ސައޫދީ އަރަބިއްޔާގެ މިނިސްޓަރ އޮފް އެނާޖީ (ހަކަތަޔާ ބެހޭ ވަޒީރު) ޚާލިދު ބިން ޢަބްދުލްޢަޒީޒު އަލްފާލިހު މަގާމުން ދުރުކޮށް އެ މަގާމަށް ސަލްމާން ރަސްގެފާނުގެ ދޮށީ ދަރިކަލުން އަދި ވަލީއަހުދު މުޙައްމަދު ބިން ސަލްމާނުގެ އެއްބަފާ ބޭބޭފުޅު ޢަބްދުލްޢަޒީޒު ބިން ސަލްމާން އައްޔަންކޮށްފިއެވެ.
ސައޫދީ ކެބިނެޓަށް މި ބަދަލު ގެނެސްފައި ވަނީ ރަސްގެފާނު ސަލްމާން ބިން ޢަބްދުލްޢަޒީޒު ރޭގެ ވަގުތެއްގައި ނެރުއްވި ޝާހީ އަމުރުފުޅަކުންނެވެ.
މީގެ އިތުރަށް ސަލްމާން ރަސްގެފާނު ރޭ ނެރެއްވީ ޝާހީ އެހެން އަމުރުފުޅަކުން ހަކަތަޔާ ބެހޭ ވަޒީރުގެ ނާއިބުވެސް ވަނީ މަގާމުން ދުރުކޮށްފައެވެ. ހަކަތަޔާ ބެހޭ ވަޒީރުގެ ނާއިބުކަމުން ޢަބްދުލްޢަޒީޒު އަލްޢަބްދުލްކަރީމު ވަކިކޮށް އެ މަގާމަށް ހަމަޖައްސާފައި ވަނީ އުސާމާ ބިން ޢަބްދުލްޢަޒީޒު އައްޒާމިލްއެވެ.
ސައޫދީ ހަކަތަޔާ ބެހޭ ވުޒާރާގެ އެންމެ އިސް ދެ މަގާމަށް ބަދަލު ގެނެސްފައި މިވަނީ ދުނިޔޭގެ އެންމެ ބޮޑު ތެޔޮ ކުންފުނި ސައޫދީ އަރާމްކޯގެ ހިއްސާ ދުނިޔޭގެ ހިއްސާގެ ބާޒާރުގައި ވިއްކުމަށް ތައްޔާރުވަމުންދާ ވަގުތެއްގައެވެ. އަދި ސައޫދީ ބަޖެޓު ތިލަފަތް ހަމަ ބަޖެޓަކަށް ހެދުމަށް ބޭނުންވާ މިންވަރަށްވުރެ މާ ދަށަށް ތެލުގެ އަގު ގޮސްފައިވާ ދަނޑިވަޅެއްގައެވެ. ސާފުނުކުރާ ތެޔޮ ފީފާއެއްގެ އަގު މިހާރު 60 އެމެރިކާ ޑޮލަރުގައި ހުރިއިރު، ސައޫދީ ބަޖެޓް ތިލަފަތް ހަމަ ބަޖެޓަކަށް ހެދޭނީ ތެޔޮ ފީފާއެއްގެ އަގު މަދުވެގެން 80 އެމެރިކާ ޑޮލަރަށް ހެދިގެން ކަމަށް ތަޖުރިބާކާރުން ބުނެއެވެ.
މިއީ ސައޫދީ އަރަބިއްޔާގެ އެންމެ ބާރުގަދަ އެއް މިނިސްޓްރީ ކަމުގައިވާ އެނާޖީ މިނިސްޓްރީގެ މިނިސްޓަރުކަމަށް ޝަހީ އަމީރަކު އައްޔަންކުރި ފުރަތަމަ ފަހަރެވެ.
ޢަބްދުލްޢަޒީޒު ބިން ސަލްމާން ބިން އަބްދުލްޢަޒީޒަކީ އޭނާގެ މުޅި އަމަލީ ހަޔާތް ހަކަތައިގެ ދާއިރާގައި ހޭދަކުރެއްވި ބޭފުޅެކެވެ. އޭނާ 1985 ވަނަ އަހަރު އެ ދާއިރާއާ ގުޅިވަޑައިގަތީ އެނާޖީ މިނިސްޓަރުގެ މުސްތަޝާރެއްގެ ގޮތުގައެވެ. 1995 ވަނަ އަހަރު އެނާޖީ މިނިސްޓަރުގެ ނާއިބަކަށް ވެވަޑައިގަތުމަށް ފަހު، 2017 ވަނަ އަހަރު އޭނާ ވަނީ އެ މިނިސްޓްރީ ސްޓޭޓް މިނިސްޓަރު ކަމުގެ މަގާމަށް ވަޑައިގެންފައެވެ.
އަމީރު ޢަބްދުލްޢަޒީޒު މަތީ ތަޢުލީމު ހާސިލުކުރައްވާފައި ވަނީ ކިންގް ފަހްދު ޔުނިވަސިޓީ އޮފް ޕެޓްރޯލިއަމް އެންޑް މިނަރަލްސްއިންނެވެ.
