ހެޕީ މާކެޓްގެ "ގްރީން ފްލީޓް" ގެ ބޭނުންކޮށްގެން ތަކެތި އުފުލުމާއި ފޯރުކޮށްދިނުމުގެ ޚިދުމަތް ދޭން ފްށައިފިއެވެ. މިއީ ތެޔޮ އަންދައިގެން ދުއްވާ އެއްގަމު އުޅަނދުފަހަރުގެ ބަދަލުގައި ބެޓެރިން ދުއްވާ އުޅަނދުފަހަރުގެ ބޭނުން ކޮށްގެން ދޭން ފެށި ޚިދުމަތެކެވެ. ބޭނުމަކީ ވިހަ ދުމުގެ ސަބަބުން ރާއްޖޭގެ ތިމާވެށްޓަށް ކުރާ ނޭދެވޭ އަސަރު ކުޑަކުރުމުގައި އެހީތެރިވުމެވެ.
ހެޕީ މާކެޓުން ބެޓެރި އުޅަނދުފަހަރު ގެނެސްގެން ޓެސްޓު ކުރަމުން ގެންދާތާ ދުވަސްކޮޅެއް ވެއްޖެއެވެ. އެ ކުންފުނިން ބުނާ ގޮތުގައި ޓެސްޓުގެ ނަތީޖާ ރަނގަޅު ކަމަށް ފެނުމާއެކު މިހާރު ވަނީ ކުންފުނީގައި މިހާރު ބޭނުންކުރާ ތެޔޮ އަޅައިގެން ދުއްވާ 30 އުޅަނދުގެ ބަދަލުގައި ބެޓެރި އުޅަނދު ބޭނުން ކުރުމުގެ މަސައްކަތް ފަށައިފައެވެ.
ހެޕީ މާކެޓުން މައުލޫމާތު ދީފައިވާ ގޮތުގައި މި ވަގުތު ބެޓެރި އުޅަނދުފަހަރު ބޭނުން ކުރާނީ މާލެއާއި ހުޅުމާލޭގައެވެ. އެކަމަކު މާލޭގެ ސަރަހައްދުގެ އިތުރަށް އައްޑުއާއި ކުޅުދުއްފުށީގައިވެސް މި ބާވަތުގެ އުޅަނދުފަހަރު ބޭނުން ކުރަން ފަށާނެއެވެ.
