އިންޑިޔާއާއި އެމެރިކާއިން އަސްކަރީ އެއްބަސްވުމެއްގައި ސޮއިކޮށްފިއެވެ. އެމެރިކާގެ އަސްކަރީ ސެޓެލައިޓުތަކުން ފޮނުވާ މައުލޫމާތު ވަގުތުން ވަގުތަށް ނެގުމާއި، ދުނިޔޭގެ އެެކި ހިސާބުތަކުގެ ފޮޓޯތައް ވަގުތުން ބެލުމުގެ ފުރުސަތު މި އެއްބަސްވުމުގެ ދަށުން އިންޑިޔާއަށް ލިބިގެން ދާނެއެވެ.
ދެ ގަމުވެސް ޗައިނާއާއި އަރައިރުންވާ ދަނޑިވަޅެއްގައި ދެ ގައުމުގެ އަސްކަރީ ގުޅުން އިތުރަށް ބަދަހިވަމުންދާކަން މިކަމުން ދޭހަވާކަަމަށް އަސްކަރީ ތަޖުރިބާކާރުން ދެކެއެވެ.
'ދަ ބޭސިކް އެކްސްޗޭންޖް އެންޑް ކޯޕަރޭޝަން އެގްރީމެންޓް (ބެކާ) ގައި ސޮއިކުރެއްވީ މިހާރު އިންޑިޔާއަށް ރަސްމީ ދަތުރުފުޅެއް ކުރައްވަމުން ގެންދަވާ އެމެރިކާގެ ސެކްރެޓަރީ އޮފް ޑިފެންސް (ދިފާއީ ވަޒީރު) މާކް އެސްޕާއާއި އިންޑިޔާގެ ދިފާއީ ވަޒީރު ރާޖްނާތު ސިންގްއެވެ.
ބެކާ އެއްބަސްވުމުގެ ދަށުން އިންޑިޔާ ލިބޭ ހައްސާސު އަސްކަރީ މައުލޫމާތާއި، މަތީ ރިޒޮލިއުޝަންގެ ފޮޓޯތަކުގެ އެހީގައި އިންޑިޔާގެ މިސައިލްތައް ދުޝްމަނުންގެ އަމާޒުތަކަށް 'ތުނޑުން ތުނޑަށް' ސީދާކޮށްފައި ފޮނުވާލުމުގެ ގާބިލުކަން އިންޑިޔާއަށް ލިބިގެންދާނެެކަމަށް އިންޑިޔާގެ ނޫސްތަކުން ބުނެއެވެ. އަދި އިންޑިޔާގެ އަސްކަރިއްޔާއަށް އެމެރިކާއިން ވިއްކާ މަތިންދާބޯޓުތަކުން އޭގެ އަމާޒު ފަތްގަނޑަށް ސީދާ ހަމަލާދިނުމުގެ ގާބިލުކަން މި އެއްބަސްވުުމުން ލިބިގެން ދާނެއެެވެ.
2007 ވަނަ އަހަރުން ފެށިގެން އެމެރިކާގެ އަސްކަރީ އާލާތް އުފައެްދާ ކުންފުނިތަކުން 21 ބިލިއަން ޑޮލަރުގެ ހަތިޔާރު އިންޑިޔާއަށް ވިއްކާފައި ވެއެވެ. އެހެންކަމުން، ހައްސާސު އަސްކަރީ މައުލޫމާތު ބަދަލުކުރުމާ ބެހޭ އެއްބަސްވުމެއްގައި ސަޮއިކުރަން އެމެރިކާއިން އިންޑިޔާއަށް ބާރުއަޅާތާ ދުވަސްކޮޅެއް ވެއްެޖެއެވެ.
ސެކްރެޓަރީ އޮފް ޑިފެންސް މާކް އެސްޕާާާއާއިއެކު އެެމެރިކާގެ ސެކްރެޓަރީ އޮފް ސްޓޭޓް (ޚާރިޖީ ވަޒީރު) މައިކް ޕޮމްޕެއޯވެސް އިންޑިޔާއަށް ވަޑައިގެން އެބައުޅުއްވައެވެ. މި ދެބޭފުޅުންގެ މި ދަތުރުފުޅަކީ އިންޑިޔާއާ އެމެރިކާއާ ދެމެދު ކުރިއަށްދާ 2+2 ޑައިލޮގް ގައި ބައިވެރިވެވަޑައިގަތުމަށް ކުރައްވާ ދަތުރުފުޅެކެވެ. މި މަޝްވަރާތަކަކީ ދިފާއީ އަދި ޚާރިޖީ ދާއިރާގައި ދެ ގައުމުގެ ގުޅުން އިތުރަށް ބަދަހިކުރުމަށް ކުރެވޭ މަޝްވަރާތަކެެކެވެ.
އިންޑިޔާގެ ދަތުރު ނިންމަވާލެއްވުމަށް ފަހު ސެކްރެޓަރީ އޮފް ސްޓޭޓް މައިކް ޕޮމްޕެއޯ ދިވެހިރާއްޖެއަށާއި ސްރީލަންކާއަށް ވަޑައިގަތުމަށް ވަނީ ހަމަޖެހިފައެވެ.
