ހަނގުރާމައާއި ބިރުވެރި ހާލަތުގައި ވެސް ނަމާދުކުރުމަށް އަންގަވައިފައިވާކަމަށް މިއަދުގެ ހުކުރު ހުތުބާގައި ވިދާޅުވެއްޖެ އެވެ. މިއަދުގެ ހުތުބާ ހާއްސަ ކުރެއްވީ ނަމާދުގެ މުހިންމު ކަމުގެ މައްޗަށެވެ.
ހުތުބާގައި ވިދާޅުވީ ނަމާދަކީ ރަށުގައި ގާއިމްވެ ހުންނަ މީހާގެ މައްޗަށާއި، ދަތުރުވެރިޔާގެ މައްޗަށާއި ބަލި މަޑުކަމުގައިވާ މީހާގެ މައްޗަށްވެސް ފަރުޟު ކުރައްވައިފައިވާ އަޅުކަމެއް ކަމަށެވެ. އަދި ހަނގުރާމައިގެ ޙާލަތުގަޔާއި ބިރުވެރިކަމުގެ ހާލަތްތަކުގައި ވެސް ނަމާދު ކުރުމަށް އަންގާފައިވާކަމަށެވެ.
ރަސޫލާ ޞައްލަﷲ ޢަލައިހި ވަޞައްލަމަގެ ހަދީސްފުޅަކުން އެގޭ ގޮތުގައި ބަލިހާލުގައިވެސް ނަމާދު އެޅުން ނެތްކަމަށް ހުތުބާގައި ފާހަގަ ކުރެއްވިއެވެ. އާލާސްކަންފުޅުގައި އުޅުއްވި ޞަހާބީ ބޭކަލަކަށް، ރަސޫލާ ޞައްލަﷲ ޢަލައިހި ވަސައްލަމަ ޙާދީސް ކުރެވި ބަސްފުޅެއްގައި "ކޮޅަށް ހުންނަވައިގެން ނަމާދު ކުރެއްވުމަށާއި އެކަމަށް ކުޅަދާނަފުޅުވެގެންނުވާނަ އިށީދެ ވަޑައިގެން ނަމާދު ކުރެއްވުމަށާއި އެކަމަށް ވެސް ކުޅަދާނަ ފުޅުވެގެން ނުވާނަމަ އޮށޯވެވަޑައިގެން ނަމާދު ކުރެއްވުމަށް" ހަދިސްކުރެއްވި ކަމަށް ހުތުބާގައި ފާހަގަ ކުރެއްވިއެވެ.
މިއަދުގެ ހުތުބާގައި ވިދާޅުވީ އިލްމުވެރިންގެ ވިދާޅުވާ ގޮތުގައި "އޮށޯވެ އޮވެގެން ނަމާދުކުރުމަށް ކުޅަދާނަ ވެގެން ނުވާނަމަ ނަމާދުކުރާނީ ޢިޝާރާތުންކަމަށެވެ. ޢިޝާރާތުން ނަމާދުކުރުމަށް ނުކުޅެދިގެންވާނަމަ ނަމާދުކުރާނީ ހިތުންކަމަށެވެ. އިމާމު ޝާފިޢީ ފަދަ ޢިލްމުވެރިން ވިދާޅުވާ ގޮތުގައި ބުއްދި ސަލާމަތުން ހުރިނަމަ ނަމާދުކުރަން ޖެހޭނެކަމަށެވެ. ނަމާދުގެ ފަރްޟުކަން އެމީހާގެ ކިބައިން ކެނޑިގެނެއް ނުދާނެކަމަށެވެ."
ކިތަންމެ ބަލި ބޮޑުވިއަސް ނަމާދު އެޅުމެއް ނެތްކަން ފާހަގަކުރައްވައި ހުތުބާގައި ވިދާޅުވީ މިއަދު ފެންނަމުން ދަނީ އެއާ ހިލާފު މަންޒަރުތައް ކަމަށެވެ. މީހަކު ހަމަ ބައްޔެއް ވެލާއިރަށް ނަމާދު ދޫކޮށްލާކަމަށެވެ. ބައެއް މީހުންނަށް ނަމާދުކުރުން ވެފައި ވަނީ އުފުލަން ޖެހިފައިވާ ބުރައަކަށް ކަމަށެވެ. ބައެއް މީހުން ނަމާދު ދޫކޮށްލަނީ ބަލި ފަސޭހަވުމުން އެނަމާދުތައް ގަޟާކުރުމުގެ ނިޔަތުގައިކަމަށެވެ. އެބަލީގައި މަރުވެއްޖެނަމަ އެއީ އޭނާއަށް ލިބުނު އުޒުރެއްކަމަށް ދެކެގެން ކަމަށެވެ. އެއީ ވަރަށްބޮޑު އޮޅުމެއް ކަމަށް ހުތުބާގައި ވިދާޅުވިއެވެ.
ﷲ ސުބުޙާނަހޫ ވަތަޢާލާގެ ޙަޒުރަތުގައި ނަމާދުގެ މަޤާމު ވަރަށް މަތިވެރިކަން ހުތުބާގައ ފާހަގަކުރެއްވިއެވެ. އެއީ އިސްލާމްކަމުގެ ދެވަނަ ރުކުން ކަމަށާއި އިސްލާމްކަމާއި ކާފިރުކަން ވަކިކޮށްދޭ އިން ކަމަށް ވިދާޅުވިއެވެ. ޚާއްޞަ ގޮތެއްގައި ފަތިސްނަމާދުގެ މުހިންމުކަން ފާހަގަ ކުރެއްވިއެވެ.
މުސްލިމުން ނަމާދާ ދުރުކުރުމަށްޓަކައި ޝައިޠާނާ ވަރަށްގިނަ ހީލަތްތަކާއި މަކަރުތައް ހަދައި ދުނިޔެ ރަންކޮށް ދައްކާކަން ފާހަގަ ކުރެއްވިއެވެ. އާދަކޮށް ނަމާދުކުރާ މީހެއްނަމަ އޭނާ ބައެއް ނަމާދުތަކާ ދުރުހެލި ކުރެވޭތޯ ބަލާނެކަން ފާހަގަކުރެއްވިއެވެ. މުސްލިމުންގެ ޙާލަތަށް ބަލާއިރު ގިނަބައެއްގެ ނަމާދުގެ ތިލަފަތް ވަނީ ލުއިވެފައިކަން ފާހަގަ ކުރެއްވިއެވެ. އެފަދަ މީހުންގެ ގާތުގައި ނަމާދަށްވުރެ އިސްކަންދެވޭނީ އެހެން ޢަމަލުތަކަށް ކަމަށް ފާހަގަ ކުރެއްވިއެވެ. އަދި އެފަދަ މީހުން ނަމާދުގެ ވަގުތުތަކާ ދިމާކޮށް ދުނިޔެވީ ޢަމަލުތައް ރާވައި ހިންގާތަން ފެންނަމުން ދާކަމަށް ފާހަގަކުރެއްވިއެވެ. ބަންގި ގޮވުމުން ފިހާރަތަކާއި ސައިހޮޓާތައް ލެއްޕިނަމަވެސް އެތަންތާގައި ގިނަ ބަޔަކު ނަމާދަށް ނުގޮސްތިބޭކަން ވެސް ފާހަގަ ކުރެއްވިއެވެ.
"މިއަދު މިސްކިތްތައް ވަރަށް ގިނައެވެ. ބާޒާރުމަތީގައްޔާއި ކުޅިވަރު ދަނޑުތައް ކައިރީގައްޔާއި އަތިރިމައްޗާއި ކައިރި ހިސާބު ހިސާބުގައި މިސްކިތްތައް އެބަހުއްޓެވެ. މަގުތައް ވަނީ އަލިވެ ހިނގާ ބިނގާ އުޅޭ މީހުންނަށް މިސްކިތަށް ދިއުމަށް އަމާންވެފައެވެ. ނަމާދު ވަގުތު ތަކުގައި ރޭޑިއޯ އާއި ޓީވީތަކުން ބަންގި ގޮވައި ނަމާދުކުރުމަށް ހަނދާން ކޮށްދެއެވެ. ނަމަވެސް އެކި ކަންކަމުގައި މަޝްޣޫލުވެ ނަމާދު އަޅާ މީހުން މަދެއް ނޫނެވެ." ހުތުބާގައި ވިދާޅުވިއެވެ.
