އާންމު ގޮތެއްގައި ބޮޑުއީދާއި ކުޑައީދުގައި ސަގާފީ އަދި ޒަމާނީ ކުލަތަކުން އީދު ފާހަގަ ކުރުން އެންމެ ފޯރިއާއެކު ކުރިޔަށް ދަނީ ރާއްޖޭގެ އެކި ރަށްރަށުގައެވެ. އީދުގެ އުފާ ރަށްރަށުގައި ނިކަން ފޯރިއާއެކު ކުރިޔަށްދާއިރު މާލެ ސަރަހައްދު އީދުގައި ފެންނާނީ ވަރަށް "ވަނދު" ކޮށެވެ.
ނަމަވެސް މިފަހަރު މިއޮތީ މުޅި މާލެ ސަރަހައްދުގައި މިހާތަނަށް ފާހަގަ ކުރާ އެންމެ ފޯރިގަދަ އީދު ލައްވާލާފައެވެ. އެމަންޒަރު ބަލާލަން ބޭނުމިއްޔާ އީދުތެރޭގައި ކޮންމެހެންވެސް ހުޅުމާލެ ޖައްސާލާށެވެ. ހުޅުމާލޭގައި މިފަހަރު ބޮޑު އީދުގެ ޝެޑިއުލް އެޗްޑީސީން ވަނީ މިހާރު ނެރެފައެވެ. އެ ޝެޑިއުލް ހުޅުމާލޭގައި މީހުން ދިރިއުޅޭ ގެތަކަށްވެސް އެޗްޑީސީން މިހާރު ވަނީ ފޮނުވާފައެވެ.
ޝެޑިއުލަށް ބަލާލުމުން މިފަހަރު ބޮޑުއީދު ފާހަގަ ކުރުން މުޅި ރާއްޖެއިންވެސް އެންމެ ފެންވަރު ރަނގަޅުކޮށް، އަދި އެންމެ ފޯރިގަދަކޮށް ކުރިޔަށްދާނީ ހުޅުމާލޭގައި ކަމަށް ބެލެވެއެވެ. އެޗްޑީސީން ބޮޑުއީދު އިންތިޒާމު ކުރާއިރު މިއީ މުޅި މާލެ ސަރަހައްދުގައިވެސް ފަހުގެ ތާރީޚުގެ ރެކޯޑަކަށް ވެގެންދާނެއެވެ. އެހާވެސް ފުރިހަމަކޮށް އީދު ފާހަގަ ކުރަން ވަނީ ނިންމާފައެވެ.
އެޗްޑީސީން މިކަން އިންތިޒާމު ކުރިނަމަވެސް އީދު ފާހަގަ ކުރުން މިހާ ފުރިހަމައަށް ގެންދެވޭނެ މަގު ތަނަވަސްވެގެން ގޮސްފައި ވަނީ ހުޅުމާލޭގެ ބަޔެއް ވިޔަފާރިވެރިންގެ އިތުރުން އާންމުންގެވެސް ވަރަށް ބޮޑު އެއްބާރު ލުމާވެސް އެކުގައެވެ. އެހެންވެ އީދު ބަންދުގައި އެއްވެސް ރަށަކަށް ނުގޮސް މާލޭގައި ނުވަތަ ވިލިނގިލީގައި ދިރިއުޅޭ މީހުންވެސް އީދު މަޖާ ނެގުމަށް މިފަހަރު އެންމެ ސަޅި ތަނަކަށް ވެގެންދާނީ ހުޅުމާލެއެވެ. އެންމެންވެސް އީދު މަޖާ ނަގާލަން މިފަހަރު ޖައްސާލަންވީ ހުޅުމާލެއަށެވެ. ރަށްރަށުންވެސް އީދު މަޖާ ނަގާލަން މިފަހަރު ހުޅުމާލެ ޖައްސާނުލަންވީ ސަބަބެއް ނެތެވެ.
އީދު ފާހަގަ ކުރުމަށް ހުޅުމާލޭގައި އޮތީ ކޮންކަމެއް ހެއްޔެވެ. ބައިވަރު ހަރަކާތްތައް އެބައޮތެވެ. ޝެޑިއުލް ބަލާލަން ބޭނުން ހެއްޔެވެ. ވަރަށް ފުރިހަމައެވެ. އީދުގެ އުފަލުގެ ތެރެއިން ހުޅުމާލޭގައި ދިރިއުޅޭ ރައްޔިތުންގެ މެދުގައި އެއްބައިވަންތަކަން އިތުރަށް ވަރުގަދަ ވެގެންދާނެ ގޮތަށް ހުރިހާ ކަމެއްވެސް އޮތީ ހަމަޖައްސާފައެވެ.
އެގޮތުން އީދު ނަމާދު ބޮޑު ޖަމާއަތުގައި ކުރުން ރެޑްވޭވް މޯލް ކުރިމަތީގައި އޮންނަ ދުވާ ޓްރެކް ސަރަހައްދުގައި ކުރިޔަށް ގެންދިޔުމަށް ފަހު ހުޅުމާލޭގެ ހުރިހާ ރައްޔިތުން އީދު ދުވަހުގެ ހެދުނުގެ ސައި ބުއިންވެސް އޮތީ އެދުވަހު އެ މައިދާނުގައެވެ. ސައިގެ ކަންތައް ކުރިޔަށްދަނީވެސް ހުޅުމާލޭގެ ހުރިހާ ގެތަކާއި ފްލެޓްތަކާއި ރޯހައުސްތަކުގައި އުޅޭ އެންމެންގެ ބައިވެރިވުމާއެކުގައެވެ. ކޮންމެ ގެޔަކުންވެސް އެދުވަހު ހެދުނު ސަޔަށް ކޮންމެވެސް ބާވަތެއްގެ ކާއެއްޗެއް ގެންގޮސްދޭން އެޗްޑީސީން ވަނީ އެދިފައެވެ.
މިފަދަ ގުޅުން ބަދަހިވާ އިޖުތިމާއީ ކަންކަމުގައި ހުޅުމާލޭގައި އުޅޭ ރައްޔިތުންނަކީ މިހާތަނަށްވެސް ނަމޫނާ ދައްކާފައިވާ ހިތްހެޔޮ އެކުވެރި ބަޔެކެވެ. އެހެންވެ ގިނަބަޔަކު ފޯރިއާއެކު މިކަމުގައިވެސް ބައިވެރިވާންތިބީ ތައްޔާރަށެވެ.
ހުޅުމާލޭގައި މިފަހަރު ބޮޑުއީދު ފާހަގަ ކުރުމަށް އެޗްޑީސީން ރާވާފައިވާ ހަރަކާތްތަކުގެ ޝެޑިއުލް:
* އީދު ހުޅުޖެހުމާއި ބޮޑުބެރު ހަރަކާތްތައް: 10 އޮގަސްޓް 20:00 ން 22:00 އަށް: (އީދު ހުޅުޖެހުން ކުރިޔަށްދާނީ ބީޗު ސަރަހައްދުގައެވެ. އަދި ބޮޑުބެރު ހަރަކާތްތައް ކުރިޔަށްދާނީ ސެންޓްރަލް ޕާކުން ފެށިގެން ރުއްގަނޑު ސަރަހައްދަށެވެ.)
* އީދު މުސައްލާ އަދި އީދު ސައި: 11 އޮގަސްޓް 7:00 ން 9:00 އަށް. (ބޮޑު ޖަމާއަތުގައި އީދު ނަމާދު ކުރުން ސިންތެޓިކް ޓްރެކް (ދުވާ ޓްރެކް) ގައި ނިމުމުން އެ ސަރަހައްދުގައި އީދު ދުވަހުގެ ހެނދުނުގެ ސައި ކުރިޔަށްދާނެއެވެ. ސައިގެ ކަންތައް ހަމަޖައްސަނީ ހުޅުމާލޭގައި މީހުން ދިރިއުޅޭ ކޮންމެގެޔަކުން ކާބޯތަކެތީގެ އެކި ބާވަތްތައް ގެންގޮސްގެންނެވެ.)
* ކޯޑިހެދުން: 11 އޮގަސްޓް 10:00 ން 12:00 އަށް. (ހުޅުމާލޭ 1 ނަންބަރު ރުއްގަނޑުގައި ކޯޑި ތައްޔާރު ކުރާނެގޮތް ބެލުމާއި، ދަސްކުރުމުގެ ފުރުޞަތު ލިބިގެންދާނެއެވެ.)
* މާލި ޕެރޭޑް: 11 އޮގަސްޓް 16:00 ން 18:00 އަށް (މާލި ޕެރޭޑް ކުރިޔަށްދާނީ ރެހެންދި ސްކޫލުން ފެށިގެން ސެންޓްރަލް ޕާކު ސަރަހައްދަށެވެ. މި ޙަރަކާތުގައި ބޮޑުމަސް، ކޯޑި، ސަގާފީ ނެށުން، ބޮޑުބެރު އަދި ފްލޯޓްވެސް ފެނިގެންދާނެއެވެ.)
* ބޮޑުމަސް ބޭނުން: 11 އޮގަސްޓް 20:30 ން 22:30 އަށް (މި ހަރަކާތް ކުރިޔަށްދާނީ ގާޒީ ސްކޫލް ކުރިމަތީގައި އޮންނަ ހުސްބިމުގައެވެ.)
* އީދު ކުޅިވަރު: 12 އޮގަސްޓް 10:00 ން 16:00 އަށް ( މި ހަރަކާތް ކުރިޔަށްދާނީ 1 ނަންބަރު ރުއްގަނޑު ސަރަހައްދުގައެވެ. އީދު ކުޅިވަރުގެ ގޮތުގައި އެ ސަރަހައްދުގައި ކުރިޔަށްދާނީ ފައިގަތަޅާ، ގޯނި ރޭސް، ލުނބޯރޭސް، އާއިލީ ކާޑު، ތިންފައި ރޭސް އަދި އެމްއެންޑީއެފްގެ ހަރަކާތްތަކެވެ.)
* އަލް ޙިޖްރާ، އައިނީ އީދު ސްމައިލް: 11-13 އޮގަސްޓް 16:00 ން 18:00 އަށް އަދި 20:00 ން 22:00 އަށް (މި ހަރަކާތް ކުރިޔަށްދާނީ ސެންޓްރަލް ޕާކުގައެވެ.)
* އީދު ޝޯ: 13 އޮގަސްޓް 20:00 ން 23:30 އަށް (މި ހަރަކާތް ކުރިޔަށްދާނީވެސް ސެންޓްރަލް ޕާކުގައެވެ.)
