ހަރުކަށި ފިކުރަށް ތަބާވާ މީހުންގެ 1400 އެއްހާ މީހުން ދިވެހި މުޖުތަމައުގައި އުޅެމުންދާ ކަމަށް ޕޮލިސް ކޮމިޝަނަރު މުޙައްމަދު ހަމީދު ވިދާޅުވެއްޖެއެވެ.
ވިއަވަތި ރާއްޖެ ބައްދަލުވުމުގައި ވާހަކަ ދައްކަވަމުން އޭނާ ވިދާޅުވީ މިހާތަނަށް އެނގިފައވާ ގޮތުގައި ޖިހާދުގެ ނަމުގައި ސީރިއަށް ގޮސްފައިވަނީ173 މީހުންކަމަށެވެ. އެއީ ސީރިއާއި އިރާގުގައި ހިނގައިދިޔަ ދާޚިލީ ހަމަނުޖެހުމުގެ ތެރެއަށް ވަންނަން ދިވެހީންގެ ތެރެއިން ޝައުގުވެރިކަންހުރި އެދި އެ ދެގައުމަށްދާން އެކިގޮތްގޮތުން މަސައްކަތްކުރި 423 ދިވެހީންގެ ތެރެއިން ދެވުން އަދަދު ކަމަށް ވެސް ކޮމިޝަނަރ ވިދާޅުވިއެވެ. "ރާއްޖޭގެ އެކިކަންކޮޅުތަކުގައި ހަރުކަށި ފިކުރުގެ ތެރެއަށް ވެއްޓި ޖެހިގެން ހުންނަ މީހާގެ ފުރާނަ ނަގާލުމަށް ފަސްނުޖެހޭ ވަރަށް އެފިކުރުގެ ތެރެއަށް ވެއްޓިފައިވާ ސާދަސަތޭކައާ ގާތްކުރާ ޢަދަދކަށް ދިވެހީން މިއަދު އަޅުގަނޑުމެންނާއެކު އެބަތިބި،" ހަމީދު ވިދާޅުވިއެވެ.
ސީރިއާގައި މިހާރު އުޅެމުންދާ މީހުންނަށް ބަލާއިރު 91 ޕަސެންޓް މީހުންނަކީ އަންހެނުންނާއި ކުޑަކުދިންނެވެ. ފިރިހެނުންގެ ނިސްބަތަކީ 9 ޕަސެންޓު ކަމަށް ފުލުހުން ވިދާޅުވިއެވެ.
ޕޮލިސް ކޮމިޝަނަރު ވިދާޅުވީ ރާއްޖޭގައި ހަރުކަށި ފިކުރުގެ މީހުން އުޅޭތާ ދުވަސް ވެއްޖެ ކަމަށެވެ. ސީރިއާއަށް އެމީހުން ދިއުމުގެ ކުރިން ޕާކިސްތާނާއި އަފްޣާނިސްތާން ފަދަ ގައުމުތަކުގައި ހިނގައިދިޔަ ހަނގުރާމަތަކުގައި ދިވެހީންގެ ތެރެއިން އެތައް ސަތޭކަބަޔަކު ބައިވެރިވި ކަމަށެވެ. އޭގެތެރެއިން ބައެއް މީހުން އެނބުރި ރާޖެއައިސް ހަރުކަށި ފިކުރު ފެތުރުމަށް ދިވެހި މުޖުތަމައުގައި ހަރަކާތްތެރިވަމުންދާ ކަމަށް އޭނާ ވިދާޅުވިއެވެ. ޤާނޫނުގެ ތެރެއިން މިކަންކަން ހައްލު ކުރުމަށް މަސައްކަތް ކުރަމުންދާ ކަމަށް އޭނާ ވދާޅުވިއެވެ. މިހާރުވެސް މިފަދަ ކަންކަމުގެ ފަހަތުގައިވާ މީހުން ހޯދައި ޤާނޫނުގެ ކުރިމައްޗަށް ގެނައުމުގެ މަސައްކަތް ކުރަމުންދާ ކަމަށް ހަމީދު ވިދާޅުވިއެވެ.
