ރާއްޖޭގައި ސިޔާސީ ޕާޓީތައް އުފެދިގެން އައިއިރު ދިވެހި ރައްޔިތުންގެ ސޯޝަލް ޑިމޮކްރެޓިކް ޕާޓީ ގެ ނަމުގައި ޕާޓީއެއް އުފައްދަވައި އެޕާޓީގެ ލީޑަރުކަން ކުރެއްވި ރީކޯ އިބްރާހިމް މަނިކު އަވަހާރަ ވެއްޖެއެވެ.
އިބްރާހިމް މަނިކުގެ އާއިލާއިން "އާފަތިސް އޮންލައިން"އާ ވާހަކަ ދެއްކި މީހަކު ބުނީ އަވަހާރަވީ އާލާސްކަންފުޅަކަށް ފަރުވާ ހޯއްދަވަން އައިޖީއެމްއެޗުގައި ފަރުވާ ދެމުން ދަނިކޮށް ރޭ ފަތިހުގެ ވަގުތެއްގައި ކަމަށެވެ. ފަހަކަށް އައިސް އިބްރާހިމް މަނިކު އުޅުއްވަނީ އާލާސްކަންފުޅާއެވެ.
އިބްރާހިމް މަނިކު އަވަހާރަވީއިރު އަނބިކަނބަލަކާއި ހަތް ދަރިން ދުނިޔޭގައި އެބަތިއްބެވިއެވެ. އަވަހާރަވީއިރު އުމުރުފުޅަކީ 69 އަހަރެވެ. އިބްރާހިމް މަނިކުގެ ޖަނާޒާ މިއަދު އަސްރު ނަމާދަށް ފަހު އާސަހަރާ މިސްކިތުގައި އޮންނާނެއެވެ.
އިބްރާހިމް މަނިކަކީ 2008 ވަނަ އަހަރުގެ ރިޔާސީ އިންތިޚާބުގެ ދުވަސްވަރު ސިޔާސީ މައިދާނުގައި ވަރަށް ބޮޑަށް ހަރަކާތްތެރިވެވަޑައިގެންނެވި ބޭފުޅެކެވެ. ނަމަވެސް އެއަހަރަށް ފަހު ސިޔާސީ މައިދާނުން މާބޮޑަށް ފެނިގެން ނުދެއެވެ. އިބްރާހިމް މަނިކަކީ އޭރު އުފެއްދި ސިޔާސީ ޕާޓީއެއް ކަމަށްވާ ދިވެހި ރައްޔިތުންގެ ސޯޝަލް ޑިމޮކްރެޓިކް ޕާޓީގެ ލީޑަރެވެ. ޕާޓީ ސިސްޓަމް ތައާރަފު ވުމުގެ ކުރިންވެސް އިބްރާހިމް މަނިކަކީ ސިޔާސީ މައިދާނުގައި ހަރަކާތްތެރިވެވަޑައިގެންނެވި ބޭފުޅެކެވެ.
