ކުއްލިއަކަށް ލިބޭ ނަފާ ހޯދަން ރާއްޖޭގެ ފަޅުން ބިންހިއްކައިގެން ރިސޯޓު ހެދުމަކީ އެމަނިކުފާނު އެއްގޮތަކަށް ގަބޫލު ކަމެއްނޫން ކަމަށް ރައީސް އޮފީހުގެ މިނިސްޓަރ އަހުމަދު ނަސީމް ވިދާޅުވެއްޖެއެވެ.
ނަސީމަކީ ރާއްޖެއަށް ފަތުރުވެރިކަން ތައާރަފް ކުރެއްވުމުގައި އިސްކޮށް އުޅުއްވި މަދު ބޭފުޅުންގެ ތެރެއިން ބޭފުޅެކެވެ. މިނިސްޓްރީ އޮފް ޓޫރިޒަމުން މިހާރު ބާއްވަމުން ގެންދަވާ "ބުރަބި" ޖަލްސާގައި ވާހަކަފުޅު ދައްކަވަމުންނެވެ.
މިނިސްޓަރ ވިދާޅުވީ ރާއްޖޭގެ އެ ކިސަރަހައްދުތަކުން ފަޅުތަކާއި، ފިނޮޅުތައް ހިއްކަމުން ގޮސް ދޫނި ބިސްއަޅާނެ ތަނެއްވެސް މިހާރުނެތް ކަމަށެވެ. އެމަނިކުފާނު ގުޅީފަޅަށް ވަޑައިގެން ބެއްލެވިއިރު އެތަނުގެ މުރަކަތައް ވަނީ ފުނޑުފުނޑު ވެފައި ކަމަށް ވިދާޅުވިއެވެ. "ގުޅީފަޅު ހިއްކުމުގެ ސަބަބުން އެތާގައި ނެތް ދިރުންހުރި މުރަކައެއް. ކޮންމެހެން ހިއްކަންޖެހޭ ތަނެއްނޫނިއްޔާ ހިއްކުމަކީ ކުރަންޖެހޭނެ ކަމެއްނޫން. އެއިން ލިބޭ ގެއްލުން މާބޮޑު،" މިނިސްޓަރ ވިދާޅުވިއެވެ. މިނިސްޓަރ ވިދާޅުވީ ފަރުތަކަކީ ރާއްޖޭގެ ދިރުން ކަމަށެވެ. ދިވެހިރާއްޖެއަކީ ދިރިދިރި އޮންނަ ރާއްޖެއެއް ކަމަށް އެމަނިކުފާނު ވިދާޅުވިއެވެ.
މި ޖަލްސާގައި ވާހަކަފުޅު ދައްކަވަމުން އެމަނިކުފާނު ވިދާޅުވީ ރާއްޖޭގެ ފަތުރުވެރިކަން މިހާރަށްވުރެ ބޮޑަށް ކުރިއެރުވިދާނެ ކަމަށެވެ. އެއީ ރާއްޖެއަކީ ސަގާފީ ތަރިކަ ހިމެނޭ ރާއްޖެއަކަށް ވުމުން އެ ވިއްކައިގެން ނުވަތަ އެތަންތަން ދައްކައިގެން ފަތުރުވެރިކަން ޕްރޮމޯޓު ކޮށްގެން ކަމަށް މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ މާލެއަށް ބެއްޔަސް ވަރަގިނަ އާސާރީ ތަންތަން ހުރިކަމަށެވެ. އެގޮތުން ހުކުރުމިސްކިތުގައި ވާދޫ ދަންނަ ކަލޭފާނު ކިޔަވައިދެއްވަން އިންނެވިދާލަ ހިމެނޭ ކަމަށެވެ. އެހެންނަމަވެސް އެތަން ހިމެނޭ ދޮރާށި ވަނީ ތަޅާލަފައި ކަމަށެވެ. އަދި މާލޭގައި ކުރިން ހުރު ބުރިޖާއި އުސްފާރު އަދާހަމައަށް ހުރިނަމަ އެއީ ފަތުރުވެރިންނަށް މުހިންމު ތަންތަންކަމަށްވާނެ ކަމަށެވެ. އެހެންނަމަވެސް އެތަންތަން ވެސް ވަނީ ސުންނާފަތި ކޮށްފައި ކަމަށެވެ. ބުރިޖުތަކަކީ އެތައް ސަތޭކަ އަހަރުވެފައިހުރި ތަންތަން ކަމަށް ވެސް ނަސީމް ވިދާޅުވިއެވެ. އެފަދަ ތަންތަން ނައްތާލާ ވެރިއަކު ދެން ރާއްޖޭގެ ވެރިކަމަށް ގެނެސްގެން ނުވާނެ ކަމަށް ވެސް ނަސީމް ވިދާޅުވިއެވެ.
