ހޮންކޮންގަށް މިހާރު ކުރިމަތިވެފައިވާ ސިޔާސީ މައްސަލަ އުފެއްދަވައިގެން އޭނާ ވަނީ "މާފުނުކުރެވޭ ވަރުގެ ބޮޑު ހަމަނުޖެހުމެއް"ގެ ސަބަބަކަށް ވެވަޑައިގެންފައިކަމަށާ، އިސްތިއުފާދެއްވުމަކީ އޭނާއަށް ކުރެއްވެން އޮތް ކަމެއް ނަމަ އިސްތިއުފާ ދެއްވީސް ކަމަށް ހޮންކޮންގުގެ ޗީފް އެގްޒެކެޓިވް (ސީއީ) ކެރީ ލޭމް ވިދާޅުވެއްޖެއެވެ. އޭނާ މިވާހަކަފުޅު އާއްމުވެފައި ވަނީ ވިޔަފާރިވެރިންގެ ބަޔަކާ ފާއިތުވި ހަފުތާގެ ތެރޭގައިބައްދަލުކުރައްވައި ދެއްކެވި ވާހަކަފުޅުގެ އޯޑިއޯ ރިކޯޑިންގއަކުންނެވެ.
ސިއްރު ބައްދަލުވުމެއްގެ ގޮތުގައި ކުރިއަށް ދިޔަ އެ ބައްދަލުވުމުގައި އޭނާ ވިދާޅުވެފައި ވަނީ މައްސަލަ ހައްލުކުރުމަށް މިހާރު އޭނާ އަށް އޮތީ ވަރަށް "ހަނިވެފައިވާ ފުރުސަތެއް" ކަމުގައެވެ. އެއީ، އެމެރިކާއާއެކު އޮތް ނުތަނަވަސްކަން އިތުރުވަމުން ދާއިރު، ހޮންކޮންގުގެ ހަމަނުޖެހުން ޗައިނާގެ ގައުމީ ސަލާމަތާއި، މިނިވަންކަމާ ގުޅުން ހުރި ކަމަކަށް ވެފައި ވާތީއެވެ.
"އަހަރެންނަށް އިޚްތިޔާރު އޮތްނަމަ.......... ފުރަތަމަ ކުރާނެ ކަމަކީ މާފަށް އެދުމަށް ފަހު މަގާމު ދޫކޮށްލުން." އިނގިރޭސި ބަހުން ވާހަކަފުޅުދައްކަވަމުން އޭނާ ވިދާޅުވެފައި ވެއެވެ.
ލޭމްގެ ހައިރާންކުރަނިވި، ހިތްދަތިކަން އެކުލެވިގެންވާ ބަސްފުޅުން، ހޮންކޮންގުގެ މައްސަލައާ ކުރިމަތިލާއިރު، ޗައިނާގެ ޒައާމަތުގެ ވިސްނުން ހުރި ގޮތް ވަނީ ސާފުވެގެން ގޮސްފައެވެ. ހޮންކޮންގުގެ މައްސަލައަކީ 1989 ވަނަ އަހަރު ޓިއަނަމެން މައިދާނުގައި ހިނގި ހަމަނުޖެހުމަށް ފަހު، ޗައިނާއާ ކުރިމަތިވި އެންމެ ބޮޑު ސިޔާސީ މައްސަލައެވެ.
"ކަން ދިމާކުރި ގޮތުން ގާނޫނީ ގޮތުން ދެ ސާހިބަކަށް، ރައްޔިތުންގެ މަރުކަޒީ ސަރުކާރަށް އަދި ހޮންކޮންގުގެ ރައްޔިތުންނަށް ޚިދުމަތްކުރަން ޖެހިފައިވާ ޗީފް އެގްޒެކެޓިވްއަކަށް ހޭރިޔާ ކުރުމުގެ، ސިޔާސީ ގޮތުން ހޭރިޔާ ކުރުމުގެ ޖާގަ ވަރަށް ކުޑަ." ސީއީ ލޭމް ވިދާޅުވެފައި ވެއެވެ.
"ޗީފް އެގްޒެޓިވްއަކު ހޮންކޮންގަށް މިފަދަ މުސީބާތެއް ކުރިމަތިކުރުމަކީ މާފުކުރެވޭ ވަރުގެ ކަމެއް ނޫން." ލޭމް ވިދާޅުވެއެވެ.
ބައި ގަޑިއެއްހާއިރު ކުރިއަށް ދިޔަ އެ ބައްދަލުވުމުގައި ލޭމް ވަނީ ރިކޯޑިންގއިން އަޑުއިވޭ ވާހަކަފުޅުތައް ދައްކަވާފައި ކަމަށް، އެބައްދަލުވުމުގައި ބައިވެރިވި ތިން ފަރާތަކުން ވަނީ ޔަގީންކޮށްދީފައެވެ. 24 މިނެޓްގެ އެ ރިކޯޑިންގ އަކީ ހޮންކޮންގުގެ ތަފާތު ދާއިރާތަކުގެ މީހުންނާ އޭނާ ބޭއްވި އެފަދަ އެތައް ބައްދަލުވުމެއްގެ ތެރެއިން ބައްދަލުވުމެއްގައި ދެއްކެވި ވާހަކަފުޅެވެ.
މި ރިކޯޑިންގގައި ވާ ބެހޭގޮތުން ޗައިނާގެ ހޮންކޮންގް އެންޑް މަކާއު އެފެއާޒް އޮފީހާ ނޫސްވެރިން ސުވާލުކުރުމުން ޖަވާބެއް ދީފައި ނުވެއެވެ. އަދި ޗައިނާގެ ސްޓޭޓް ކައުންސިލް (ވަޒީރުންގެ މަޖިލިސް) ގެ އިންފޯމޭޝަން އޮފީހާ ނޫސްވެރިން ސުވާލުކުރުމުން ވެސް ވަކި ޖަވާބެއް ދީފައި ނުވެއެވެ.
ލޭމްގެ ވާހަކަފުޅު ނިންމަވާ ލައްވަމުން ވިދާޅުވެފައި ވަނީ ހުރިހާ ކަމެއް ރަނގަޅުވާނެ ކަމަށް ބުނެ 'ފިނިފެންމަލުގެ މަންޒަރެއް ކުރެހުން' ވާނީ މޮޔަ ކަމަކަށް ކަމުގައެވެ. އެހެންނަމަވެސް، އޭނާ އަށް ހޮންކޮންގާމެދު އެބައޮތްކަން ހާމަކުރެއްވިއެވެ.
"ހޮންކޮންގު އަދި މަރެއް ނުވޭ. ހޮންކޮންގު ވަރަށް ވަރަށް ބަލި ކަމުގައި ވެދާނެ. އެހެނަމަވެސް އަދި މަރެއް ނުވޭ." ޗީފް އެގްޒެކެޓިވް ކެރީ ލޭމް ވިދާޅުވިއެވެ.
