ނަސްރުގެ ދުވަހުގެ ތަހުނިޔާ ވިދާޅުވެ ކުރިމިނަލްކޯޓުގެ މުވައްޒަފުންގެ ވައިބަރ ގުރޫޕުގައި ރައީސް ނަޝީދާއި، ރައީސް އިބްރާހީމް މުޙައްމަދު ސާލިހުގެ ކަރުގައި ޗޭން ޖަހައި ގަންހިންގާ ފޮޓޯ ލެވުނު މައްސަލާގައި ގާޒީ އަހުމަދު ހައިލަމް މަޢާފަށް އެދިވަޑައިގެންފިއެވެ.
ކުރިމިނަލް ކޯޓުގެ އިސްގާޒީ އަހުމަދު ހައިލަމް މިރޭ ނެރުއްވާފައިވާ ބަޔާނެއްގައި ވިދާޅުވެފައިވަނީ އެ ގުރޫޕަށް ފޮޓޯލީ އޭގައި ހ. ހާޖަރާގޭ، ޢަބްދުﷲ ލުތުފީ ހުރުމުންނެވެ. ފޮޓޯ ޕޯސްޓު ކުރުމުގެ ކުރިން އެފޮޓޯގައި ނުވަތަ ކުރެހުމުގައި ދެންތިބީ ކޮންބައެއްތޯ ނުބައްލަވާ ކަމަށްވެސް އޭނާ ވިދާޅުވެފައިވެއެވެ. "ނަސްރުގެ ދުވަހު ތަހުނިޔާ ކިޔުމުގެ ގޮތުން އަޅުގަނޑު ލައިފައިވާ ފޮޓޯ އެ ގުރޫޕަށް ލައިފައިވަނީ އެ
ފޮޓޯގައި ހ. ހާޖަރާގޭ ޢަބްދުﷲ ލުތުފީ ހުރިކަން އެނގުމުން، ދެން އެފޮޓޯގައި ތިބި ފަރާތްތަކަކީ ކޮންބައެއްތޯ ބެލުމަކާ ނުލައެވެ. ވައިބާ ގުރޫޕަށް އަޅުގަނޑު އެފޮޓޯ ލީއިރު އެފޮޓޯގައިވާ ކުރެހުމުގައި ދިވެހިރާއްޖޭގެ ރައީސުލްޖުމްހޫރިއްޔާ އިބްރާހީމް މުހައްމަދު ސާލިހުގެ އިތުރުން ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދުއަށް ނިސްބަތް ކުރެވޭފަދަ ކުރެހުމެއް ހުރިކަން އަޅުގަނޑަށް އެނގިފައި ނުވެއެވެ. އެފޮޓޯގައިވާ އެފަދަ ކުރެހުމެއް ހުރެދާނެ ކަމަށް އަޅުގަނޑަށް ވިސްނާލެވިފައެއްވެސް ނުވެއެވެ." ހައިލް ނެރުއްވާފައިވާ ބަޔާނުގައި ވިދާޅުވެފައިވެއެވެ.
އެނގި ވަޑައިގަތުމަކާ ނުލައި ވެސް އެކަން ކުރެއްވުނީތީ ރައީސުލްޖުމްހޫރިއްޔާ އިބްރާހީމް މުހައްމަދު ސާލިހާއި، ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދާއި، ދިވެހިރައްޔިތުންގެ ކިބައި އޭނާ މަޢާފަށް އެދިވަޑައިގަންނަވާ ކަމަށް އެބަޔާނުގައި ވިދާޅުވެފައިވެއެވެ.
ނޫސްވރިންނާއި ސޯޝަލް މީޑިޔާ ގުރޫޕުތަކުގެ މެންބަރުންނަށް ދަންނަވާލަންޖެހެނީ ތިބޭފުޅުންގެތެރެއިން ބައެއް ބޭފުޅުންގެ ލިއުއްވާ ލިޔުންތައް އިބާރާތްކުރައްވާގޮތުންނާއި އަދި ވިދާޅުވާ ވާހަކަތަކުގެ ސަބަބުން މުޅިގައުމު ހަލާކުގެ ތެރެއަށް ވެއްޓިގެން އެބަދެއެވެ. އެކަމުގެ އަސަރު ތިބޭފުޅުންގެ އާއިލާތަކަށާއި، ރައްޓެހިންނަށާއި، ތިބޭފުޅުން ބޭނުންކުރައްވާ އަސާސީ ޚިދުމަތާއި ގައުމު ހިންގުމުގެ ޚަރަދަށް ބޭނުންވާ ފައިސާ ހޯދަދޭ އިންވެސްޓަރުންގެ އިތުބާރު ދަނީ ގެއްލުމުންނެވެ. އެހެންކަމުން ތިބޭފުޅުންގެ އަމަލުތަށް ރައްޔިތުން އުފަލުގައި އެކުވެރިކަންމަތީ އުޅެވޭނެގޮތަށް އިސްލާހުކުރެއްވުމަށް ވަރަށް އިހުތިރާމާއިއެކު ދަންނަވަމެވެ.