ކޯވިޑް-19 ޖެހުނު މީހުންގެ އަދަދު ސަތޭކައިން ދަށުގައި ހައެއްކަ ދުވަހު ހުރުމަށް ފަހު އަނެއްކާވެސް ސަތޭކައިން މައްޗަށް ޖެހިލައިފިއެވެ. ކޯވިޑް-19 އަށް މިއަދު ޕޮޒިޓިވް ވީ 121 މީހުންނެވެ، އެއީ 75 ދިވެހިންނާއި 46 ބިދޭސީންނެވެ.
ރާއްޖެއިން ބަލިޖެހުނު މީހުންގެ އަދަދަކީ 9173 އެވެ. މީގެ ތެރެއިން 7326 މީހަކު ބަލިން ރަނގަޅުވެފައިވެއެވެ. ބަލިން ފަސޭހަނުވެ 1809 މީހުން އެބަތިއްބެވެ. ފަސޭހަނުވާ މީހުންގެ ތެރެއިން 113 މީހުން ތިބީ ހަސްފަތާލުގައެވެ. 1087 މީހުން ތިބީ އައިސޮލޭޝަން ފެސިލިޓީތަކުގައެވެ. މިހާތަނަށް 32 މީހަކު ވަނީ މިބަލީގައި ނިޔާވެފައެވެ.
މިހާރު އަތޮޅުތަކުގެ 25 ރަށެއްގައި ކޯވިޑަށް ޕޮޒިޓިވް 99 މީހުން އެބަ ތިއްބެވެ. އެއީ 80 ދިވެހިންނާއި 19 ބިދޭސީންނެވެ. އެންމެ ގިނަ ޢަދަދެއްގެ ބަލި މީހުން ތިބީ ގދ. ހޯޑެއްދޫގައެވެ. އެރަށުގައި ބައްޔަށް ޕޮޒިޓިވް 38 މީހަކު އެބަ ތިއްބެވެ.
އެޗްޕީއޭއިން ހާމަކޮށްފައިވާ ގޮތުގައި 32 ރިސޯޓެއްގައި ބައްޔަށް ޕޮޒިޓިވް ވެފައިވާ 48 މުވައްޒަފަކާއި 21 ފަތުރުވެރިއަކު އެބަތިއްބެވެ.
މިއަދު ބަލިޖެހުނު މީހުންގެ ތެރެއިން 19 މީހަކު ފިޔަވައި ހުރިހާ އެންމެންނަކީ ވެސް މާލެ ސަރަހައްދުން ބަލިޖެހުނު މީހުންނެވެ.
