ޙާޞިލްވި އެންމެ މަތިވެރި އިބުރަތަކީ ޤައުމީ އެއްބައިވަންތަ ކަމުގެ މުހިންމު ކަމެވެ. ޤައުމަށް ދިމާވާ ބޮޑެތި ކަންތައް ތަކުގައި ސިޔާސީ ފިކުރު ތަކާއި ޚިޔާލު ތަފާތުވުންތައް އެއްފަރާތްކޮށް ސަރުކާރާއި ރައްޔިތުންގެ އެންމެން އެއްބައެއްގެ ގޮތުގައި މަސައްކަތް ކުރުމަށް އެމްއާރު އެމުން ގޮވާލައިފިއެވެ.
އެއްބައިވަންތަ ކަމުގެ ދުވަހާ ގުޅިގެން ނެރުއްވި ބަޔާނެއްގައި މޯލްޑިވްސް ރިފޯމް މޫވްމަންޓް (އެމްއާރުއެމް) އިން ވިދާޅުވެފައިވަނީ ޤައުމަށް ދިމާވާ ބޮޑެތި ކަންތައްތަކުގައި ޤައުމީ އެއްބައިވަންތަ ކަމަށް އިސްކަން ދެއްވުމަށެވެ. "ދިވެހީންގެ އިޞްލާޙީ ޙަރަކާތް ތަކަކީ އެކުވެރިކަމާއި އެއްބައިވަންތަ ކަމާއެކު މަޝްވަރާ ކޮށްގެން ކުރާ މަސައްކަތްތަކެއް ކަމުގައި ހެއްދެވުމަށެވެ. މާޒީގެ ޢިބްރަތުން އަޅުގަނޑުމެންނަށް ލިބިފައިވާ ފިލާވަޅުތައް މުސްތަޤުބަލް ބިނާކުރުމުގައި ބޭނުން ކުރެއްވުމަށެވެ." އެބަޔާނުގައި ވެއެވެ.
އެމްއާރުއެމުން ނެރުއްވާފައިވާ ބަޔާނުގެ ވިދާޅުވެފައިވަނީ މީގެ ފަނަރަ އަހަރު ކުރީން އައި ޑިސެމްބަރުމަހުގެ ސައްބީސްވަނަ ދުވަހު ކުރިމަތިވި ސުނާމީ ކާރިސާއާއި ގުޅިގެން ދިވެހި ރައްޔިތުން ދެއްކެވި ޤައުމީ އެއްބައިވަންތަ ކަމުގެ ޒިކުރާ މިއަދު އައުކުރަންޖެހޭ ކަމަށެވެ. އެދުވަހުވަކިވެގެންދިޔަ އަޚުންނާއި އުޚުތުންގެ ފުރާނައަށް ﷲ ސުބުޙާނަހޫ ވަތަޢާލާގެ މަތިވެރި ރަޙުމަތާއި ސަވާބަށް އެދި މިއަދުވެސް ދުޢާކުރާ ކަމަށް އެބަޔާނުގައި ވިދާޅުވެފައިވެއެވެ.
ސުނާމީ ކާރިސާއަކީ އޭގެ ކުރިން ދުވަހަކުވެސް ރައްޔިތުން ދެކެފައިނުވާ ފަދަ ބިރުވެރި ދުވަހެއް ކަމަށާއި، އެކާރިސާގައި 82 މީހުން ނިޔާވެ، 26 މީހަކު ވީނުވީއެއް ނޭނގި ގެއްލިފައި ވެއެވެ. ސުނާމީގެ ސަބަބުން ފަނަރަ ހާހެއްހާ މީހުންގެ ގެދޮރު ހަލާކުވެ ގޮސްފައި ވެއެވެ. އަދި ރާއްޖޭގެ އާބާދީގެ 60 އިންސައްތައެއްގެ މަތީ އަދަދެއްގެ މީހުންނަށް އެކި ކަހަލަ ގެއްލުން ލިބިފައިވާކަން އެބަޔާނުގައި ވަނީ ހަނދާން ކޮށްފައެވެ.
"މިއަދު އަޅުގަނޑުމެން މިދުވަސް ފާހަގަކުރަމުން ދާއިރު، އަޅުގަނޑުމެންގެ ހިތައް ގެންނަންވީ އެދުވަހު އެ ކާރިސާ އާ ގުޅިގެން މުޅިޤައުމަށް ވެރިވެފައިއޮތް ނާމާން ކަމާއި ހިތްދަތިކަމާ ކުރިމަތި ލުމުގައި ދިވެހިރައްޔިތުން ދެއްކެވި ހަރުދަނާ ޤައުމީ އެއްބައިވަންތަ ކަމެވެ. އިސްލާމީ ވަރުގަދަ ޢަޤީދާ އާއެކު ދިވެހި ރައްޔިތުން ސާބިތުކޮށްދެއްވި ކެތްތެރި ކަމާއި ހިތްވަރު ގަދަކަމެވެ. ކިޔަމަންތެރި ކަމާއި އިޚުލާޞްތެރި ކަމެވެ. މިކަން ކަމުގެ ނަތީޖާއަކަށްވީ އަޅުގަނޑުމެން އެންމެންވެސް ޤަބޫލުކުރަން ޖެހޭނެ ފަދައިން، އެދުވަހު ޙާލުގައި ޖެހުނު އަޚުންނާއި އުޚުތުންނަށް ބޭނުންވި އެހީތަށް ހަމަ ވަގުތުން އެފަރާތްތަކަށް ފޯރުކޮށްދިނުމެވެ. އަދި އެކަމުން ލިބުނު ގެއްލުންތައްބަލާ ފުރިހަމަ ރޭވުންތަކާއެކު އެކަންކަން ރަނގަޅު ކޮށްދެއްވުމެވެ."
ސުނާމީގެ ކާރިސާ އަކީ ﷲ ސުބުހާނަހު ވަތަޢާލާ އަޅުގަނޑުމެނަނަށް ކުރިމަތި ކުރެއްވި ވަރަށް ވަރުގަދަ އިމްތިޙާނެއް ކަމަށް ވެސް އެބަޔާނުގައި ވިދާޅުވެފައިވެއެވެ.
