ރަމަޞާން މަހަށް ފަހު ޖުމްހޫރީ ޕާޓީގެ ހަރަކާތްތައް އަލުން ފަށައި، ޕާޓީގެ ހިންގުން ވަރުގަދަ ކުރުމުގެ މަސައްކަތް ފައްޓަވާނެ ކަމަށް ޖޭޕީގެ ލީޑަރ ގާސިމް އިބްރާހިމް ވިދާޅުވެއްޖެއެވެ.
ޖޭޕީއަށް އަލަށް އިތުރު ބަޔަކު ސޮއި ކުރުމަށްޓަކައި ރޭ ކުނޫޒުގައި ބޭއްވި ބައްދަލުވުމެއްގައި ގާސިމް ވިދާޅުވީ ރޯދައަށް ފަހު ޕާޓީގެ ހަރަކާތްތައް ވަރުގަދަކޮށް، ޕާޓީގެ ހިންގުން ވަރުގަދަ ކުރުމުގެ މަސައްކަތުގައި ރާއްޖޭގެ އަތޮޅުތަކުގެ ރަށްރަށްވެސް ޖޭޕީގެ ޓީމުތައް ދަތުރު ކުރާނެ ކަމަށެވެ.
ގާސިމް ވިދާޅުވީ ޖުމްހޫރީ ޕާޓީ ހަލާކުވެގެންދާން ދޫކޮށްނުލައްވާނެ ކަމަށާއި، ރޯދައަށް ފަހު ޖޭޕީން އާފެށުމަކުން މަސައްކަތް ފަށާއިރު ޕާޓީ ވަރުގަދަ ކުރެވެން އޮތީ ކޮންމެ ފިޔަވަޅެއް އަޅައިގެން ކަމަށްވިޔަސް އެކަން ކުރައްވާނެ ކަމަށެވެ. އެގޮތުން ޕާޓީގެ ކަންކަން އިސްލާހުކޮށް، ޕާޓީ ވަރުގަދަ ކުރުމަށްޓަކައި ޕާޓީގެ މެނޭޖްމެންޓަށް ބަދަލެއް ގެންނަންޖެހޭނަމަ އެކަންވެސް ކުރައްވާނެ ކަމަށް ވިދާޅުވިއެވެ.
"ޕާޓީ ރީއެސްޓެބްލިޝްކޮށް ރާއްޖޭގެ އެކިކަންކޮޅު ތަކަށް ދަތުރު ކުރާނަން" ގާސިމް ވިދާޅުވިއެވެ.
ރައްޔިތުންގެ މަޖިލިސް އިންތިޚާބަށް ފަހު ޖޭޕީގެ ހަރަކާތްތައް ހުއްޓިފައި އޮތުމަށް ފަހު ރޯދައިގެ ފަހުން އާފެށުމަކުން ފަށާއިރު ގާސިމް ވިދާޅުވީ ސިޔާސީ މައިދާނުގައި އެމަނިކުފާނު ދެމިހުންނެވިހާ ހިނދަކު ރައްޔިތުންގެ ހައްގުގައި ކުރައްވަމުން ގެންދަވާ މަސައްކަތް ހުއްޓާނުލައްވާނެ ކަމަށެވެ.
ސަރުކާރު ކޯލިޝަނުގައި މިހާރުވެސް އޮތް ޖޭޕީން ސަރުކާރާއެކު އަދިވެސް އޮތްކަން ގާސިމް ވަނީ ރޭވެސް ތަކުރާރު ކުރައްވާފައެވެ. ގާސިމް ވިދާޅުވީ ރައީސް ސޯލިހުގެ ސަރުކާރު ގާނޫނީ ހަމަތަކުގެ މަތިން ކުރައްވާ ކޮންމެ ކަމަކަށް ޖުމްހޫރީ ޕާޓީން އެއްބާރުލުން ދޭނެކަމަށެވެ.
