ރާއްޖޭގެ ރިސޯޓުތަކުން އެންމެ ފަހު ފަތުރުވެރިޔާ ފުރާ ތާރީޚުން ފެށިގެން، 14 ދުވަސް ހަމަވުމުން، އެ ރިސޯޓެއްގެ މުވައްޒަފުންނަށް ރިސޯޓުން ފުރައިގެން އެހެން ތަންތަނަށް ދިއުމުގެ ފުރުޞަތު ލިބިގެންދާނެ ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު ވިދާޅުވެއްޖެއެވެ.
ކޮވިޑް-19 ރައްކާތެރިވުމަށް އަޅާފައިވާ ހަރުދަނާ ފިޔަވަޅުތަކުގެ ދަށުން އެއްވެސް ރިސޯޓަކަށް އިތުރު ބަޔަކަށް ނުދެވޭނެއެވެ. އަދި ރިސޯޓަކުން ވެސް އިތުރު އެހެން ރަށަކަށް ނުދެވޭނެއެވެ. އެހެންނަމަވެސް އެއާޕޯޓަށް ފުރަންދާ ފަތުރުވެރިންނާއި އެމީހުން ފުރުވަންދާ މީހުންނަށް އެއާޕޯޓަށް ދެވޭނެއެވެ. އެކަމަކު ފަތުރުވެރިން ފުރުވާލުމަށްފަހު އިތުރު އެއްވެސް ތަނަކަށް ނުގޮސް އެމީހުން ފުރުވަން އައި މީހުންޖެހޭނީ ސީދާ އެރިސޯޓަށްދާށެވެ.
ނޫސްވެރިންނާ މިއަދު ހަވީރު ބައްދަކުރައްވައި އެމަނިކުފާނު ދެއްކެވި ވާހަކަފުޅުގައި ވިދާޅުވީ ކޮވިޑް-19 އާ ގުޅިގެން ސަރުކާރުން އަޅުއްވަމުން ގެންދަވާ ކޮންމެ ފިޔަވަޅެއްވެސް އަޅުއްވަމުން ގެންދަވަނ ސިއްހީ ތަޖުރިބާކާރުންގެ ލަފާގެ މަތިން ކަމަށެވެ. ކޮވިޑް-19 އާ ބެހޭ ގޮތުން އެންމެ އިހުބަސްވެސް އަދި ފަހުބަސް ވެސް ވިދާޅުވާނީ ސިއްޙީ ތަޖުރިބާކާރުން ކަމަށް އެމަނިކުފާނު ވިދާޅުވިއެވެ. "އެ ބޭފުޅުން އެ މަސައްކަތް ކުރައްވަނީ ތިޔަ ބޭފުޅުންނަށްޓަކައި. ތިޔަ ބޭފުޅުން ކޮށްދެއްވަންވީ ކަމަކީ، ބޭރަށް ނުކުމެވަޑައިނުގެން ގޭގައި މަޑުކޮށްދެއްވުން. އަޅުގަނޑު މިއަދު ލޮބުވެތި ރައްޔިތުންނަށް ވެސް ދަންނަވަން އޮތީ، މިއަދު ތިޔަ ބޭފުޅުން ވެސް ޢަމަލު ކުރައްވަންވީ، ޞިއްޙީ ތަޖުރިބާކާރުން އެ ދެއްވާ އިރުޝާދުތަކާ އެއްގޮތަށޭ،" ރައީސް ވިދާޅުވިއެވެ.
ރާއްޖޭގައި ކޮވިޑް-19 ފެތުރުނަ ނުދިނުމަށްޓަކައި ސިއްޙީ ޚިދުމަތްތެރިން ކުރައްވާ މަސައްކަތަށް، އެ ބޭފުޅުންނަށް ޝުކުރު ދަންނަވާ ކަމަށާއި، އެމަނިކުފާނު މިއަދު އެންމެ ބޭނުންފުޅުވަނީ ރާއްޖޭގައި އެ ބަލި ފެތުރުނަ ނުދިނުމަށް، ސިއްހީ ޚިދުމަތްތެރިން ކުރައްވާ މަސައްކަތަށް، އެ ބޭފުޅުންނަށް ޝުކުރު ދެންނެވުމަށް ކަމަށް ވެސް ރައީސް ވިދާޅުވިއެވެ.
