ޤަޟާޤަދަރަށް އީމާންވާ މީހަކު އޭނާގެ ޙަޔާތް ހޭދަކުރަމުންދާނީ ހިތްހަމަޖެހުމާއެކުގައި ކަމަށް މިއަދުގެ ހުކުރު ޚުޠުބާގައި ވިދާޅުވެއްޖެއެވެ.
ޚުޠުބާގައި ވިދާޅުވީ ޤަޟާގަދަރަށް ނުވަތަ މިންވަރަށް އީމާންވާ މީހަކު ފިތުނައިގެ ސަބަބުން ގުޑުގުޑު އަޅައިގެން ނުދާނެ ކަމަށެވެ. ދަތި އުދަނގޫކަމެއް ދިމާވުމުން އެފަދަ މީހަކު ބަލި ކަށިވެގެން ނުދާނެކަމަށެވެ. މިންވަރަށް އީމާން ވުމުގެ ސަބަބުން އަޅާއަށް ސުވަރުގެ ވަނުމަށް މަގުފަހުވެގެން ދާނެކަމަށެވެ. މާތްﷲ އާއި އެކަލާނގެ ރަސޫލާ އަންގަވައިފައިވާ ގޮތަށް އީމާންވެ، އަޤީދާ ވަރުގަދަކޮށްފި މީހާގެ ހަށިގަނޑާއި ގުނަވަންތަކުން އެކަން ފާޅުވެގެންދާނެކަމަށެވެ.
"ފެންނަ ތަކެއްޗާއި ނުފެންނަ ތަކެތީގައި ވެސް މާތްﷲގެ ކުޅަދުންވަންތަކަމާއި، ދެނެވޮޑިގަތުން ޝާމިލް ވެއެވެ. ވަންހަނާވެފައިވާ ކަންތައްތަކާއި، އަޅާގެ ހިތުގައި ހިނގާ ވަސްވާސްތައްވެސް އެކަލާނގެ ދެނެވޮޑިގެން ވެއެވެ. އަދި ވެގޮސްފައިވާ ކަންތައްތަކާއި، ވަމުންދާ ކަންތައްތަކާއި، ވާނޭކަންތައްތައްވެސް އެކަލާނގެ ދެނެވޮޑިގެން ވެއެވެ. މާތްﷲގެ ޢިލްމުފުޅާ ލައިގެން މެނުވީ އެއްވެސްކަމެއް ނުހިނގައެވެ." ޚުޠުބާގައި ވިދާޅުވިއެވެ.
ޚުޠުބާގައި ވިދާޅުވީ މާތްﷲ އީ ހުރިހާ ކަމެއް އައްސަވާ އަދި ބައްލަވާ ވޮޑިގެންވާ ކަލާނގެކަން އަބަދުމެ ހަނދާންކުރުމަކީ، ނަފްސަށް ހިތްހަމަޖެހުން ލިބިގެންދާނެ ކަމެއްކަމަށެވެ. ހުރިހާކަމެއް މެދުވެރިވެގެންދަނީ މާތްﷲގެ ޢިލްމުފުޅާ އެކަލާނގެ އިރާދަފުޅުންކަން އިޢުތިޤާދުކުރާ ބަޔަކު ބިރުގަނެ، ހިތްނުތަނަވަސްވެ މާޔޫސްވާކަށް ނުޖެހޭނެކަމަށެވެ. އިމާންކަން ހަރުދަނާވެ ތާޒާވުމަކީ ހިތުގެ ސާބިތުކަން ވަރުގަދަވެ، ޙަޔާތަށް އާރޯކަންލިބި އަމާންކަމާއި އުފާވެރިކަން ވެރިވެގެންދާނެކަމެއްކަމަށެވެ.
ދުނިޔޭގައި ހިނގާ ހުރިހާކަމެއް ހިންގަނީ މާތްﷲގެ ކުޅަދުންވަންތަކަމާއި އެކަލާނގެ އިރާދަފުޅުންކަމަށް އަޅުގަނޑުމެން އީމާންވާއިރު، އެކަނލާންގެ ޝަރުޢުކުރައްވައިފައިވާ ކަންތައްތަކަށް އަޅުގަނޑުމެން ކިޔަމަން ގަންނަން ޖެހެނެކަމަށް ޚުޠުބާގައި ވިދާޅުވިއެވެ. މާތްﷲ އަޅުގަނޑުމެންނަށް އަމުރުކުރައަވައިފައިވާ ކަންތައްތައް ދޫކޮށްލައިގެން ނުވާނެކަމަށް ވިދާޅުވިއެވެ. ހެޔޮކަންތައްތަކަށް ގޮވާލުމާއި ނުބައި ނޭދެވޭ ކަންތައްތައް ހުއްޓުވުމަށް މަސައްކަތް ކުރަންވާނެކަމަށް ވިދާޅުވިއެވެ. އިސްލާމީ ޝަރީޢަތުގައިވާގޮތަށް ޙަރާމްކަންތައް ޙަރާމްކަމުގައި ބަލައިގަނެ ޙަލާލުކަންތައް ޙަލާލުކަންތައް ކަމުގައި ބަލައިގަންނަން ވާނެކަމަށް ވެސް މިއަދުގެ ޚުޠުބާގައި ވިދާޅުވިއެވެ.
"މިއަދު މުޅި އިންސާނިއްޔަތަށް މެދުވެރިވެފައިމިވާ ނުރައްކާތެރި ކޮވިޑް 19ގެ ޙާލަތުގައި އަޅުގަނޑުމެންގެ އެންމެ ވަރުގަދަ ހަތިޔާރަކަށް ވާންޖެހޭނީ، ޤަޟާޤަދަރަށް އީމާންވުމާއި، ކެތްތެރިކަން އިސްކުރުމެވެ. އީމާންކަމާއި ކެތްތެރިކަމުން ހިމާޔްތް ލިބިގެންފިނަމަ، ދުނިޔެމަތީގައި ލިބެން އޮތް ހެވެއް އެއްވެސް މީހަކަށް އިޙްސާސެއް ނުކުރެވޭނެއެވެ. އަދި އާޚިރަތުގައި ކެތްތެރިންނަށް މާތްﷲ މިންވަރުކުރައްވައިފައިވާ ދަރުމައާއި ޘަވާބު އެއްވެސް މީހަކަށް ވަޒަނެއް ވެސް ނުކުރެވޭނެއެވެ." ޚުޠުބާގައި ވިދާޅުވިއެވެ.
