ދަތުރު ކުރަމުންދިޔަ ސަފާރީއެއް ޅ. އަތޮޅު ފަރަކަށް މިއަދު އަރައިފިއެވެ.
އެމްއެންޑީއެފުން މައުލޫމާތު ދިންގޮތުގައި ފަރަށް އެރީ "މުނާ ޔޮޓް" ނަމަކަށް ކިޔާ ސަފާރީއެކެވެ. މި ސަފާރީ އެރީ ޅ. އަތޮޅު ދިއްފުށިމާދޫގެ އިރުމަތީ ފަރާތު ފަރަށެވެ.
ފަރަށް އަރާފައިވާ ސަފާރީ ފުންކުރުމުގައި އެމްއެންޑީއެފް ކޯސްޓްގާޑުން މިހާރު ދަނީ އެ އުޅަނދަށް އެހީތެރިކަން ފޯރުކޮށް ދެމުންނެވެ. ފަރަށް އެރި ސަފާރީގައި ތިބި އެއްވެސް މީހަކަށް މިހާދިސާގައި އަނިޔާއެއް ނުލިބެއެވެ.
މިދުވަސް ވަރަކީ މޫސުން ވަރަށް ގޯސް ދުވަސްވަރެއް ކަމުން މިއީ ކަނޑު ދަތުރު ކުރުން ރައްކާތެރި ދުވަސްވަރެއް ނޫން ކަމަށް މޫސުމާބެހޭ ގައުމީ އިދާރާ އާއި އެމްއެންޑީއެފް ކޯސްގާޑުންވެސް ވަނީ ބުނެފައެވެ. ނަމަވެސް މޫސުމަށް ބެލުމެއްނެތި ބަޔެއް ފަރާތްތަކުން ކަނޑުމައްޗަށް ނުކުތުމުން ހިތާމަވެރި ޙާދިސާތަކެއް މިދުވަސްވަރު ދަނީ ކުރިމަތި ވަމުންނެވެ.
