ރެގިއުލަރައިޒޭޝަން ޕްރޮގްރާމުގެ ދަށުން މިހާތަނަށް 14000 ބިދޭސީންނަށް އެޕޮއިންޓްމަންޓް ދޫކޮށްފައިވާ ކަމަށް އިކޮނޮމިކް ޑިވެލޮޕްމަންޓް މިނިސްޓްރީން ވިދާޅުވެއްޖެއެވެ.
މަޖިލީހުގެ ޤައުމީ ސަލާމަތާއި ޚާރިޖީ ގުޅުންތަކުގެ ކޮމިޓީއަށް މައުލޫމާތު ދެއްވަމުން މިއަދު އެ މިނިސްޓްރީން ވިދާޅުވެފައިވަނީ ބިދޭސީންގެ ތެރެއިން 90 ޕަސެންޓް މީހުންގެ އަތުގައި ޕާސްޕޯޓު ނެތްކަމަށެވެ. ޕާސްޕޯޓު ނެތް މީހުންނަށް ޕާސްޕޯޓު ހޯދައިދިނުމަށް އިކޮނޮމިކް މިނިސްޓްރީއާއި މިނިސްޓްރީ އޮފް ފޮރިން އެފެއާޒު ގުޅިގެން ގެންދަނީ މަސައްކަތް ކުރައްވަމުންނެވެ. އެގޮތުން އެ ދެ މިނިސްޓްރީން ވަނީ ހުރިހާ ހައިކޮމިޝަންތަކާ ބައްދަލު ކުރައްވައިފައެވެ. އަދި ޢާއްމުކޮށް ޕާސްޕޯޓު ލިބޭމުއަދަތަކަށްވުރެ އަވަހަށް ޕާސްޕޯޓު ލިބޭތޯ ވެސް ގެންދަވަނީ މަސައްކަތް ކުރައްވަމުންނެވެ.
އިކޮނޮމިކް މިނިސްޓްރީގެ ޑެޕިޔުޓީ މިނިސްޓަރ ނާޒިމާ ވިދާޅުވެފައިވަނީ ބައެއް މީހުންނަށް ޕާސްޕޯޓު ހަމަޖައްސައިދޭން ތިން މަހާއި ހަ މަސް، ނުވަތަ އެއަށް ވުރެ ދިގު ދުވަސް ހޭދަވެދާނެ ކަމަށް ބަންގްލަދޭޝް ހައި ކޮމިޝަނުން ވިދާޅުވި ކަމަށެވެ.
ޤަވާޢިދާ ޚިލާފަށް ރާއްޖޭގައި އުޅެމުންދާ ބިދޭސީންގެ މައްސަލަ ޙައްލު ކުރުމަށް މި ސަރުކާރުން ގެންދަވަނީ ސީރިއަސް މަސައްކަތްތަކެއް ކުރައްވަމުންނެވެ. އެމަސައްކަތްތައް ނިމޭއިރު ޤަވާޢިދާ ޚިލާފަށް އުޅޭ ބިދޭސީއަކު ރާއްޖެއަކު ނުހުންނާނެއެވެ. މި ޕްރޮގްރާމަށްފަހު ވެސް ބިދޭސީންގެ މައްސަލަ ބޮއްސުން ލިޔަނުދީ ޤަވާޢިދުގެ ތެރެއިން ކުރިއަށް ގެންދަވާނެ ކަމަށް އިކޮނޮމިކް މިނިސްޓްރީން ވަނީ ވިދާޅުވެފައެވެ.
