އެލައިޑް އިންޝުއަރެންސް ގައުމީ ފިރިހެން ވޮލީބޯޅަ ލީގުގެ ޗެމްޕިއަންކަން ދިވެހި ސިފައިންގެ ކުލަބު ހޯދައިފިއެވެ.
މިމުބާރާތުގެ ޗެމްޕިއަންކަން ދިވެހި ސިފައިންގެ ކުލަބު ހޯދާފައިވަނީ ރޭ މޯލްޑިވިއަން ސްޕޯޓްސް އެންޑް ރެކްރިއޭޝަން ކްލަބްގެ ޓީމާ ބައްދަލުކޮށް ތިން ސެޓު އެއް ސެޓުން މެޗު ކާމިޔާބުކޮށްގެންނެވެ. ޒުވާނުންގެ މަރުކަޒުގެ އިންޑޯރ ކޯޓުގައި ކުޅުނު ފޯރިގަދަ މިމެޗުގެ ފުރަތަމަ ސެޓް ޑީއެސްސީން ކާމިޔާބުކޮށްފައިވަނީ 25 ޕޮއިންޓު 22 ޕޮއިންޓުންނެވެ. މިމެޗުގެ ދެވަނަ ސެޓް 25-21 ން މޯލްޑިވިއަން ކާމިޔާބުކުރިއިރު ތިންވަނަ ސެޓު 25-20 ން ކާމިޔާބުކޮށްފައިވަނީ ޑީއެސްސީއެވެ. އަދި ހަތަރުވަނަ ސެޓު ޑީއެސްސީން ކާމިޔާބުކޮށްފައިވަނީ 25 ޕޮއިންޓު 18 ޕޮއިންޓުންނެވެ.
މިމެޗު ނިމުމުން ޗެމްޕިއަން ޓީމަށް މެޑަލް ހަވާލުކޮށްދެއްވީ މިނިސްޓަރ އޮފް ޑިފެންސް އެންޑް ނޭޝަނަލް ސެކިއުރިޓީ އަލްފާޟިލް އާދަމް ޝަރީފް ޢުމަރެވެ. މިމުބާރާތުގެ ޗެމްޕިއަން ޓީމަށް ހޮވުނު ދިވެހި ސިފައިންގެ ކުލަބަށް ދެވޭ ހަނދާނީ ފިލާ ހަވާލުކޮށްދެއްވީ މިނިސްޓްރީ އޮފް ޔޫތު އެންޑް ސްޕޯޓްސް އަލްފާޟިލާ އިރުތިޝާމް އާދަމްއެވެ.
މިމުބާރާތުގެ ޑްރީމް ޓީމުގައި ޑީއެސްސީގެ ހަތަރު ކުޅުންތެރިއަކު ހިމެނިފައިވެއެވެ. އޭގެ ތެރޭގައި ހިމެނެނީ ސްޓާފް ސާޖަންޓް އަޙްމަދު އަބްދުލް ކަރީމް އާއި ލާންސް ކޯޕްރަލް އަޙްމަދު އަނިލް އާއި ލާންސް ކޯޕްރަލް އާދަމް ނަސީމްގެ އިތުރުން އިޝާން މުޙައްމަދެވެ. މިމުބާރާތުގެ ހުރިހާ ގޮތަކުން އެންމެ މޮޅު ދިވެހި ކުޅުންތެރިއަކަށް ދިވެހި ސިފައިންގެ ކުލަބުގެ ލާންސް ކޯޕްރަލް އާދަމް ނަސީމް ހޮވުނު އިރު މުބާރާތުގެ ފެއަރ ޕްލޭ ޓީމަކަށް ހޮވިފައިވަނީ ދިވެހި ސިފައިންގެ ކުލަބެވެ.
ޤައުމީ ވޮލީ ލީގުގެ ފިރިހެން ޑިވިޜަންގައި ހަ ޓީމެއް ބައިވެރިވެފައިވެއެވެ. އެ ޓީމުތަކަކީ ދިވެހި ސިފައިންގެ ކުލަބު، މޯލްޑިވިއަން ސްޕޯޓްސް އެންޑް ރެކްރިއޭޝަން ކްލަބް، ސްޕޯޓްސް ކުލަބު ސިޓީ، ޕޮލިސް ކުލަބު، ގުޑީސް ސްޕޯޓްސް ކްލަބް އަދި ސްޓެލްކޯ ރެކްރިއޭޝަން ކުލަބެވެ.
