މަޤާމުން ވަކިކުރުމުގެ މައްސަލަ ރައްޔިތުންގެ މަޖިލީހުގެ ޖުޑިޝަރީ ކޮމެޓީގައި ކުރިއަށްދަނިކޮށް ޕްރޮސިކިއުޓަރ ޖެނަރަލް (ޕީޖީ) އައިޝަތު ބިޝާމް އިސްތިއުފާ ދެއްވައިފިއެވެ. އެކަމަނާ މަޤާމުން އިސްތިއުފާ ދެއްވައި ރައީސް އިބްރާޙީމް މުޙައްމަދު ޞާލިޙަށް މިއަދު ހެދުނު ވަނީ ސިޓީ ފޮނުއްވާފަ އެވެ.
އިސްތިޢުފާގެ ސިޓީއާ ގުޅިގެން ރައީސް އިބްރާޙީމް މުޙައްމަދު ޞާލިޙު ވަނީ ޕީޖީގެ މަޤާމުގައި ބިޝާމް ކޮށްދެއްވި ޚިދުމަތަށް ޝުކުރުއަދާކުރައްވައި، މުސްތަޤްބަލަށް ކާމިޔާބީއަށް އެދިވަޑައިގަންނަވާކަމަށް ވިދާޅުވެފައެވެ. މިކަން ހާމަކުރައްވައިފައި ވަނީ ރައީސުލް ޖުމްހޫރިއްޔާ ކުރައްވައިފައިވާ ޓްވީޓެއްގައެވެ.
މަޤާމުން ވަކިކުރުމުގެ މައްސަލައިގައި ރައްޔިތުންގެ މަޖިލީހުގެ ޖުޑިޝަރީ ކޮމިޓީއަށް މިއަދު 11 ޖަހާއިރު ހާޒިރުވެ ތުހުމަތުތަކަށް ޖަވާބުދާރީވުމަށް ބިޝާމަށް އޮތީ އަންގާފަ އެވެ. އިސްތިއުފާ ދެއްވުމުގެ ކުރިން ބިޝާމް ނެރުއްވި ބަޔާނެއް ގައި ވިދާޅުވެފައި ވަނީ އެކަމަނާ މަޤާމުން ވަކި ކުރުމުގެ އިޖުރާތުތައް ފަށާފައިވަނީ ޤާނޫނު އަސާސީގެ ރޫހާ ހިލާފަށް ކަމަށެވެ.
ޕީޖީގެ މަޤާމަށް ބިޝާމް އައްޔަން ކުރީ ކުރީގެ ރައީސް ޢަބްދުﷲ ޔާމީންގެ ވެރިކަމުގައެވެ. އޭރު އިދިކޮޅު ސިޔާސީ ލީޑަރުންނަށް ދައުވާ އުފުލުމާ ގުޅިގެން، އިދިކޮޅު ފަރާތްތަކުގެ ފާޑުކިޔުން ވެސް އެކަމަނާއަށް ވަރަށްބޮޑަށް އަމާޒުވިއެވެ.
