ކޮވިޑް-19 ގެ އިމަޖެންސީ ހާލަތަށް ތައްޔާރުވުމަށް ބޮޑު ފަރިތަކުރުމެއް މާލޭގައި މިއަދު ފަށައިފި އެވެ. ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ހާމަކޮށްފައިވާ ގޮތުގައި މި ފަރިތަކުރުންތައް ކުރިއަށް ގެންދާނީ މިއަދު މެންދުރު 12:30 ން ފެށިގެން މެންދުރުފަހު 3:30 ގެ ނިޔަލަށެވެ.
މިފަރިތަކުރުންތައް ކުރިއަށް ދާނީ މާލޭގެ ތިން ސަރަޙައްދެއްގައެވެ. ފަރިތަކުރުންތައް ކުރިއަށް ދާއިރު އެސަރަޙައްދުތަކަށް ވަދެ ނުކުތުން ވަގުތީ ގޮތުން ހުއްޓުވުން އެކަށީގެންވާކަމަށް ވެސް އެޗްޕީއޭ އިން އާންމުކޮށް ވަނީ އިޢުލާންކޮށްފައެވެ. މިފަރިތަކުރުން ކުރިއަށް ގެންދަވަނީ ކަމާބެހޭ މުއައްސަސާތަކުގެ މެދުގައެވެ. ފަރިތަކުރުން ކުރިއަށްދާއިރު މުޢައްސަސާތަކުން ދެއްވާ އިރުޝާދާ އެއްގޮތަށް ޢަމަލު ކުރުމަށް ވެސް އެޗްޕީއޭ އިން ވަނީ އެދިފައެވެ.
ކުރިން ވެސް މާލޭގައި ވަނީ ކޮވިޑް-19 އަށް ތައްޔާރުވުމުގެ ފަރިތަކުރުމެއް މުޢައްސަސާތަކުގެ މެދުގައި ކުރިއަށް ގެންގޮސްފައެވެ.
ރާއްޖޭން މިހާތަނަށް ކޮވިޑް-19 ޖެހިފައިވަނީ 13 މީހުންނަށެވެ. އޭގެތެރެއިން ފަސް މީހުން މިހާރުވަނީ ބަލިން ރަނގަޅިވެފައެވެ. ރާއްޖޭގައި މިބަލި ޖެހުނު މީހުންގެ ތެރޭގައި މުޅިންވެސް ހިމެނެނީ ރާއްޖެއަށް އައި ފަތުރުވެރިންނާއި ރާއްޖޭގައި މަސައްކަތްކުރާ ބިދޭސީންނެވެ. ނަމަވެސް ޔޫއޭއީގައި ފުތަމަ ފަހަރަށް ދިވެއްސަކު ވަނީ މިބައްޔަށް ޕޮސިޓިވް ވެފައެވެ.
