ރައްޔިތުންގެ މަޖިލީހުގެ މިދައުރު އަންނަމަހުގެ ފަހަކަށް ދިގުދައްމާލަން މަޖިލީހުން މިއަދު ފާސްކޮށްފިއެވެ. މި ގޮތަށް ފާސްކުރީ 32 މެމްބަރުންގެ އަޣުލަބިއްޔަތުންނެވެ. ނަމަވެސް ދައުރު ދިގުދައްމާލުމާ ދެކޮޅަށް ދެ މެންބަރަކު ވޯޓު ދެއްވި އެވެ.
މަޖިލީހުގެ ޤަވާއިދުގައި ބުނާ ގޮތުން ރައްޔިތުންގެ މަޖިލީހުގެ މިހާރު ހިނގަމުންދާ، މިއަހަރުގެ ފަހު ދައުރު ނިމޭނީ މިމަހުގެ ނިޔަލަށެވެ. ނަމަވެސް ދައުރު ނިންމުން އިތުރު ހަފަތާއަކަށް ދިގު ދައްމާލުމަށް މަޖިލީހުން ފާސްކުރެއްވީ ގިނަ މަސައްކަތްތަކެއް ކުރަން ހުރުމުންނެވެ.
މަޖިލީހުގެ ތަޅުމަށް ގެންނަން ހުރި މުހިންމު ބިލްތަކާއި މަސައްކަތްތަކުގެ ތެރޭގައި އަންނަ އަހަރަށް ލަފާކުރާ ދައުލަތުގެ ބަޖެޓާއި، އިންކަމް ޓެކްސްގެ ބިލާއި، ޤާނޫނު އަސާސީގެ ލާމަރުކަޒީ ބާބަށް އިސްލާހު ގެނައުމުގެ ބިލާއި ލާމަރުކަޒީ ގާނޫނަށް އިސްލާހު ގެނައުމުގެ ބިލް ހިމެނެއެވެ. އަންނަ އަހަރަށް ލަފާކުރާ ދައުލަތުގެ ބަޖެޓްގެ މަސައްކަތް ބަޖެޓް ކޮމިޓީން މިހާރު ވަނީ ނިންމައިފައެވެ. ބިލްތަކުގެ މަސައްކަތް އޮތީ ކޮމިޓީ މަރުހަލާގަ އެވެ.
މިހާރު ހިނގަމުން މިދަނީ 19 ވަނަ ރައްޔިތުންގެ މަޖިލީހުގެ ދެވަނަ ދައުރެވެ. 19 ވަނަ ރައްޔިތުންގެ މަޖިލީހުގެ މިދިޔަ ދައުރުވެސް ނިންމާލައިފައި ވަނީ އިތުރު ހަފްތާއަކު މަސައްކަތް ކުރުމަށްފަހުއެވެ. މިދިޔަ ދައުރަކީ ރައްޔިތުންގެ މަޖިލީހުގެ ޙަޔާތުގައި އެންމެ ގިނަ ޢަދަދަކަށް ބިލްތަކާއި ޤަރާރުތަކާއި އެނޫންވެސް މަސައްކަތް ކޮށްފައިވާ ދައުރެވެ. އަދި ދައުރުން ބޭރުގައި ޖަލްސާތަކެއް ބާއްވައި ވަނީ ޓެރެރިޒަމް މަނާ ކުރުމާބެހޭ ބިލްގެ މަސައްކަތް މަޖިލީހުން ނިންމަވައިފައެވެ.
