މާލޭގައި މިހާތަނަށް ހިނގައިދިޔަ އަލިފާނުގެ އެންމެ ބޮޑު ޙާދިސާ ކުރިމަތި ވެގެންދިޔައިރު ދިވެހި ސަރުކާރުން އެޅި އަވަސް ފިޔަވަޅު ތަކަށްޓަކައި ގުރައިދޫ ދާއިރާގެ މެމްބަރު ޣައްސާން މައުމޫންގެ ޝުކުރު ރައީސުލްޖުމްހޫރިއްޔާ އިބްހިމް މުޙަންމަދު ސޯލިޙަށް ޝުކުރު އަދާކުރައްވައިފިއެވެ.
މިއަދު އޮތް ރައްޔިތުންގެ މަޖިލީހުގެ ޖަލްސާގައި އަލިފާނުގެ ޙާދިސާއާ ގުޅިގެން ކާށިދޫ ދާއިރާގެ މެމްބަރު އަބްދުﷲ ޖާބިރު ހުށަހެޅުއްވި ކުއްލި މައްސަލައިގެ ބަހުސްގައި އަލިފާނުގެ ޙާދިސާއާއި ގުޅިގެން ރައީސުލްޖުމްހޫރިއްޔާ އެޅުއްވި އަވަސް ފިޔަވަޅުތައް ފާހަގަ ކުރައްވައި އެކަމަށް ޝުކުރު އަދާކުރައްވައި ޣައްސާން ވިދާޅުވީ ޙާދިސާ ދިމާވުމާއެކު ދިވެހިންގެ "ފަޚުރެއް" ކަމަށްވާ ދިވެހި ސިފައިންނާއި ފުލުހުން ދެއްކި ހިތްވަރާއި މަސައްކަތަށްވެސް ޝުކުރު އަދާ ކުރައްވާ ކަމަށެވެ.
ޣައްސާނު ވިދާޅުވީ މި ޙާދިސާގެ ވަގުތުގައި ދިވެހި ރައްޔިތުންގެ ތެރެއިން ބަޔަކު ނުކުމެ ޙާލުގައި ޖެހުނު މީހުން ސަލާމަތް ކުރުމަށް ކުރި މަސައްކަތްވެސް ފާހަގަ ކުރަންޖެހޭނެ ކަމަށާއި އެ ފަރާތްތަކަށްވެސް ޝުކުރު ދަންނަވާ ކަމަށެވެ.
"މި ޙާދިސާގައި ޙާލުގައި ޖެހިފައިވާ އާއިލާ ތަކަށާއި އަދި އެނޫންވެސް ދިވެހި ރައްޔިތުންނަށް ބޭނުންވާ ހުރިހާ ވަސީލަތްތަކެއް ސަރުކާރުން ފުރިހަމަ ކުރެއްވުމަށް ކުރައްވާ އަޅުގަނޑުމެންގެ ފުރިހަމަ ތާއީދު އަބަދުވެސް އޮންނާނެ ކަމުގައި ދަންނަވަން" އިދިކޮޅު ޕީޕީއެމްއަށް ނިސްބަތްވެވަޑައިގަންނަވާ ޣައްސާން ވިދާޅުވިއެވެ.
ރައީސް ސޯލިހާއި ސަރުކާރުގެ މުއައްސަސާތަކަށް ޣައްސާނުގެ ޝުކުރާއި ތާއީދު އޮތްކަން މިއަދު މަޖިލީހުގައި ހާމަ ކުރެއްވިއިރު ޣައްސާން ނިސްބަތްވެވަޑައިގަންނަވާ ޕާޓީގެ ބަޔެއް އިސްފަރާތްތަކުން ވަނީ އަލިފާނުގެ ޙާދިސާއާއި ގުޅިގެން ސަރުކާރަށް ފާޑު ކިޔުން އަމާޒު ކުރައްވަމުންނެވެ.
ކެމިކަލް ރައްކާކޮށްފައިވާ ގުދަން ތަކެއްގައި ހިނގައިދިޔަ އަލިފާނުގެ ޙާދިސާ އެ ސަރަހައްދުގެ ބޮޑު ބަޔަކަށް ފެތުރިގެން ގޮސް އެތައް ގެޔެއް ވަނީ އަނދައި އަޅިއަށް ވެފައެވެ. އަދި އެކަކު މި ޙާދިސާގައި ވަނީ އަލިފާން ގަނޑުގެ ތެރެއިން ނުނުކުމެވި ގޭތެރޭގައި ތާށިވެ ނިޔާ ވެފައެވެ. މި ޙާދިސާގައި ގާތްގަނޑަކަށް 400 މީހުން ވަނީ ބޯހިޔާވަހިކަން ގެއްލި ޙާލުގައި ޖެހިފައެވެ.
