މިސްރުގެ ވެރިރަށް ގާހިރާގައި ހިނގި ވަރުގަދަ އެކްސިޑެންޓެއްގައި ކާރުތަކެއް ގޮވައި އަލިފާން ރޯވުމުގެ ސަބަބުން 17 މީހުން މަރުވެ 32 މީހުން ޒަޚަމްވެއްޖެއެވެ.
މި އެކްސިޑެންޓު ހިނގާފައި ވަނީ ޤާހިރާގެ އަލްމަނީލް އަވަށުގައި ހުންނަ ނޭޝަނަލް ކެންސަރ އިންސްޓިޓިއުޓްގެ ކުރިމަތިން މެރިން ޑްރައިވްގެ ނުބައި ފަޅިން ދުއްވާފައި ދިޔަ ކާރެއް އަނެއް ކޮޅުން ދުއްވާފައި އައި ތިން ކާރެއްގައި ޖެހިގެންނެވެ. އެކްސިޑެންޓުވުމާއެކު ވަރުގަދަ ގޮވުމެއް ގޮވައި ބޮޑު އަލިފާންގަނޑެއް ރޯވިއެވެ.
ރޭ މެންދަމު 12 ޖަހާކަށްހާއިރު (ރާއްޖޭ ގަޑިން ދަންވަރު 3 ޖަހާކަށްހާއިރު) ހިނގި މިހާދިސާގައި ދުއްވާފައި ދިޔަ ކާރުގައި އޮކްސިޖަން ސިލިންޑަރު ހުރި ކަމަށާ، އެއީ ކެންސަރ އިންސްޓިޓިއުޓްގެ މުވައްޒަފެއްގެ ކާރެއް ކަމަށް، މިސްރުގެ ދާޚިލީ ވުޒާރާގެ އޮފިޝަލަކާ ހަވާލާދީ ބައެއް ފަރާތްތަކުން ޚަބަރުދީފައި ވެއެވެ.
މިސްރުގެ ބައެއް އޮންލައިން ނޫސްތަކުން ބުނެފައިވާ ގޮތުގައި، ކާރުތައް އެކްސިޑެޓްވެ ގޮވި ބާރުގަދަ ގޮވުމުގެ ސަބަބުން ކެންސަރ އިންސްޓިޓިއުޓްގެ ކުރިމައްޗަށް ވީ ފަރާތް ވަނީ ހަލާކުވެފައެވެ. އަދި އެ އިންސްޓިޓިއުޓްގެ ކުރިމަތީގައި ޕާކްކޮށްފައި ހުރި ގިނަ ކާރުތަކެއްގައި ރޯވެ ވަނީ އަނދާފައެވެ. އަދި އެތަނުގައި ތިބި ޑޮކްޓަރުންނާއި ބަލި މީހުން ވަނީ އެހެން ތަނަކަށް ބަދަލުކޮށްފައެވެ.
ޚަބަރުތައް ބުނާ ގޮތުގައި ހާދިސާ ހިނގި ސަރަހައްދަށް އައި އެންބިއުލެންސް މަދުވުމުގެ ސަބަބުން، އަމިއްލަ މީހުންގެ ކާރުތަކުގައި ވެސް ޒަޚަމްވި މީހުން ހޮސްޕިޓަލަށް ގެންގޮސްފައި ވެއެވެ.
ގިނަ އަދަދެއްގެ އަލިފާން ނިވާ ލޮރީ އެ ސަރަހައްދުގައި ހަރަކާތްތެރިވާތަން، އާއްމުވެފައިވާ ބައެއް ވީޑިއޯތަކުން ފެނެއެވެ.
މިސްރުގެ ޕްރޮސެކިއުޓާ ޖެނެރަލްގެ އޮފީހުން މި ހާދިސާގެ ތަހުގީގެއް ފަށާފައިވާއިރު، މިއީ ރާވައިގެން ދިން ހަމަލާއެކަން ނުވަތަ ނޫންކަން އަދި ހާމަކޮށްފައި ނުވެއެވެ.
