މިނިސްޓަރ އޮފް ހެލްތް އަބްދުﷲ އަމީން މާދަމާ އޮންނަ ރައްޔިތުންގެ މަޖިލީހަށް ހާޒިރު ކުރުމަށް މަޖިލީހުން އެޖެންޑާ ކޮށްފިއެވެ.
އަމީން މާދަމާ މަޖިލީހަށް ހާޒިރު ކުރައްވަނީ މަޑުއްވަރީ ދާއިރާގެ މެމްބަރު އާދަމް ޝަރީފް އުމަރު މާދަމާ އަމީންއާ ސުވާލު ކުރެއްވުން އޮތުމުންނެވެ. އަމީންގެ ކޮއްކޯފުޅު އަމީތު ކުރިން ހުންނެވި ދާއިރާ ކަމަށްވާ މަޑުއްވަރީ ދާއިރާގެ މިހާރުގެ މެމްބަރު އާދަމް ޝަރީފް އުމަރު ކުރައްވަން ހުށަހަޅުއްވާފައި ވަނީ މައިގަނޑު ދެ ސުވާލެކެވެ.
އާދަމް ޝަރީފް ހުށަހަޅުއްވާފައިވާ ދެ ސުވާލަކީ ރ. މަޑުއްވަރީގައި ހުރި ސިއްޙީ މަރުކަޒުގެ އާއިމާރާތުގެ މަސައްކަތް ފެއްޓޭނެ ތާރީޚަކާއި، އެ ތަނުގެ މަސައްކަތް ނިންމާލައި ޚިދުމަތް ދޭންފެއްޓޭނެ ތާރީޚަކާބެހޭ ގޮތުންނާއި ރ. މީދޫ ސިއްޙީ މަރުކަޒު، ހޮސްޕިޓަލަކަށް ބަދަލުކޮށް އެތަނުގެ ޚިދުމަތް ފެށޭނެ ތާރީޚަކާބެހޭ ގޮތުންނެވެ.
މިއީ މިނިސްޓަރު އަމީން މަގާމާ ހަވާލުވެވަޑައިގެންނެވި ފަހުން މަޖިލީހަށް މިފަދަގޮތަކަށް ވަޑައިގަންނަވާ ފުރަތަމަ ފަހަރެވެ. ނަމަވެސް ސަރުކާރުގެ ބަޔެއް އެހެން ވަޒީރުން މީގެކުރިން މަޖިލީހަށް ވަޑައިގެން، މަޖިލިސް މެމްބަރުން ކުރައްވާ ސުވާލުތަކަށް ޖަވާބު ދެއްވާފައިވެއެވެ.
