މޮޒަންބީކުގެ ރައީސާއި، ކުރީގެ ބާޣީ ޖަމާއަތް، އަދި މިހާރުގެ އިދިކޮޅު ޕާޓީ ރެނާމޯގެ ލީޑާއި ދެބޭފުޅުން ތާރީޚީ އެއްބަސްވުމެއްގައި މިއަދު ސޮއިކުރައްވައިފިއެވެ.
ރައީސު ޕިލިޕޭ ޖަސިންޓޮ ނިޔޫސީ އާއި، އިދިކޮޅު ރެނާމޯގެ ލީޑަރު އޮސުފޯ މޮމާޑޭ މިއަދު ސޮއިކުރެއްވި އެއްބަސްވުމަކީ ސާޅީސް އަހަރަށްވުރެ ގިނަ ދުވަސްވީ ހަތުރުވެރިކަން ރަސްމީގޮތުން ނިމުމަކަށް ގެނައުމަށް އެކަށައެޅުނު އެއްބަސްވުމެކެވެ. މި އެއްބަސްވުން އެކުލަވާލުމުގެ މަގުސަދުގައި ސުލްހައި ވާހަކަތައް ފަށާފައި ވަނީ ރެނާމޯގެ ކުރީގެ ލީޑަރު އަލްފޮންސޯ ދްލާކަމާއެވެ. އޭނާ ވަނީ ފާއިތުވި އަހަރުގެ މޭ މަހު މަރުވެފައެވެ.
1977 އިން ގައި ފެށި ދާޚިލީ ހަނގުރާމަ، 1992 ވަނަ އަހަރު ވަގުތީގޮތުން ނިމުމަކަށް ގެނެވިފައިވީ ނަމަވެސް، ދެ ފަރާތުގެ ދެމެދުގައި ދޭތެރެ ދޭތެރިއިން ކުރިމަތިލުންތައް ހިނގާފައި ވެއެވެ. މިއަދު ރަސްމީކޮށް ނިމުމަކަށް އައި ދާޚިލީ ހަނގުރާމައިގައި 1 މިލިއަނަށްވުރެ ގިނަ މީހުން މަރުވެފައި ވެއެވެ.
ޕޯޗުޖީޒުގެ އިސްތިއުމާރުން މޮޒަންބީކު މިނިވަންކުރުމުގެ މަގްސަދުގައި 1968 ވަނަ އަހަރު އުފެދުނު ފްރެލީމޯ (މޮޒަންބީކް ލިބަރޭޝަން މޫވްމަންޓް) ގެ މަސައްކަތުން 1975 ވަނަ އަހަރު މޮޒަންބީކް މިނިވަންވުމަށް ފަހު އެގައުމުގައި ވެރިކަން ކުރަމުން އައީ ފްރެލީމޯއެވެ. 1975 ވަނަ އަހަރު މިނިވަންކަން ލިބުމާއެކު އުފެދުނު ރެނާމޯ (މޮރަންބީކަން ނޭޝަނަލް ރެސިސްޓެންސް) ޖަމާއަތުން ފްރެލީމޯގެ ސަރުކާރާ ދެކޮޅަށް 1977 ވަނަ އަހަރު ފެށި ހަނގުރާމަ 16 އަހަރަށް ދެމިގެން ދިޔައެވެ.
1992 ވަނަ އަހަރު ހަނގުރާމަ ހުއްޓާލައި ރެނާމޯ އިދިކޮޅު ސިޔާސީ ޕާޓީއެއްގެ ގޮތުގައި ހަރަކާތްތެރިވާން ފެށި ނަމަވެސް، އެ ޕާޓީގެ އަސްކަރީ ގޮތްޕެއް ދަމަހައްޓަމުން އައިސްފައި ވެއެވެ. އަދި ދެ ފަރާތުގެ ދެމެދުގައި ހަތިޔާރާއެކު ކުރިމަތިލުންތައް ހިނގާފައި ވެއެވެ.
މިއަދު ސޮއިކުރެވުނު އެއްބަސްވުމުގެ ދަށުން ރެނާމޯގެ އަސްކަރީ ގޮފި އުވާލައި އެގޮފީގެ 5 ހާހަށްވުރެ ގިނަ ހަނގުރާމަވެރިން ސަރުކާރާއި ހަތިޔާރު ހަވާލުކުރާނެއެވެ. ރެނާމޯ ހަނގުރާމަވެރިން ވަނީ އަންގާރަ ދުވަހު ސަރުކާރާ ހަތިޔާރު ހަވާލުކުރުމުގެ މަސައްކަތް ފަށާފައެވެ. އެމީހުން ދެން ވެގެންދާނީ ސިފައިންނަށާއި، ފުލުހުންނަށެވެ.
ވެރިރަށް މަޕޫޓޯގެ ސްޓޭޑިއަމެއްގައި މިއަދު ބޭއްވި ސޮއިކުރުމުގެ ރަސްމިއްޔާތުގައި 1 ހާހަށްވުރެ ގިނަ މީހުން ބައިވެރިވިއެވެ. އެއްބަސްވުމުގައި ސޮއިކުރެއްވުމަށް ފަހު ރައީސު ނިޔޫސީއާއި އިދިކޮޅު ލީޑަރު މޮމާޑޭ ސަލާންކޮށްލެއްވުމާއެކު އެއްވެތިބި މީހުންގެ ތަރުހީބުގެ އަޑު ކެނޑުމާއެކު ރައީސު ނިޔޫސީ ވިދާޅުވީ "ސުލްހަ މިތާނގައި ދެމިއޮންނާނެ." ކަމުގައެވެ.
މޮޒަންބީކަކީ އެފްރިކާގެ އިރުދެކުނުގައި އޮންނަ 8 ލައްކަ އަކަކިލޯމީޓަރުގެ ގައުމެކެވެ. 29 މިލިއަން މީހުންގެ އާބާދީއެއް އޮންނަ މޮޒަންބީކަކީ ދުނިޔޭގެ އެންމެ ފަގީރު ގައުމުތަކުގެ ތެރޭގައި ހިމެނޭ ގައުމެކެވެ. އެ ގައުމުގެ ގައުމީ އުފެއްދުންތެރިކަމުން އަހަރަކު ބޮލަކަށް ޖެހެނީ 493 އެމެރިކާ ޑޮލަރެވެ.
