށް އެއްދުވަހު ފަތުރުވެރިން ޒިޔާރަތް ކޮށްފައިވަނީ މިދިޔަ އާދިއްތަ ދުވަހުއެވެ. އެއީ 4191 ފަތުރުވެރިންނެވެ. މިދިޔަ ދެތިން ދުވަހެއްގައިވެސް ރާއްޖެއަށް ޒިޔާރަތްކުރި ފަތުރުވެރިންގެ އަދަދު އުޅެނީ 3000 ހުން މަތީގައި ކަމަށް ތަފާސް ހިސާބުތަކުން ދައްކައެވެ.
ކޮވިޑް-19އާ ގުޅިގެން މިއަހަރުގެ މާރިޗް މަހު 27 އިން ފެށިގެން ޖުލައި 15 އާ ހަމައަށް އޮތީ ބޯޑަރު ބަންދުކޮށްފައެވެ. ފަނަރަ ޖުލައިގައި ބޯޑަރު ހުޅުވާލިފަހުން މަހުން މަހަށް ފަތުރުވެރިން ޒިޔާރަތް ކުރާ މިންވަރު ވަނީ އިތުރުވެފައެވެ.
ރާއްޖޭގެ ބޯޑަރު ހުޅުވާލި ފަހުން އެއްލައްކައަށްވުރެ ގިނަ ފަތުރުވެރިން ރާއްޖެއަށް ރިޔާރަތްކޮށްފައިވާއިރު މީގެ އެއް ދުވަސް ކުރިން ވަނީ މިއަހަރު ރާއްޖެއަށް ޒިޔާރަތްކުރި ފަތުރުވެރިންގެ ޢަދަދު ފަސް ލައްކައަށް އަރާފައެވެ. ޓޫރިޒަމް މިނިސްޓްރީން އަންދާޒާ ކޮށްފައި ވަނީ މިއަހަރު ރާއްޖެއަށް 525000 ފަތުރުވެރިން ޒިޔާރަތްކުރާނެކަމަށެވެ.
