ފޮޓޯތަކުން އެ ފެންނަނީ އެއް އާއިލާއެއްގެ މެމްބަރުންތަކެވެ. ފޮޓޯތަކުން ފެންނައިރު އެއިން ކޮންމެ މީހެއްގެ މޫނުމަތިންވެސް ފެންނަނީ ހިނިތުންވުމެވެ. އުފާވެރިކަމެވެ. ފޮޓޯތައްވެސް އެހާ ޗާލެވެ. އެހާ ހިތްގައިމެވެ. ނަމަވެސް މި ހުރިހާ ފޮޓޯއަކަށް ބަލާލުމާއެކު ކޮންމެ މީހެއްގެ ހިތަށްވެސް ހިތާމައިގެ ފުން އިޙްސާސްތަކެއް މިހާރު ކުރެވިގެން އެބަދެއެވެ.
ފޮޓޯތަކަށް ބަލާލުމާއެކު ހިތަށް އަރާފައިބައިގެންދާ ހިތާމަވެރި އިޙްސާސްތަކާއެކު ހިތް ފަޅައިގެންދާވަރު އެބަވެއެވެ. ހިތް ފަޅައިގެންދާ ވަރުގެ ހިތްދަތި އިޙްސާސްތަކެއް ކުރެވޭނީ ހަމައެކަނި ހިތާމަވެރި ފޮޓޯތަކެއް ފެނުމަކުން އެކަންޏެއް ނޫނެވެ. އުފާވެރި ފޮޓޯތަކަކުން ނުކުންނަ ހިތާމަވެރި ހަނދާންތަކަކުންވެސް ހިތް ފަޅައިގެންދާ ވަރުގެ ހިތްދަތި ކަމެއް އަތުވެދާނެއެވެ. މިއީ އެފަހަރެވެ.
ފޮޓޯތައް ކިތަންމެ ހިތްގައިމު ނަމަވެސް މިވަގުތު ދެން މިއޮތީ އެ ފޮޓޯތަކުގައިވާ އެންމެންގެ ޖަނާޒާއަށް އިންތިޒާރު ކުރުމެވެ. ކަށުނަމާދުގައި ބައިވެރި ވުމެވެ. މައްޔިތުންގެ މައްޗަށް ހެޔޮ ދުއާ ކުރުމެވެ. ކަށްވަޅަށް ތިރިކޮށްފައިވާ އެ ހަތަރުމައިންގެ ސަންދޯއް މައްޗަށް އުކާލެވޭ ތިން މުށްވެލިން އަލްވަދާއު ކިޔުމެވެ. ދެން އެއިން މީހެއްގެ މޫނު ބަލާލަން ލިބޭނެ ހަމައެކަނި ފުރުޞަތަކީ ކަފުންކޮށް، ސަންދޯކާއެކު ވަޅުލުމަށް ތައްޔާރު ކޮށްފައިވާ އެންމެ ފަހު ވަގުތުކޮޅުގައި ލިބިދޭ މައްޔިތާގެ "މޫނު ދެއްކުމުގެ" ފުރުޞަތު އެކަންޏެވެ. إِنَّا لِلّهِ وَإِنَّـا إِلَيْهِ رَاجِعونَ
މިއީ މިއަދު ކަނޑުމަތީގައި ހިނގައިދިޔަ އެތައްބަޔަކު އަޑުން އަޑުނަގައި ރޮއްވާލި ޙާދިސާގައި ލޯންޗެއް ބަންޑުން ޖަހާލުމުގެ ސަބަބުން ކަނޑުވެ، އެއްވަގުތެއްގައި މިދުނިޔެއާ ވަކިވެގެންދިޔަ ހދ. ނޮޅިވަރަންފަރު އަހިމާގޭ އާއިލާގެ ހަތަރު މެމްބަރުންގެ ތަފާތު ފޮޓޯތަކެކެވެ. ދެމަފިރިންނާއި، އެ ދެމަފިރިންގެ ދަރިފުޅާއި، އެ ދެމަފިރިންނަށް ކާފަ، މާމަ ކިޔާ އެންމެ ފަސް އަހަރުގެ ކުއްޖާއެވެ. ފޮޓޯއިން އެ ފެންނަނީ އަހިމާގޭ ޙުސެއިން އަބްދުﷲ (ބޮޑު ޓީޗަރު) އާއި އޭނާގެ އަންހެނުން މަރިޔަމް މަނިކެގެ އިތުރުން އެ ދެމީހުންގެ އަންހެން ދަރިފުޅު ގުރައިޝާ އަބްދުﷲ އަދި ގުރައިޝާގެ ތުއްތު ދަރިފުޅު އީރާއެވެ.
އެ އާއިލާގެ ހަތަރު މެމްބަރުން ކަނޑުވެ، އެ ކަނޑުގެ ބިޔަ ރާޅުތަކުގެ ތެރޭގައި މިދުނިޔެއަށް އެންމެ ފަހު ނޭވާ ދޫކޮށްލަން ޖެހިގެން ދިޔައީ ގުރައިޝާ އޭނާގެ ފިރިމީހާ ކައިރިއަށް ދަރިފުޅު ގޮވައިގެން ޗުއްޓީގައި މާލެ ޖައްސާލަން ރާވައި، ނޮޅިވަރަންފަރުން ފުރައިގެން ހދ. ހަނިމާދޫ އެއާރޕޯޓަށް ދިޔުމަށް ކުރި އެންމެ 10 މިނިޓުގެ ދަތުރުގައި ލޯންޗު ބަނޑުން ޖަހާލުމުގެ ސަބަބުންނެވެ. ގުރައިޝާގެ ބައްޕަ އާއި މަންމަ ދަތުރަށް އެރީ މާލޭގައި ދިރިއުޅޭ ގުރައިޝާގެ ބައްޕަގެ މަންމަ އާއި އެދެމަފިރިންގެ ފިރިހެން ދަރިޔެއްގެ ކައިރިއަށް ޗުއްޓީގައި ޖައްސާލަން ކަމަށް ވެއެވެ.
ނަމަވެސް އެއިން އެއްވެސް ކަމެއް ޙާސިލުނުވެ އުޅެނިކޮށް ނޮޅިވަރަންފަރާއި ހަނިމާދޫއާއި ދެމެދުގައި އޮންނަ ކަނޑުއޮޅިޔަށް ލޯންޗު ވަނުމާއެކު ޖަހާލި ވަރުހުރި ރާޅެއްގައި ލޯންޗު ނަގައި އެއްލާލިއިރު ލޯންޗުން ދަތުރުކުރި ހުރިހާ މީހުންވެސް ކަނޑު ތެރެއަށް ބުރައިގެން ދިޔައެވެ. ޙާދިސާގައި ޖުމްލަ ފަސް މީހުން ނިޔާވިއިރު މި އާއިލާގެ ހަތަރު މީހުންގެ އިތުރުން ދެން ނިޔާވީވެސް ލޯންޗުގައި އިން ދިވެއްސެކެވެ. އެކަމަކު ޤުދުރަތުގެ ނިޔާއަކަށް ވެގެންދިޔައީ އެ ފަސް މީހުންގެވެސް ފަހު ނޭވާ ދޫކޮށްލަން ޖެހުނު މަންޒިލަކަށް ދެރަށް ދޭތެރޭގައިވާ ގަދަ ކަނޑުއޮޅި ވެގެން ދިޔުމެވެ.
ލޯންޗު ހަނިމާދޫއަށް ދަތުރު ފެށީވެސް މޫސުން ވަރަށް ނާޒުކު ޙާލަތެއްގައި އޮއްވައެވެ. ކަނޑު ގަދައެވެ. ވައިވެސް އެހާ ބާރެވެ. މޫސުން ހަމަ ވަރަށް ގޯހެވެ. އުޑުމަތި އޮތީ ވިއްސާރަ ވިލާތަކުން ނަގައި ކަޅުކޮށްފައެވެ. ލޯންޗު ހަނިމާދޫއަށް ނައްޓާލީ 10 މީހުންނާއެކުގައެވެ. 23 ފޫޓު ހުރި ލޯންޗު ބަންޑުން ޖަހާލުމާއެކު ދަތުރަށް އެރި މީހުންގެ ދެބައިކުޅަ އެއްބައި މިދުނިޔެއާ ވަކިވެގެން ދިޔައިރު ދެންތިބި 5 މީހުންގެ ޙާލުވެސް ވަރަށް ގޯހެވެ. ހަސްފަތާލުގައި އެނދުމަތިކޮށް އަދިވެސް އެމީހުންނަށް ދަނީ ފަރުވާ ދެމުންނެވެ.
ލޯންޗު ބަންޑުން ޖަހާލިކަމުގެ ޚަބަރު ރަށުގައި ތިބި މީހުންނާއި ކޯސްޓްގާޑަށްވެސް ލިބޭވަރުވީ ބަންޑުން ޖަހާލުމާއެކު ލޯންޗުގެ ވެރިމީހާ އާއި އިތުރު ދެމީހަކު ގަދަ ރާޅުތަކުގެ ތެރެއިން ހިތްވަރާއެކު ފަތާފައި ގޮސް ހަނިމާދޫއަށް އަރައި އެ ޚަބަރު ދިނުމުންނެވެ. ލޯންޗުގައި އެވެސް މީހަކަށް ލައިފް ޖެކެޓެއްގެ މިންވަރުވެސް ނެތުމާއެކު ދެން ތިބި މީހުން ފުން ކަނޑުގެ ބިޔަ ރާޅުތަކުގެ ދަށުވެފައި ތެޅުނީއެވެ. އެ ރާޅުތަކުގެ ތެރޭގައި ކެތް ނުކުރެވިގެން، ލޮނުބޮވި، ޣަރަގުވެ ފަސް މީހުންގެ ފުރާނަ ދިޔައީއެވެ.
މި ހިތާމަވެރި ޙާދިސާ ހިނގައިދިޔައިރު ގުރައިޝާ އާއި އޭނާގެ ދަރިފުޅު އީރާ ހަނިމާދޫން ފުރައިގެން މަތިންދާ ބޯޓުގައި މާލެ ޖައްސާނެ އިރެއްގެ އިންތިޒާރުގައި ވެލާނާ އިންޓަރނޭޝަނަލް އެއާރޕޯޓުގައި މަޑުކޮށްލައިގެން ހުރި އެންމެ މުހިންމު މީހަކީ ގުރައިޝާގެ ފިރިމީހާ އަދި އީރާގެ ބައްޕައެވެ. އެދެމައިންނަށް ހުޅުލެއިން މަރުޙަބާ ކިޔަން ގޮސް ހުރި ގުރައިޝާގެ ފިރިމީހާއަށް ލިބިގެން ދިޔަ ޚަބަރަކީ ބޯޓު ހަނިމާދޫން ނައްޓާލި ކަމުގެ އުފާވެރި ޚަބަރެއްނޫނެވެ. އަނބިމީހާ އާއި ލޯބިވާ ދަރިފުޅު ހަނިމާދޫއަށްވެސް ނުދެވި އުޅެނިކޮށް ލޯންޗާއެކު ކަނޑުވެ، އެ ދެމައިން އޭނާއާ އަބަދުގެ އަބަދަށް ވަކިވެއްޖެ ކަމުގެ ކަރުނައިން ފޯކޮށްލި، ހިތް ފަޅައިގެންދާ ވަރުގެ ޚަބަރެވެ.
އޭނާއަށްވެސް ދެންއޮތީ އަތުގައި ހުރި އަނބިމީހާ އާއި ދަރިފުޅުގެ ހިތްގައިމު ފޮޓޯ އަލްބަމަށް ބަލަހައްޓައިގެން ހުރުމެވެ. މާލެއަށް ޗުއްޓީ ހޭދަކޮށްލަން އަންހެނުންނާއި ދަރިފުޅު އައުމާއެކު ނަގަން ނިންމައިގެން ހުރި އުފާވެރި ވަގުތުތަކުގެ ފޮޓޯތައް ނެގުމުގެ ފުރުޞަތެއް ނުލިބުނެވެ. ފޮޓޯތަކަށް ބެލި ވަރަކަށް އޮތީ ހިތްދަތި ކަމެވެ. ހިތާމައެވެ. އެ ހަނދާންތައް އިތުރަށް އާވުމެވެ. އަންހެނުންނާއި ދަރިފުޅު ކަނޑުގެ ރާޅުތަކުގެ ދަށުވެ އަޑިއަށް ގޮސް މިދުނިޔެއަށް ފަހު ނޭވާ ދޫކޮށްލިއިރު އެމީހުން އުޅޭނެ ޙާލާއި، އެހީތެރިކަމުގެ އަތަކަށް އެދި ކުރާނެ އާދޭހާއި، ރޯނެ ރުއިން އިޙްސާސް ކޮށްލެވުނަސް ފިރިމީހާގެ ހިތް ފަޅައިގެންދާވަރު ނުވާނެ ހެއްޔެވެ.
ތެދެކެވެ. މި ފޮޓޯތައް ވަރަށް ޗާލެވެ. އަދިވެސް މިއަށްވުރެ ހިތްގައިމު ފޮޓޯ އެ އަލްބަމްގައި ހުންނާނެކަން ޔަގީނެވެ. ނަމަވެސް މި ފޮޓޯ ތަކަށް ބެލިވަރަކަށް އިޙްސާސް ކުރެވެނީ ދެރައެވެ. ލޮލުން އަންނަނީ ކަރުނައެވެ. ކުރެވޭނީ ފުން އަސަރުތަކެކެވެ. ސިކުނޑިއަށް ވެރިވާނީ ޙާދިސާގެ މަންޒަރުތަކެވެ. ހިތަށް އަރާނީ އެމީހުން މިދުނިޔޭގައި ހޭދަކުރި އެންމެ ފަހު ސިކުންތުކޮޅުގައި ކަނޑުގެ އެ ބިޔަ ރާޅުތަކުގެ ތެރޭގައި އުޅޭނެ ޙާލެވެ. ރޯނެ ރުއިމެވެ. އެހީއަށް އެދި ކުރާނެ އާދޭހާއި ކުރު އިންތިޒާރެވެ. އެ ނުރައްކާތެރި ވަގުތުގައި އެމީހުންގެ ހިތަށްވެސް އަރައިފައިބައިގެންދާނެހާ އެއްޗިއްސެވެ. އާހް.... ހަމަ ހިތް ފަޅައިގެން ދާވަރު ވެއެވެ.
ނިޔައުވީ ފަހެއް. ހަތަރު މީހުންގެ ފޮޓޯ. މިވެސް ވަރަށް ދެރަވިކަމެއް